މާލޭގެ ވިޔަފާރި ބަނދަރު ތިލަފުށްޓަށް ބަދަލުކުރުމުގެ ބިޔަ މަޝްރޫޢުގެ އަމަލީ މަސައްކަތް ފެށުމަށްޓަކައި، ތިލަފުށީގެ މެދަށްވާ ގޮތަށް އޮންނަ ފަޅުތެރޭގައި ހުރި ހުރިހާ އުޅަނދުތަކާއި ތަކެތި ނެގުމަށް ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އިން އަންގައިފިއެވެ. މިއީ މާލޭ ބަނދަރަށް ދިމާވެފައިވާ ތޮއްޖެހުމުގެ މައްސަލައަށް ދާއިމީ އަދި ޒަމާނީ ހައްލެއް ހޯދުމަށް ސަރުކާރުން ކުރިއަށްގެންދާ މުހިންމު މަޝްރޫޢެކެވެ.

އެޗްޑީސީން އިޢުލާންކޮށްފައިވާ ގޮތުގައި، ތިލަފުށީ ފަޅުގައި އަޅާފައިވާ އުޅަނދުތަކާއި، ދޫކޮށްލާފައިވާ ތަކެތީގެ އިތުރުން އަޑިއަށް ގޮސްފައިވާ އުޅަނދުތައް 7 ދުވަހުގެ ތެރޭގައި ނަގައި ހުސްކުރަންޖެހޭނެއެވެ. އަދި މި މުއްދަތުގައި ނުނަގާ ހުންނަ އުޅަނދުތަކާއި ތަކެއްޗާ މެދު ކަނޑައެޅިފައިވާ އުސޫލުތަކުގެ ދަށުން ހަރުކަށި ފިޔަވަޅު އަޅާނެ ކަމުގެ އިންޒާރުވެސް އެ ކޯޕަރޭޝަނުން ވަނީ ދީފައެވެ.

މާލޭ ވިޔަފާރި ބަނދަރު ތިލަފުށްޓަށް ބަދަލުކުރުމުގެ މައިގަނޑު މަސައްކަތްތައް ސަރުކާރުން ހަވާލުކޮށްފައިވަނީ ދުނިޔޭގެ ފެންވަރުގެ ކުންފުންޏެއް ކަމަށްވާ ޗައިނާ ހާބަ އިންޖިނިއަރިން ކޮމްޕެނީއާއެވެ. މި މަޝްރޫޢުގެ ދަށުން 1,000 މީޓަރަށްވުރެ ދިގު ބައިނަލްއަޤުވާމީ ކީ-ވޯލްއަކާއި، މާލޭގެ އުތުރު އަދި ހުޅަނގު ދެކުނު ބަނދަރު ބޭނުންކުރާ އުޅަނދުތަކަށް ޚާއްޞަ 2,000 މީޓަރުގެ ޑޮމެސްޓިކް ޓާމިނަލެއް ބިނާކުރާނެއެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ތަޞައްވުރާ އެއްގޮތަށް، މި އައު ބަނދަރު 11 ނޮވެންބަރު 2027 ގެ ނިޔަލަށް އެއްކޮށް ނިންމާ، ފުރިހަމައަށް އޮޕަރޭޝަނަށް ގެނައުމަށް ވަނީ އަމާޒު ހިފާފައެވެ. ޒަމާނީ، ފުރިހަމައަށް ޑިޖިޓަލްކުރެވިފައިވާ ޕޯޓް މެނޭޖްމަންޓް ސިސްޓަމަކާއެކު ހިންގާ މި ބަނދަރު ނިމުމުން، މާލޭ ވިޔަފާރި ބަނދަރުގެ 80 އިންސައްތަ އޮޕަރޭޝަން ތިލަފުށްޓަށް ބަދަލުވާނެއެވެ. ބާކީ 20 އިންސައްތަ ޚިދުމަތް ދޭނީ މާލޭގެ އިންޑަސްޓްރިއަލް ވިލެޖުންނެވެ.

މި މަޝްރޫޢު ނިމުމުން އިގުތިސާދީ ގޮތުން ބޮޑެތި ފައިދާތަކެއް ކުރާނެއެވެ. އެގޮތުން މިހާރު މާލޭ ބަނދަރުން މުދާ ހުސްކުރަން 7 ދުވަސް ހޭދަވާއިރު، ތިލަފުށީގެ އައު ބަނދަރުން އެންމެ 48 ގަޑިއިރު ތެރޭގައި މުދާ ހުސްކުރެވޭނެއެވެ. މީގެ ސަބަބުން ވިޔަފާރިވެރިންނަށް ކުރާ ޚަރަދު ކުޑަވެ، މުދަލުގެ އަގުތައް ހެޔޮވުމަށް ބޮޑު މަގުފަހިވެގެންދާނެއެވެ.