2027 ވަނަ އަހަރަކީ ރާއްޖޭގެ ތާރީޚުގައިވެސް އެންމެ ގިނަ އަދަދަކަށް ތަރައްގީގެ މަޝްރޫއުތައް ނިންމާލެވޭނެ އަހަރަށް ވެގެންދާނެ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.

ރައީސުލްޖުމްހޫރިއްޔާގެ އޮފީހުން ގެނެސްދޭ "ދަ ޕަލްސް" ޕްރޮގްރާމްގެ 6 ވަނަ އެޕިސޯޑުގައި ވާހަކަފުޅު ދައްކަވަމުން ރައީސް ވިދާޅުވީ، ރަށްރަށުގައި ތަރައްގީގެ އެކި މަސައްކަތްތައް ބާރަށް ކުރިއަށްދާ ކަމަށެވެ. ނަމަވެސް ބައެއް ރަށްރަށުގައި ދިމާވި އެކި މައްސަލަތަކާ ހުރެ މަސައްކަތްތައް ބާރުމިނުގައި ކުރިއަށް ނުދިޔަ ނަމަވެސް، ކުރިއަށް އޮތް ކުޑަ ދުވަސްކޮޅުގެ ތެރޭގައި އެ ހުރިހާ މަސައްކަތްތަކެއްގެ ސްޕީޑު އަވަސްވެގެންދާނެ ކަމުގެ ޔަގީންކަން ރައީސް ދެއްވިއެވެ.

މަޝްރޫއުތައް މަޑުޖެހެން މެދުވެރިވި ސަބަބާ ގުޅޭގޮތުން ރައީސް ވިދާޅުވީ، އޭގެ މައިގަނޑު ސަބަބަކީ އިގްތިސާދީ ގޮތުން ދިމާވި ގޮންޖެހުންތައް ކަމަށެވެ. އެހެންނަމަވެސް، މިހާރު މަޝްރޫއުތައް ކުރިއަށް ގެންދާނެ ހާއްސަ ޕްލޭނެއް އެކުލަވާލައި، އެ ޕްލޭން ތަންފީޒުކުރަން ފަށާފައިވާ ކަމަށް އެމަނިކުފާނު ފާހަގަކުރެއްވިއެވެ.

ތަރައްގީގެ މަޝްރޫއުތައް ނިމޭނެ ތާވަލާ ގުޅޭގޮތުން ރައީސް މުއިއްޒު ވިދާޅުވީ، މިއަހަރުގެ ތެރޭގައިވެސް ބައެއް މަޝްރޫއުތައް ނިމިގެންދާނެ ކަމަށެވެ. ނަމަވެސް، އެންމެ ގިނަ މަޝްރޫއުތައް ނިމި، ރައްޔިތުންނަށް އޭގެ މަންފާ ލިބިގެންދާނީ 2027 ވަނަ އަހަރު ކަމަށާއި، އަދި 2028 ވަނަ އަހަރުގެ ތެރޭގައިވެސް އިތުރު މަޝްރޫއުތަކެއް ނިންމާލެވޭނެ ކަމަށް ރައީސް ވިދާޅުވިއެވެ.

މަސައްކަތްތައް ތަރުތީބުކޮށްފައިވާ ގޮތް ތަފްސީލުކޮށްދެއްވަމުން ރައީސް ވިދާޅުވީ، އުމްރާނީ ތަރައްގީގެ ދާއިރާއިން އެކި ބާވަތުގެ މަސައްކަތްތަކަށް ވަކި ޝެޑިއުލްތަކެއް ހެދިފައިވާ ކަމަށެވެ. މިސާލެއްގެ ގޮތުން ރައީސް ފާހަގަކުރެއްވީ ބަދަރު ހެދުމާއި ގޮނޑުދޮށް ހިމާޔަތްކުރުމުގެ މަޝްރޫއުތަކެވެ. މިފަދަ މަޝްރޫއުތަކަށް ގިނަ އަދަދަކަށް ބޮޑުހިލަ ބޭނުންވާތީ، މެޓީރިއަލް ސޯސިން ނުވަތަ ތަކެތި ހޯދާނެ ގޮތުގެ ހާއްސަ ތާވަލެއްގެ ދަށުން އެ މަސައްކަތްތައް ކުރިއަށް ގެންދިއުމަށް ވަނީ ރޭވިފައެވެ.

މިއީ ރާއްޖޭގެ އިގްތިސާދީ ހާލަތު ރަނގަޅުކޮށް، ރަށްރަށުގެ ތަރައްގީއަށް ސަރުކާރުން ކުރަމުންދާ މަސައްކަތުގެ ތެރެއިން އެކުލަވާލާފައިވާ ހަރުދަނާ ޕްލޭނެއްގެ ދަށުން ކުރިއަށްދާ މަސައްކަތްތަކެއް ކަމަށްވެސް ރައީސުލްޖުމްހޫރިއްޔާ ވިދާޅުވިއެވެ.