މާލޭގެ ބޮޑުތަކުރުފާނު މަގު ތަރައްގީކުރުމުގެ މަޝްރޫއުގެ ފުރަތަމަ ފިޔަވަހީގެ ދަށުން، މަސްވެރިންގެ ޕާކު ސަރަހައްދުގައި ގާއިމުކޮށްފައިވާ ދެވަނަ ޕަމްޕް ސްޓޭޝަން މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) އިން ކާމިޔާބުކަމާއެކު ނިންމާލައިފިއެވެ.
މިދިޔަ އޯގަސްޓް މަހުގެ 13 ވަނަ ދުވަހު މި ޕަމްޕް ސްޓޭޝަން ރަސްމީކޮށް މަސައްކަތް ފަށާފައިވާއިރު، އެމްއެމްއޭ ސަރަހައްދުގައި ހުންނަ ފުރަތަމަ ޕަމްޕް ސްޓޭޝަން މި މަހުގެ 15 ވަނަ ދުވަހު ބޭނުންކުރަން ފެށުމަށް ވަނީ ތާވަލުކުރެވިފައެވެ.
Advertisement
ޕަމްޕް ސްޓޭޝަންގެ ގާއިމްކުރުމުގެ މަސައްކަތުގައި އެމްޓީސީސީގެ މުވައްޒަފެއް. / ފޮޓޯ: އެމްޓީސީސީ
މި ޕަމްޕް ސްޓޭޝަންތަކަކީ މާލޭގެ އެންމެ ބާރުބޮޑު އެއް މަގު ކަމަށްވާ ބޮޑުތަކުރުފާނު މަގުގައި ފެންބޮޑުވާ މައްސަލައަށް ދާއިމީ ހައްލެއް ހޯދުމަށް ގާއިމުކުރެވޭ ޒަމާނީ ފެން ހިންދާ ނިޒާމުގެ މުހިންމު ބައެކެވެ. އެމްޓީސީސީން ހާމަކުރި ގޮތުގައި، މި އާ އިންފްރާސްޓްރަކްޗާގެ ސަބަބުން ވިއްސާރަ މޫސުމުގައި މަގުމަތީގައި ފެންބޮޑުވެ، އާންމު ދަތުރުފަތުރަށާއި ވިޔަފާރިތަކަށް ކުރިމަތިވާ ދަތިތަކަށް ދާއިމީ ހައްލެއް ލިބިގެންދާނެއެވެ.
ބޮޑުތަކުރުފާނު މަގަކީ ޒަމާނުއްސުރެ ވިއްސާރަ ދުވަސްވަރު ފެންބޮޑުވުމުގެ ސަބަބުން ބޮޑެތި ގޮންޖެހުންތަކާ ކުރިމަތިލާންޖެހޭ ސަރަހައްދެކެވެ. މި މަޝްރޫއުގެ ދަށުން މަގު ފުޅާކުރުމާއި، ތާރު އެޅުމާއި، ހިނގާ މީހުންނަށް ފަސޭހަވާނެހެން ދުވާރުތައް ހެދުމުގެ މަސައްކަތް މީގެ ކުރިން ވަނީ ނިންމާފައެވެ. ނަމަވެސް، މަގުގައި ފެން ހަރުލާ މައްސަލަ އެއްކޮށް ހައްލުކުރުމަށްޓަކައި ދާއިމީ ޕަމްޕް ސްޓޭޝަންތަކުގެ މަސައްކަތް ނިންމައި ބޭނުންކުރަން ފެށުމަކީ ކޮންމެހެން ބޭނުންތެރި ކަމެއް ކަމަށް އެ ކުންފުނިން ފާހަގަކުރެއެވެ.
އެމްޓީސީސީގެ އިންޖިނިއަރުން ވަނީ ދެވަނަ ޕަމްޕް ސްޓޭޝަންގެ އިލެކްޓްރިކަލް ޕެނަލްތަކާއި، ވަލްވްތަކާއި، ބިމުގެ އަޑީގައިވާ ނިޒާމުތައް ޓެސްޓުކޮށް، އޮޕަރޭޝަނަށް ގެނެސްފައެވެ. މި މަސައްކަތް ނިމުމުން، ވާރޭވެހޭ ވަގުތުތަކުގައި މަގުމަތީގައި ފެންބޮޑުވިޔަނުދީ، އަވަސްލިބި ހިންދާލުމުގެ ގާބިލުކަން މި ނިޒާމަށް ލިބިގެންދާނެއެވެ.
މިއީ މާލޭގެ އިންފްރާސްޓްރަކްޗާ ވަރުގަދަކޮށް، މޫސުމީ ބަދަލުތަކުން ކުރިމަތިވާ ފެންބޮޑުވުމުގެ ހާދިސާތަކުން ރައްކާތެރިވުމަށް ސަރުކާރުން ކުރިއަށްގެންދާ މުހިންމު މަސައްކަތެއްގެ ބައެކެވެ. އެމްޓީސީސީން ބުނި ގޮތުގައި، ބާކީ ހުރި މަސައްކަތްތައް ނިމުމުން، މި ސަރަހައްދުގެ ފެން ހިންދުމުގެ ނިޒާމު ފުރިހަމައަށް މަސައްކަތް ކުރަން ފަށާނެއެވެ.
