ވެލާނާ ބައިނަލްއަޤްވާމީ ވައިގެ ބަނދަރު (ވީ.އައި.އޭ) މެދުވެރިކޮށް ކެމްބޯޑިއާއިން ފޮނުވި ފުރަތަމަ ސީ-ޓު-އެއަރ ޓްރާންސްޝިޕްމަންޓް ކާގޯ ކާމިޔާބުކަމާއެކު މިއަދު ފޮނުވާލައިފިއެވެ. މިއީ ރާއްޖޭގެ މައި އެއަރޕޯޓުން ދޭ ކަނޑާއި ވައިގެ މަގުން މުދާ އުފުލުމުގެ ހިދުމަތް ދެކުނުއިރުމަތީ އޭޝިއާގެ ބާޒާރުތަކަށް ފުޅާވެގެންދިޔަ ތާރީހީ މުހިންމު ކުރިއެރުމެކެވެ.
ކެމްބޯޑިއާއިން ކަނޑުމަގުން ރާއްޖެއަށް ގެނައި މި މުދާތައް، ވެލާނާ އެއަރޕޯޓުގެ ކާގޯ ފެސިލިޓީން ހޭންޑްލްކުރުމަށްފަހު ވައިގެ މަގުން ފޮނުވާލާފައިވަނީ ފްރާންސްގެ ލީލް އަށެވެ.
Advertisement
މީގެ ކުރިން ވެލާނާ އެއަރޕޯޓް މެދުވެރިކޮށް މިފަދަ ސީ-ޓު-އެއަރ ޚިދުމަތްތައް އެންމެ ފުޅާދާއިރާއެއްގައި ހޯދަމުން އައީ ބަންގްލަދޭޝް، އިންޑިއާ އަދި ސްރީލަންކާ ފަދަ އަވަށްޓެރި ގައުމުތަކުންނެވެ. ނަމަވެސް، ކެމްބޯޑިއާ ފަދަ ދެކުނުއިރުމަތީ އޭޝިއާގެ ޤައުމަކުން ފޮނުވި މުދާ ކާމިޔާބުކަމާއެކު މަންޒިލަށް ފޮނުވާލެވުމަކީ، ރާއްޖޭގެ ކާގޯ ހިދުމަތްތަކަށް ބައިނަލްއަގްވާމީ އާ ބާޒާރުތަކުގެ އިތުބާރު ލިބެމުންދާކަމުގެ އަލިގަދަ ހެއްކެކެވެ.
ސީ-ޓު-އެއަރ ޓްރާންސްޝިޕްމަންޓް ހިދުމަތަކީ ހަމައެކަނި ވައިގެ މަގުން މުދާ ފޮނުވުމަށްވުރެ ހަރަދު ކުޑަ، އަދި ހަމައެކަނި ކަނޑުމަގުން މުދާ އުފުލުމަށްވުރެ މާ އަވަސް ނިޒާމެކެވެ. އެހެންކަމުން، މިއީ ވަގުތަށް ސަމާލުކަންދީގެން އަވަހަށް ފޮނުވަންޖެހޭ މުދާ އުފުލާ ފަރާތްތަކަށް އޮތް އެންމެ ފުރިހަމަ ލޮޖިސްޓިކްސް ހައްލެވެ.
މި ކާމިޔާބީއާއެކު، އޭޝިއާއާއި ޔޫރަޕްގެ އިތުރުން ދުނިޔޭގެ އެކި ބާޒާރުތަކާ ގުޅުވައިދޭ ހިންދު ކަނޑުގެ މުހިންމު ލޮޖިސްޓިކްސް މަރުކަޒެއްގެ ގޮތުގައި ވެލާނާ ބައިނަލްއަގްވާމީ ވައިގެ ބަނދަރުގެ ނަން މިހާރު ވަނީ ބައިނަލްއަގްވާމީ މައިދާނުގައި އިތުރަށް ވަރުގަދަވެފައެވެ.
