ރާއްޖޭގެ އިޤްތިޞާދީ ހާލަތު ރަނގަޅު ކުރުމަށް ކުރަމުންދާ މަސައްކަތްތަކާއެކު، ރައްޔިތުންގެ އުއްމީދުތަކާ ގުޅިފައިވާ ތަރައްޤީގެ ހުރިހާ ވަޢުދުތަކެއް 2028 ވަނަ އަހަރުގެ ދެވަނަ ކުއާޓަރާ ހަމައަށް ދާއިރު ނިންމަވައިދެއްވާނެ ކަމުގެ ފުރިހަމަ ޔަގީންކަން ރައީސުލްޖުމްހޫރިއްޔާ ޑރ. މުހައްމަދު މުއިއްޒު ދެއްވައިފިއެވެ.
ރައީސުލްޖުމްހޫރިއްޔާ މި ޔަޤީންކަން ދެއްވީ އއ. އުކުޅަހުގައި ބޭއްވި ޕީއެންސީ ޖަގަހަ ޖަލްސާގައި ވާހަކަފުޅު ދައްކަވަމުންނެވެ. އެމަނިކުފާނު ވިދާޅުވީ ސަރުކާރުން ވައުދުވެފައިވާ ގޮތަށް ތަރައްގީގެ މަސައްކަތްތައް ތަންފީޒުކުރަމުންދާ ކަމަށާއި، އުކުޅަހުގެ ރައްޔިތުންނަށް ވެވަޑައިގެންފައިވާ ވައުދުތައްވެސް އެކި މަރުހަލާތަކުގައި ކުރިއަށްދާ ކަމަށެވެ.
އުކުޅަހުގެ ތަރައްގީއަށް އަލިއަޅުއްވާލައްވަމުން ރައީސް ވިދާޅުވީ، އެރަށަށް ދިމާވެފައިވާ ބޯހިޔާވަހިކަމުގެ މައްސަލަ ހައްލުކުރުމަށްޓަކައި މިހާރު ހިއްކާފައިވާ ބިމަށް އިތުރު 2 ހެކްޓަރު އިތުރުކޮށްދެއްވާނެ ކަމަށެވެ. އަދި އުކުޅަހަކީ ފަތުރުވެރިކަމުގެ ރަށަކަށްވުމާއެކު، އެ ދާއިރާގައި ހަރަކާތްތެރިވާ ފަރާތްތަކުގެ ކަންބޮޑުވުންތައް އަޑުއައްސަވާފައިވާ ކަމަށާއި، ގޮނޑުދޮށް ހިމާޔަތްކުރުމުގެ މަޝްރޫޢުގެ އީއައިއޭ ނިމި، ކުރިއަށް އޮތް ދެ ހަފްތާ ތެރޭގައި އެ މަސައްކަތް ފެށޭނެ ކަމަށްވެސް ރައީސް ވިދާޅުވިއެވެ.
Advertisement
ރައީސް އިތުރަށް ވިދާޅުވީ، ވެރިކަމާ ހަވާލުވެވަޑައިގަތްއިރު އިގްތިސާދު އޮތް އަނދަވަޅުން ސަލާމަތްކުރުމުގެ މަސައްކަތާއެކު، ރާއްޖޭގެ އެކި ހިސާބުތަކުގައި ބޯހިޔާވަހިކަމާއި ބިން ހިއްކުމުގެ ގިނަ މަޝްރޫއުތަކެއް މިހާރުވެސް ހިނގަމުންދާ ކަމަށެވެ.
"އިގްތިސާދީ ހާލަތު ރަނގަޅު ކުރުމާއެކީގައި އިގްތިސާދުގެ ބުންވަރު އިތުރަށް ވަރުގަދަކޮށްދީ، އާންމު ފަރުދުންގެ ދިރިއުޅުމުގެ ހާލަތު ރަނގަޅުކޮށްދީ، ޒުވާނުންނާއި އަންހެނުން އިކޮނޮމިކަލީ ބާރުވެރިކޮށްދޭނެ ކަމަށް އަޅުގަނޑު ވިދާޅުވީ،"
ރައީސުލްޖުމްހޫރިއްޔާ ޑރ. މުހައްމަދު މުއިއްޒު
އެމަނިކުފާނު ފާހަގަކުރެއްވި ގޮތުގައި ޒުވާނުންނާއި އަންހެނުން ބާރުވެރިކުރުމަށް ލޯނުގެ އިތުރުން އިގްތިސާދީ ފުރުސަތުތައްވެސް ފަހިކޮށްދެއްވަމުން ގެންދަވާނެއެވެ.
މި ސަރުކާރުގެ ތަރައްގީގެ ދުވެއްޔާ ބެހޭގޮތުން ވާހަކަފުޅު ދައްކަވަމުން ރައީސް ވިދާޅުވީ، މިވޭތުވެދިޔަ މުއްދަތުގެ ތެރޭގައި އެކި ދާއިރާތަކުން 590 މަޝްރޫއެއް ނިންމާފައިވާ ކަމަށެވެ. މިއީ ނިމިދިޔަ އެމްޑީޕީ ސަރުކާރާއި އޭގެ ކުރީ ސަރުކާރުގެ ފުރަތަމަ އެއްގޮތް މުއްދަތާ އަޅާބަލާއިރު ބޮޑު ކުރިއެރުމެއްކަން އެމަނިކުފާނު ފާހަގަކުރެއްވިއެވެ. މިހާރުވެސް ރާއްޖޭގެ އެކި ކަންކޮޅުތަކުގައި 1,635 މަޝްރޫއެއްގެ މަސައްކަތް ހިނގަމުންދާ ކަމަށް ރައީސް ވިދާޅުވިއެވެ.
ރައީސްގެ ވާހަކަފުޅު ނިންމަވާލެއްވީ، ސަރުކާރުގެ ޕްލޭނާއި ޕްރޮގްރާމްތައް ބަރާބަރަށް ތަންފީޒުވަމުންދާ ކަމަށާއި، 2028 ގެ ދެވަނަ ކުއާޓަރާ ހަމައަށް ދާއިރު ހުރިހާ ވަޢުދުތަކެއް ފުއްދުމުގައި ފުރިހަމަ ކާމިޔާބީ ހާސިލްކުރައްވާނެ ކަމުގެ ފުރިހަމަ ޔަގީންކަން ރައްޔިތުންނަށް ދެއްވަމުންނެވެ.
