ތިލަމާލެ ބްރިޖް މަޝްރޫއަކީ މި ސަރުކާރުން ގާތްގަނޑަކަށް ސުމަކުން ފެށި މަޝްރޫއެކޭ ބުނެވިދާނެ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.
ރައީސުލްޖުމްހޫރިއްޔާގެ އޮފީހުން ގެނެސްދޭ "ދަ ޕަލްސް" ޕްރޮގްރާމްގެ 6 ވަނަ އެޕިސޯޑުގައި ވާހަކަފުޅު ދައްކަވަމުން ރައީސް ވިދާޅުވީ، ތިލަމާލެ ބްރިޖު ޕްރޮޖެކްޓަކީ ނިމިދިޔަ ސަރުކާރުގައި ފެށި މަޝްރޫއެއް ނަމަވެސް، ކަނޑައެޅިފައިވާ ތާރީހުތަކަށް އެ މަސައްކަތް ނިންމިފައި ނުވާ ކަމަށެވެ. އަދި މި ސަރުކާރު ހަވާލުވީއިރު، ފާއިތުވި ދެ އަހަރެއްހާ ދުވަހުގެ ތެރޭގައި އެކަށީގެންވާ ބޮޑު މަސައްކަތެއް ކުރެވިފައި ނެތްކަން ރައީސް ފާހަގަކުރެއްވިއެވެ.
ރައީސް ވިދާޅުވި ގޮތުގައި، މި ސަރުކާރުން ވެރިކަމާ ހަވާލުވިއިރު މާލެ އާއި ވިލިމާލެއާ ދޭތެރޭ ގާތްގަނޑަކަށް އެއްވެސް އަމަލީ މަސައްކަތެއް ކުރެވިފައެއް ނެތެވެ. އެހެންކަމުން، މި ބޮޑު މަޝްރޫއުގެ އަމަލީ މަސައްކަތް މި ސަރުކާރުން ފަށަން ޖެހުނީ "ސުމަކުން" ކަމަށް ރައީސް ސިފަކުރެއްވިއެވެ. މިހާރު މި މަސައްކަތް ކުރިއަށް ގެންދަނީ ސަރުކާރުން ވަރަށް ބޮޑު ސަމާލުކަމެއް ދީގެން ކަމަށްވެސް އެމަނިކުފާނު ވިދާޅުވިއެވެ.
Advertisement
މި މަޝްރޫއު ކުރިއަށް ގެންދިއުމުގައި އިންޑިއާ ސަރުކާރުގެ ފަރާތުން ވަރަށް ބޮޑު އެހީތެރިކަމެއް ލިބެމުންދާކަން ފާހަގަކުރައްވައި ރައީސް ވިދާޅުވީ، ސަރުކާރުގެ އަމާޒަކީ ވީހާވެސް އަވަހަކަށް މި މަޝްރޫއު ނިންމައި ރައްޔިތުންނަށް އޭގެ ފައިދާ ހޯދައިދިނުން ކަމަށެވެ.
މަޝްރޫއުގެ މިހާރުގެ ކުރިއެރުމާ ގުޅޭގޮތުން ވާހަކަފުޅު ދައްކަވަމުން ރައީސް ވިދާޅުވީ، މާލެ އާއި ވިލިމާލެއާ ދޭތެރޭގެ ބައި މިހާރު ގާތްގަނޑަކަށް އެއްކޮށް ގުޅުވާލެވިފައިވާ ކަމަށެވެ. އަދި ވިލިމާލެ އާއި ގުޅީފަޅާ ދޭތެރޭ ގުޅުވަންޖެހޭ ބައިގެ ބޮޑު ބައެއް ނިމިފައިވާއިރު، ގުޅީފަޅާއި ތިލަފުށްޓާ ދޭތެރޭގެ މަސައްކަތްތައްވެސް ބާރު ސްޕީޑުގައި ކުރިއަށްދާކަމަށް ރައީސް ވިދާޅުވިއެވެ.
ރައީސް އިތުރަށް ވިދާޅުވީ، ކުރީގެ ސަރުކާރުގެ ދުވެއްޔާ އަޅާބަލާއިރު، މި ސަރުކާރުގެ ކުރު މުއްދަތެއްގެ ތެރޭގައި މަސައްކަތްތައް ބާރު ދުވެލީގައި ކުރިއަށްދާތީ، މާ ލަސްތަކެއް ނުވެ ބްރިޖުގެ މަސައްކަތް އެއްކޮށް ނިންމާލެވޭނެ ކަމުގެ ފުރިހަމަ ޔަގީންކަން އެބައޮތް ކަމަށެވެ.
