ބައިނަލްއަޤުވާމީ ގޮތުން ކުރިމަތިވަމުންދާ ނުތަނަވަސްކަމާއި ބޭރުގެ އެކި ފިއްތުންތަކާ އެކުގައިވެސް، ދިވެހިރާއްޖެއިން އަދާކުރަންޖެހޭ މާލީ އިލްތިޒާމުތައް ސަރުކާރުން ބަރާބަރަށް އަދާކުރަމުންދާ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
ރައީސުލްޖުމްހޫރިއްޔާ މިހެން ވިދާޅުވީ ސްމޯލް އައިލެންޑް ޑިވެލޮޕިންގ ސްޓޭޓްސް ސުޕްރީމް އޮޑިޓް އިންސްޓިޓިއުޝަންސް (ސިޑްސް-އެސްއޭއައި) ސިމްޕޯޒިއަމް ނިންމުމާއި، އިންޓޮސާއީ ޑިވެލޮޕްމެންޓް އިނީޝިއޭޓިވް (އައިޑީއައި) ގްލޯބަލް ސަމިޓް ފެށުމުގެ ރަސްމިއްޔާތުގައި ވާހަކަފުޅުދައްކަވަމުންނެވެ.
ކުދި ޖަޒީރާ ޤައުމުތަކަށް (ސިޑްސް) ކުރިމަތިވާ ގޮންޖެހުންތަކަށް އަލިއަޅުއްވާލައްވަމުން ރައީސް ވިދާޅުވީ، ސިޑްސްގެ ގިނަ ޤައުމުތަކަކީ ބޮޑެތި ދަރަނިތައް މެނޭޖުކުރަމުން މުސްތަގުބަލަށްޓަކައި އިންވެސްޓް ކުރަންޖެހިފައިވާ ނާޒުކު ޤައުމުތަކެއް ކަމަށެވެ. އަދި ދުރު ރާސްތާގެ ހަމަޖެހުމަށް ވިސްނައިގެން ތިބެ، ކުއްލި ޙާލަތްތަކާ ކުރިމަތިލަމުން، އިގުތިސާދީ ކުރިއެރުން ދަމަހައްޓަން ޖެހިފައިވާކަން އެމަނިކުފާނު ފާހަގަކުރެއްވިއެވެ.
Advertisement
ރައީސް ވިދާޅުވީ ރާއްޖެއިންވެސް ބޭރުގެ ފިއްތުންތަކާއެކު، ޤައުމުގެ މުސްތަގުބަލަށް ކުރަންޖެހޭ އިންވެސްޓްމަންޓްތައް ކުރަމުން، ރާއްޖެއިން ދައްކަންޖެހޭ ލޯނުތަކާއި މާލީ އިލްތިޒާމުތައް ކަށަވަރުކުރަމުންދާ ކަމަށެވެ. ރައްޔިތުންނާއި ތަރައްޤީގެ ބައިވެރިން ދައުލަތުގެ މާލިއްޔަތަށް ދޭ ކޮންމެ ފައިސާއަކީވެސް ކަނޑައެޅިފައިވާ މަގުސަދުގައި ހޭދަކުރެވޭ ފައިސާއަކަށް ވާންޖެހޭނެ ކަމަށް ރައީސް ވިދާޅުވިއެވެ.
ރައީސުލްޖުމްހޫރިއްޔާގެ ވާހަކަފުޅުގައި، އަދަށްވުރެ ވިލުންތެރި ދައުލަތްތަކާއި، ހަރުދަނާ ޑިމޮކްރަސީތަކެއް މުސްތަގުބަލުގެ ޖީލުތަކަށް ކަށަވަރުކޮށްދިނުމަށްޓަކައި، ނަޒާހަތްތެރިކަން އިތުރުކޮށް ޖަވާބުދާރީވުން ވަރުގަދަކުރަންޖެހޭ ކަމަށް ވިދާޅުވިއެވެ.
ޙަޤީޤީ ވިލުންތެރިކަމުގެ ބިންގަލަކީ ހަރުދަނާ މުއައްސަސާތައް. ވިލުންތެރިކަން އިތުރުކޮށްދެނީ ޒިންމާދާރުކަމާއެކު މާލީ ކަންކަން ބެލެހެއްޓުމުންނާއި ދެފުށްފެންނަ އުސޫލުތަކުން،
ރައީސް ވިދާޅުވިއެވެ.
އަދި ޖަވާބުދާރީވުމަކީ ހަމައެކަނި ހިންގުމުގެ މަސްއޫލިއްޔަތެއް ނޫންކަމަށާއި، އެއީ ޤައުމު ކުރިއެރުމުގެ އަސާސްކަމަށް އެމަނިކުފާނު ފާހަގަކުރެއްވިއެވެ.
ޖަޒީރާ ޤައުމެއްގެ ގޮތުން ރާއްޖެއަށް ދިމާވާ އިދާރީ އަދި މުވާސަލާތީ ގޮންޖެހުންތަކަށް އޮތް ހައްލަކީ ޑިޖިޓަލް ޓްރާންސްފޮމޭޝަން ކަމަށް ރައީސް ވިދާޅުވިއެވެ. އެގޮތުން، ސަރުކާރުން ފައްޓަވާފައިވާ "މޯލްޑިވްސް 2.0" މަޝްރޫޢުގެ ދަށުން، ޒަމާނީ އަދި ރައްޔިތުންނަށް ލުއިފަސޭހަކަމާއެކު ޚިދުމަތް ލިބޭނެ ޑިޖިޓަލް ދައުލަތެއް ބިނާކުރެވިގެންދާނެ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވިއެވެ.
