މިއަދާ ހަމައަށް އައިއިރުވެސް ކޮންމެ ސަރުކާރަކުން ވެސް ރާއްޖޭގެ މައި ޕޯޓު ތަރައްގީ ކުރާނެ ކަމަށް ބުނަމުންދިޔަ ނަމަވެސް، އެކަން އަމަލީ ގޮތުން ތަންފީޒު ކުރެވިފައި ނުވާ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.

މިނިވަން ދުވަހުގެ މުނާސަބަތުގައި ބޭއްވި ރަސްމީ ޖަލްސާގައި ވާހަކަފުޅު ދައްކަވަމުން ރައީސް ވިދާޅުވީ، މާލޭގެ ޕޯޓަކީ އަބަދުވެސް ކޮންމެ ސަރުކާރަކުން އައިސް ދައްކާ ވާހަކައެއް ކަމަށާއި، ނަމަވެސް ދުވަހަކުވެސް އަމަލީ ގޮތުން އެކަން ތަންފީޒު ކުރެވިފައި ނުވާ ކަމަށެވެ. އެމަނިކުފާނު ފާހަގަކުރެއްވި ގޮތުގައި މާލޭ ޕޯޓުގެ ދަތިކަމުގެ ތެރޭގައި ރާއްޖޭގެ މުޅި އިގްތިސާދު އޮތީ ތާށިވެފައެވެ.

"ތިލަފުއްޓަށް ބަދަލުކުރާނަމޭ، މާދަން ކުރަނީއޭ، މިއަންނަ އަހަރު ކުރާނަމޭ، އެހެން ނަމަވެސް އަޅުގަނޑުމެން މިއޮތީ އެކަން ކުރަން ނިންމާފަ ފަށާފަ އެ މަސައްކަތް. އިރާދަކުރެއްވިއްޔާ މިއަންނަ އަހަރުގެ ނޮވެމްބަރު މަހުގެ 11 ވަނަ ދުވަހަކީ މާލޭގެ މިއޮތް ޕޯޓު އެކީ އެކަށްޗަކަށް ތިލަފުއްޓަށް ބަދަލުކުރެވި، މިހާރު މާލޭގަ މިއޮތް ކަސްތޮޅުން މިނިވަންކޮށްދީ ޕޯޓު ބޮޑުކޮށް ރާއްޖޭގެ އިގްތިސޯދު ފުޅާވެގެންދާ ދުވަސް"

ރައީސުލްޖުމްހޫރިއްޔާ ޑރ. މުހައްމަދު މުއިއްޒު

ރައީސް ވިދާޅުވީ މިހާރު މި ރާއްޖޭގައި މި ސަރުކާރުން ހިންގާ އެންމެ އިސްކަންދޭ އަދި އެންމެ މުހިންމު މަޝްރޫއަކީ މާލޭގެ ޕޯޓު ތިލަފުއްޓަށް ބަދަލުކުރުމުގެ މަޝްރޫއު ކަމަށެވެ. އަދި މި މަޝްރޫއަކީ އިގްތިސާދީ ގޮތުން ރާއްޖެއަށް ލިބޭނެ ބޮޑު ކުރިއެރުމެއްކަން އެމަނިކުފާނު ފާހަގަކުރެއްވިއެވެ.

މީގެ އިތުރުން، ތިލަފުށީގައި ގާއިމުކުރާ މި ޕޯޓަކީ ހުރިހާ ގޮތަކުންވެސް ދިވެހި ސަރުކާރުގެ 100 އިންސައްތަ ކޮންޓްރޯލް އޮންނާނެ ތަނެއް ކަމަށް ރައީސް ވިދާޅުވިއެވެ. އެ މަޝްރޫއުގައި އެހެން އެއްވެސް ބޭރުގެ ފަރާތެއްގެ ނުވަތަ އަމިއްލަ ފަރާތެއްގެ ހިއްސާއެއް ނޯންނާނެ ކަމުގެ ޔަގީންކަން ރައީސް މުއިއްޒު ވަނީ ދެއްވާފައެވެ.