ކުރެހުމާއި ފޮޓޯގްރަފީގެ ތެރެއިން ޤައުމީ ޖިހާދުތަކުގެ ހަނދާންތައް އާލާކުރެވޭނެ ކަމަށް ފަންނާއި ސަގާފަތާއި ތަރިކައާބެހޭ ވަޒީރު ހީނާ ވަލީދު ވިދާޅުވެއްޖެއެވެ.

ޤައުމީ ދުވަހުގެ މުނާސަބަތުގައި ދިވެހި ބަހާއި ސަގާފަތާއި ތަރިކައާ ބެހޭ ވުޒާރާއިން އިންތިޒާމުކޮށްގެން ބޭއްވި ޚާއްޞަ މައުރަޒު ހުޅުވައިދެއްވުމުގެ ރަސްމިއްޔާތުގައި ވާހަކަފުޅު ދައްކަވަމުން ހިނާ ވިދާޅުވީ، ދިވެހި ތާރީޚުގައި ހިނގާފައިވާ މުހިންމު ހާދިސާތަކާއި، ޤައުމުގެ މިނިވަންކަމަށްޓަކައި ކުރެވުނު ޖިހާދުތައް ކުރެހުމުގެ ޒަރީޢާއިން ސިފަކޮށްދެވޭނެ ކަމަށެވެ. އަދި ފޮޓޯގްރަފީއާއި ކުރެހުންތަކުން ފެންނަ މަންޒަރުތަކަކީ ލިޔެވިފައިވާ ތާރީޚަށްވުރެ ބޮޑަށް އިންސާނާގެ ހިތާއި ސިކުނޑިއަށް އަސަރުކުރުވާ ކަންތައްތަކެއް ކަމަށްވެސް މިނިސްޓަު ވިދާޅުވިއެވެ.

މި މައުރަޒަކީ ދިވެހިރާއްޖޭގެ ޤައުމީ ދުވަހުގެ ޒިކުރާ އާލާކުރުމަށާއި، ބޮޑުތަކުރުފާނުގެ ޖިހާދާއި ދިވެހި ތާރީޚުގެ އެކި މަރުޙަލާތައް ފަންނީ ނަޒަރަކުން ދައްކާލުމަށް ބޭއްވި މައުރަޒެކެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން އިސްކަންދެއްވާ އެއް ދާއިރާއަކީ ދިވެހިވަންތަކަމާއި، ޤައުމީ ތަރިކަ އަދި ސަގާފަތް ދިރުވައި އާލާކުރުންކަން ފާހަގަކުރައްވަމުން، މިނިސްޓަރު ވަނީ މިފަދަ ފަންނީ މަސައްކަތްތަކަށް ހިތްވަރު ދެއްވާފައެވެ.