ވެރިކަން ކުރާ މައި ޕާޓީ، ޕީޕަލްސް ނޭޝަނަލް ކޮންގްރެސް (ޕީއެންސީ) ގެ ނައިބު ރައީސްކަމުގެ މަޤާމަށް ވާދަކުރައްވާނެކަން ރައްޔިތުންގެ މަޖިލީހުގެ ނިލަންދޫ ދާއިރާގެ މެންބަރު ފާޠިމަތު ސައުދާ ރަސްމީކޮށް އިއުލާނުކުރައްވައިފިއެވެ.
ސައުދާ މިއަދު ސޯޝަލް މީޑިއާގައި ކުރެއްވި ޕޯސްޓެއްގައި ވިދާޅުވީ، ކުރިއަށްއޮތް ކޮންގްރެސް ޕާޓީގެ މަޖިލީހުން އިންތިޚާބު ކުރާ ޕާޓީގެ ނައިބުރައީސުންގެ މަޤާމަށް ކުރިމަތިލެއްވުމަށް ޤަސްތުކުރައްވާފައިވާ ކަމަށެވެ. އަދި މި އިންތިޚާބުގައި ޕާޓީގެ އެންމެހައި ލޮބުވެތި މެމްބަރުންގެ ތާޢީދަށް އޭނާ ވަނީ އެދިވަޑައިގެންފައެވެ.
ސައުދާ ޕާޓީގެ މަތީ މަޤާމަކަށް ކުރިމަތިލައްވަން ނިންމެވި ނިންމެވުމާއެކު، ޕީއެންސީގެ އެތެރޭގެ ސިޔާސީ ހަރަކާތްތަކުގެ ފޯރި ވަނީ ގަދަވެފައެވެ. ޕާޓީގެ މުހިއްމު ނިންމުންތައް ނިންމުމުގައާއި ސަރުކާރު ހިންގުމުގެ ސިޔާސަތުތަކަށް އެއްބާރުލުން ދިނުމުގައި ސައުދާއަކީ މިހާރުވެސް ފާހަގަކޮށްލެވޭ ފަދަ އިސް ދައުރެއް އަދާކުރައްވަމުން އަންނަ ބޭފުޅެކެވެ.
Advertisement
މި އިންތިޚާބަކީ ޕާޓީގެ ކުރިމަގާއި ލީޑަޝިޕް ވަރުގަދަކުރުމަށްޓަކައި ބޭއްވޭ މުހިއްމު އިންތިޚާބެއްގެ ގޮތުގައި ޕާޓީގެ އެތެރެއިން ސިފަކުރެއެވެ. ޕީއެންސީގެ ނައިބު ރައީސްކަމުގެ މަޤާމަށް ސައުދާ ކުރިމަތިލެއްވުމަކީ، ޕާޓީގެ މަތީ ލީޑަޝިޕުން އަންހެން ބޭފުޅުންނަށް ސިޔާސީ ގޮތުން ކުރިއަށްދިއުމަށް ލިބިގެންދާނެ ބޮޑު ފުރުޞަތެއްގެ ގޮތުގައި ގިނަ ބަޔަކު ދެކެއެވެ.
ފާޠިމަތު ސައުދާއަކީ 2024 ވަނަ އަހަރު ބޭއްވުނު ރައްޔިތުންގެ މަޖިލީހުގެ އިންތިޚާބުގައި ނިލަންދޫ ދާއިރާގެ ގޮނޑި ކާމިޔާބުކުރައްވައިގެން، މަޖިލީހުގައި ހިމެނިވަޑައިގަންނަވާ މަދު އަންހެން މެންބަރުންގެ ތެރެއިން ބޭފުޅެކެވެ.
މަޖިލީހުގެ ތެރޭގައި ސައުދާ އަންނަނީ ހިއުމަން ރައިޓްސް އެންޑް ޖެންޑާ ކޮމިޓީގެ މުޤައްރިރުގެ މަޤާމުގެ އިތުރުން، އިޖުތިމާޢީ ކަންކަމާއި ލާމަރުކަޒީ ކޮމިޓީގެ މެންބަރެއްގެ ގޮތުގައިވެސް ޤައުމީ ފެންވަރުގައި މުހިއްމު މަސައްކަތްތަކެއް ކުރައްވަމުންނެވެ.
