ރައްޔިތުން ދައުލަތުގެ މާލިއްޔަތަށް ދޫކޮށްލާ ކޮންމެ ޑޮލަރަކީވެސް، އަދި ތަރައްޤީގެ ބައިވެރިން ފޯރުކޮށްދޭ ކޮންމެ ޑޮލަރަކީވެސް ކަނޑައެޅިފައިވާ މަގުސަދުގައި ހޭދަކުރެވޭ ފައިސާއަށް ވާންޖެހޭނެ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.

ރައީސުލްޖުމްހޫރިއްޔާ މިހެން ވިދާޅުވީ، އއ. އުކުޅަހުގައި ބޭއްވި ސްމޯލް އައިލެންޑް ޑިވެލޮޕިންގ ސްޓޭޓްސް ސުޕްރީމް އޮޑިޓް އިންސްޓިޓިއުޝަންސް (ސިޑްސް-އެސް.އޭ.އައި) ސިމްޕޯޒިއަމް ނިންމުމާއި، އިންޓޮސާއީ ޑިވެލޮޕްމެންޓް އިނީޝިއޭޓިވް (އައި.ޑީ.އައި) ގްލޯބަލް ސަމިޓް ފެށުމުގެ ރަސްމިއްޔާތުގައި ވާހަކަފުޅުދައްކަވަމުންނެވެ.

މި ރަސްމިއްޔާތުގައި ވާހަކަފުޅުދައްކަވަމުން ރައީސް ވިދާޅުވީ، މުސްތަގުބަލުގެ ޖީލުތަކަށް ވިލުންތެރި ދައުލަތްތަކާއި، ހަރުދަނާ ޑިމޮކްރަސީތަކެއް ކަށަވަރުކޮށްދިނުމަށްޓަކައި ނަޒާހަތްތެރިކަން އިތުރުކޮށް، ޖަވާބުދާރީކުރުވުމާއި ދެފުށްފެންނަ އުސޫލުތައް ހަރުދަނާކުރަން ޖެހޭ ކަމަށެވެ. އަދި ޖަވާބުދާރީވުމަކީ ހަމައެކަނި ހިންގުމުގެ މަސްއޫލިއްޔަތެއް ނޫން ކަމަށާއި، އެއީ ގައުމީ އިސްތިރާޖީ މުދަލެއްގެ އިތުރުން ކުރިއެރުމުގެ އިންޖީނު ކަމުގައިވެސް އެމަނިކުފާނު ސިފަކުރެއްވިއެވެ.

ހަގީގީ ވިލުންތެރިކަމުގެ ބިންގަލަކީ ހަރުދަނާ މުއައްސަސާތައްކަން ފާހަގަކުރައްވައި ރައީސް ވިދާޅުވީ، ސަރުކާރަށް ރައްޔިތުން ކުރާ އިތުބާރު ދެމެހެއްޓޭނީ ޒިންމާދާރުކަމާއެކު މާލީ ކަންކަން ބެލެހެއްޓުމުން ކަމަށެވެ. މި މަސައްކަތުގައި ދައުލަތުގެ އުއްތަމަ އޮޑިޓް މުއައްސަސާތަކުގެ ދައުރު އިންތިހާއަށް މުހިންމުކަން އެމަނިކުފާނު ފާހަގަކުރެއްވިއެވެ.

ކުދި ޖަޒީރާ ގައުމުތަކަށް ނުވަތަ 'ސިޑްސް' އަށް ކުރިމަތިވާ ގޮންޖެހުންތަކަށް އަލިއަޅުއްވާލައްވަމުން ރައީސް ވިދާޅުވީ، މިފަދަ ގައުމުތަކަކީ ދަރަނި މެނޭޖުކުރަމުން އިގުތިސާދީ ކުރިއެރުން ދަމަހައްޓަން މަސައްކަތްކުރާ ގައުމުތަކެއް ކަމަށެވެ. އެގޮތުން ބައިނަލްއަގުވާމީ ނުތަނަވަސްކަމާއި ބޭރުގެ ފިއްތުންތަކާއެކުވެސް، ރާއްޖެއިން އަދާކުރަންޖެހޭ މާލީ އިލްތިޒާމުތައް ފުރިހަމައަށް އަދާކުރަމުންދާކަން އެމަނިކުފާނު ކަށަވަރުކޮށްދެއްވިއެވެ.

މީގެ އިތުރުން، ޑިޖިޓަލް ޓްރާންސްފޯމޭޝަނަކީ ކުދި ޖަޒީރާ ގައުމުތަކަށް ކުރިމަތިވާ ޖޯގުރަފީ ގޮންޖެހުންތަކުގެ ހައްލު ކަމުގައި ރައީސް ވިދާޅުވިއެވެ. އެގޮތުން 'މޯލްޑިވްސް 2.0' މެދުވެރިކޮށް ޒަމާނީ ޑިޖިޓަލް ދައުލަތެއް ބިނާކުރުމަށް ސަރުކާރުން ކުރަމުންދާ މަސައްކަތްތައް އެމަނިކުފާނު ފާހަގަކުރެއްވިއެވެ.

މިއަދުގެ ރަސްމިއްޔާތުގައި ރައީސުލްޖުމްހޫރިއްޔާ ވަނީ ދިވެހިރާއްޖޭގެ އޮޑިޓަރ ޖެނެރަލް އޮފީހުގެ 2026-2029 ގެ ސްޓްރެޓީޖިކް ޕްލޭން ވެސް އިފުތިތާހުކޮށްދެއްވާފައެވެ.

އއ. އުކުޅަހުގައި ކުރިއަށްދިޔަ މި ސިމްޕޯޒިއަމްގައި ކުދި ޖަޒީރާ ގައުމުތަކުގެ އުއްތަމަ އޮޑިޓް މުއައްސަސާތަކުގެ އިސްވެރިން ބައިވެރިވެ، ދެމެހެއްޓެނިވި ތަރައްޤީގެ ލަނޑުދަނޑިތަކަށް ވާސިލުވުމަށްޓަކައި ގައުމުތަކުގެ ގާބިލިއްޔަތު އިތުރުކުރެވޭނެ ގޮތްތަކާ މެދު ވަނީ މަޝްވަރާކޮށްފައެވެ.