މާލޭގެ ވިޔަފާރި ބަނދަރުގެ މަސައްކަތްތައް ހަރުދަނާކޮށް، ތަރުތީބުކުރުމަށް ސަރުކާރުން ކުރިއަށްގެންދާ މަޝްރޫއުގެ ދަށުން، ޕޯޓުގެ މުޅި އޮޕަރޭޝަނުގެ ގާތްގަނޑަކަށް 80 އިންސައްތަ ތިލަފުއްޓަށް ބަދަލުވެގެންދާނެ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު އިއުލާނު ކުރައްވައިފިއެވެ.
ސަރުކާރުން ކުރިއަށްގެންދާ "ނޭޝަން ޗެޓް" ޕްރޮގްރާމްގައި ވާހަކަފުޅު ދައްކަވަމުން ރައީސް ވިދާޅުވީ، ތިލަމާލެ ބުރިޖުގެ މަސައްކަތް ނިމިގެންދާއިރު، ބުރިޖު ގޮސް ނިމޭނީ މާލޭގެ އިންޑަސްޓްރިއަލް ވިލެޖާ ހަމައަށް ކަމަށެވެ. އަދި އިންޑަސްޓްރިއަލް ވިލެޖުގެ އެއްބައި ހާއްސަ ކުރެވޭނީ ޕޯޓުގެ މަސައްކަތްތަކަށް ކަމަށް އެމަނިކުފާނު ފާހަގަކުރެއްވިއެވެ.
މި މަޝްރޫއުގެ ސަބަބުން މާލޭގައި މިހާރު ހިންގަމުން އަންނަ ޕޯޓުގެ ބޮޑު ބައެއް ތިލަފުއްޓަށް ބަދަލުވެގެންދާނެއެވެ. ރައީސް ވިދާޅުވި ގޮތުގައި، މާލެއާއި ތިލަފުއްޓާ ދެމެދު ބުރިޖަކުން ގުޅާލެވުނު ކަމުގައިވިޔަސް، މުދާ އުފުލުމަށްޓަކައި ފެރީ ނިޒާމެއްގެ ތެރެއިން ކޮންޓެއިނާ ރޯރޯ ފެރީތައް ދަތުރުކުރާނެއެވެ. މީގެ ސަބަބުން މުދާ އުފުލުމުގެ ނިޒާމަށް ބޮޑު ލުޔެއް ލިބިގެންދާނެއެވެ.
Advertisement
މީގެ އިތުރުން، މި ބަދަލާއެކު އަމިއްލަ ވިޔަފާރިތަކަށް ނުވަތަ ޕްރައިވެޓް ސެކްޓަރ އަށް ގިނަ ފުރުސަތުތަކެއް ހުޅުވިގެންދާނެ ކަމަށް ރައީސް ވިދާޅުވިއެވެ. އެގޮތުން އިންޑަސްޓްރިއަލް ވިލެޖާއި ތިލަފުށީގައި ފިހާރަތައް ހުޅުވުމުގެ ފުރުސަތު ލިބި، ވިޔަފާރިވެރިންނަށް މުދާ ގުދަންކުރުމާއި ވިއްކުމުގައި ބޮޑެތި ފަސޭހަތަކެއް ލިބިގެންދާނެއެވެ.
ރައީސް އިތުރަށް ވިދާޅުވީ، އަމާޒަކީ އަންނަ އަހަރުގެ ނޮވެމްބަރު މަހުގެ 11 ވަނަ ދުވަހާ ހަމައަށް ޕޯޓުގެ އޮޕަރޭޝަންތައް ތިލަފުއްޓަށް ބަދަލުކޮށް ނިންމުން ކަމަށެވެ. މި މަޝްރޫއާ ގުޅޭ އިތުރު ތަފްސީލީ މައުލޫމާތުތައް ކުރިއަށް އޮތް ތަނުގައި މޯލްޑިވްސް ޕޯޓްސް ލިމިޓެޑް (އެމްޕީއެލް) އާއި އިކޮނޮމިކް މިނިސްޓްރީން ހިއްސާކުރަމުންދާނެ ކަމަށްވެސް ރައީސް ވިދާޅުވިއެވެ.
