މެދުއިރުމަތީގައި މިހާރު ހިނގަމުންދާ ހަނގުރާމައާ ގުޅިގެން ދުނިޔޭގެ އިގްތިސާދަށް އަންނަ ބަދަލުތަކާއެކު، ރާއްޖޭގެ ފަތުރުވެރިކަމާއި އިގްތިސާދީ ސިޔާސަތުތައް ބައްޓަން ކުރަމުންދަނީ އެ ހަނގުރާމައަކީ ދާއިމަށް ކުރިއަށްދާނެ ކަމަކަށް ބަލައިގެން ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.
މިއަހަރުގެ މިނިވަން ދުވަހުގެ މުނާސަބަތުގައި ބޭއްވި ރަސްމީ ޖަލްސާގައި ވާހަކަފުޅު ދައްކަވަމުން ރައީސް މުއިއްޒު ވިދާޅުވީ، މެދުއިރުމަތީގެ ހަމަނުޖެހުންތަކުގެ ސަބަބުން ރާއްޖޭގެ ސިނާއަތްތަކުގެ ތެރެއިން އެންމެ ބޮޑު އަސަރެއް ކުރީ ފަތުރުވެރިކަމުގެ ދާއިރާއަށް ކަމަށެވެ. އެހެންކަމުން، އިގްތިސާދީ ހީނަރުކަމުން އަރައިގަތުމަށް ސަރުކާރުން ކުރާ މަސައްކަތްތައް ރާވަމުންދަނީ މި ނުތަނަވަސްކަން ދިގުލައިގެންދާނެ ކަމަށް ބަލައިގެން، އެފަދަ ހާލަތަކަށް ތައްޔާރުވެ ތިބެގެން ކަމަށް އެމަނިކުފާނު ފާހަގަކުރެއްވިއެވެ.
ރައީސް ވިދާޅުވި ގޮތުގައި، ހަމައެކަނި ފަތުރުވެރިކަމެއް ނޫނެވެ. ރާއްޖޭގެ އެހެނިހެން ސިނާއަތްތައް ވެސް މި ހަނގުރާމައާ ގުޅިގެން ވެއްޓުނަ ނުދީ ހިފެހެއްޓުމަށްޓަކައި ކުރަންޖެހޭ ހުރިހާ މަސައްކަތްތަކެއް ސަރުކާރުން ދަނީ ކުރަމުންނެވެ.
Advertisement
މީގެ އިތުރުން، އިގްތިސާދީ މިނިވަންކަމުގެ މައްޗަށް އަލިއަޅުވާލައްވަމުން ރައީސް ވިދާޅުވީ، އެމަނިކުފާނު ސަރުކާރާ ހަވާލުވިއިރު ގައުމުގެ އިގްތިސާދު އޮތީ ވަރަށް ބޮޑު އަނދަވަޅެއްގެ ތެރޭގައި ކަމަށާއި، އިގްތިސާދު އޮތީ ބޭރުގެ ނުފޫޒުތަކަށް "އަޅުވެތިވެފައި" ކަމަށެވެ. ނަމަވެސް ވޭތުވެދިޔަ ކުޑަ ދުވަސްކޮޅުގެ ތެރޭގައި އެ އަޅުވެތިކަމުން ގައުމު ސަލާމަތްކުރުމަށް ގިނަ ގުނަ މަސައްކަތްތަކެއް ކުރެވިފައިވާ ކަމަށް އެމަނިކުފާނު ވިދާޅުވިއެވެ.
އެގޮތުން، ދައުލަތުން ދައްކަންޖެހޭ ސުކޫކްތައް ދައްކައި ނިންމާ، އެތައް ބިލިއަން ރުފިޔާގެ ލޯނު ދައްކާފައިވާކަން ރައީސް ފާހަގަކުރެއްވިއެވެ. އަދި ރާއްޖޭގެ ބައެއް ހަރުމުދާތައް ރަހުނުކޮށްފައި އޮތް އޮތުން ނިމުމަކަށް ގެނެސް، އެ މުދާތައް މިނިވަންކޮށްފައިވާ ކަމަށްވެސް ވިދާޅުވިއެވެ.
"ސުކޫކް ދައްކާ ނިންމާ، އަދި އެތައް ލޯނެއް އަޅުގަނޑުމެން ދެއްކީމު، އަޅުގަނޑުމެންގެ ހަރު މުދާތައްވެސް މިނިވަންކޮށްފަ؛ ދަރުމަވަންތަ ހޮސްޕިޓަލާއި މިފަދަ ތަންތަން އަޅުވެތިކަމުން މިނިވަންކޮށް އަޅުގަނޑުމެންގެ އިގްތިސާދު ހަރުދަނާކުރުމުގެ މަސައްކަތް އަޅުގަނޑުމެން ކުރަމުން މިގެންދަނީ،"
ރައީސުލްޖުމްހޫރިއްޔާ ޑރ. މުހައްމަދު މުއިއްޒު
ރައީސް މުއިއްޒުގެ ވާހަކަފުޅުގައި ބޭރުގެ ދަރަނިތަކުން ގައުމު ސަލާމަތްކޮށް، އަމިއްލަ ފައިމައްޗަށް ތެދުވެފައިވާ އިގްތިސާދެއް ބިނާކުރުމަކީ މި ސަރުކާރުގެ އެންމެ މުހިންމު އަމާޒުކަން ތަކުރާރުކޮށް ފާހަގަކުރެއްވިއެވެ.
