ކޮންމެ އިންސާނަކީ ވެސް މަރުގެ ރަހަ ލިބިގަންނާނޭ ފަރާތެއްކަން ހަނދުމަކޮށް، ފާފަތަކަށް ތައުބާވެ، އެފަދަ ކަންކަމާ ދުރުހެލިވުމަށް ވަރުގަދަ އަޒުމެއް ކަނޑައެޅުމަށް މިއަދުގެ ހުކުރު ހުތުބާގައި އިލްތިމާސްކުރައްވައިފިއެވެ.

މިއަދު ރާއްޖޭގެ މިސްކިތްތަކުގައި އިއްވި ޚުޠުބާ ބިނާކޮށްފައިވަނީ "ޤިޔާމަތްދުވަހާއި މަޙުޝަރުމައިދާނަށް ތައްޔާރުވާށެވެ!" މި މައުޟޫއުގެ މައްޗަށެވެ.

މިއަދުގެ ހުތުބާގައި ގިޔާމަތް ދުވަހުގެ ބިރުވެރިކަމުގެ މައްޗަށް އަލިއަޅުވާލައްވަމުން ވިދާޅުވީ، އެ ދުވަހުގެ ޒަލްޒަލާއަކީ ބޮޑުވެގެންވާ ކަމެއް ކަމަށެވެ. އެގޮތުން، ކިރުދޭ މައިން އެކުދިންގެ މަތިން ހަނދާންނެތި، މާބަނޑު އަންހެނުން ދަރި ވިހައި، މީސްތަކުން މަސްތުވެފައިވާ ފަދަ ބިރުވެރި ހަލަތެއްގައި ތިބޭނެކަން މާތް ﷲގެ ވަހީ ބަސްފުޅުތަކުން ހަނދާންކޮށްދެއްވިއެވެ.

ހުތުބާގައި ފާހަގަކުރެއްވި ގޮތުގައި، މަހުޝަރު މައިދާނަކީ އެކަކު އަނެކަކަށް އެހީތެރިކަމެއް ފޯރުކޮށްދެވޭނެ ދުވަހެއް ނޫނެވެ. އެންމެ ގާތްމީހުން ކަމުގައިވާ އަހުންނާއި، މައިންބަފައިންނާއި، އަނބިދަރިންގެ ކިބައިން ވެސް އިންސާނާ ފިލަން މަސައްކަތް ކުރާނެއެވެ. އަދި އެ ދުވަހުގެ ބިރުވެރިކަމުން ކުޑަކުދިން މުސްކުޅިންނަށް ހަދާލާނެ ކަމަށާއި، އުޑުތައް އިރައިގެންދާނެ ކަމަށް ވެސް ހުތުބާގައި ބަޔާންކުރެއްވިއެވެ.

މީގެ އިތުރުން، ގިޔާމަތް ދުވަހު މީސްތަކުން ދެބަޔަކަށް ބެހިގެންދާނެކަން ފާހަގަކުރައްވައި ހުތުބާގައި ވިދާޅުވީ، އީމާންވެ ހެޔޮ އަމަލުކުރި މީހުން ތިބޭނީ އުފާވެރިކަމާއި ހިތްހަމަޖެހުމުގައި ކަމަށެވެ. ނަމަވެސް، ކާފިރު ފާޖިރުންގެ މޫނުތަކަށް ކަޅު އަނދިރިކަމާއި ހިރަފުސް ވެރިވެ، ބޮޑުވެގެންވާ ހިތާމައެއްގެ ތެރޭގައި އެމީހުން ވާނެއެވެ

އިންސާނާގެ ގުނަވަންތައް އޭނާގެ އަމަލުތަކަށް ހެކިދޭނެ ދުވަހުގެ މުހިންމުކަން ބަޔާންކުރައްވަމުން ހުތުބާގައި ވިދާޅުވީ، އެ ދުވަހުން އަނގަ ބަންދުކުރެވޭނެ ކަމަށާއި، އަތާއި ފައި އަދި ހަންގަނޑު ވެސް އިންސާނާ ކުޅަ ކަންތައްތަކަށް ހެކިދޭނެ ކަމަށެވެ. އަދި ކޮންމެ މީހެއްގެ ޢަމަލުތައް ހިމެނޭ ފަތް ނިއުޅާލެވޭނެ ކަމަށާއި، ކިތަންމެ ކުޑަ ކަމެއް ވެސް އެ ފަތުން އުނިނުވާނެ ކަމަށް ވިދާޅުވިއެވެ.