ނޭޝަނަލް އެލިޖިބިލިޓީ ކަމް އެންޓްރެންސް ޓެސްޓް (އެންއީއީޓީ) ގެ ޕޭޕަރުތައް ލީކުވުމާއި ގުޅިގެން އިންޑިއާގެ "ކޮކްރޯޗް ޖަންތާ ޕާޓީ" (ސީޖޭޕީ) އާއި އެކި ދަރިވަރުންގެ ޖަމްއިއްޔާތައް ގުޅިގެން ކުރިއަށްގެންދާ މުޒާހަރާތަކަށް މިއަދަށް 49 ދުވަސް ވެފައި ވާއިރު، އެމީހުންގެ ޕްރެޝަރާއި ހެދި އިންޑިއާގެ އެޑިއުކޭޝަން މިނިސްޓަރު ދަރުމެންދުރާ ޕްރަދާން މަގާމުން އިސްތިއުފާ ދެއްވައިފިއެވެ.

މި މުޒަހަރާގައި މިހާތަނަށް 400 އަށް ވުރެ ގިނަ މީހުން ޒަހަމް ވެސް ވެއްޖެއެވެ. އޭގެތެރޭގައި 118 ފުލުހުން ވެސް ހިމެނެއެވެ.

ހުސްވި މަހުގެ 6 ވަނަ ދުވަހު ރަސްމި ކޮށް ފެށި މި މުޒާހަރާގެ ތެރެއިން ފުލުހުންގެ އަނިޔާތަކުގެ ސަބަބުން 14 އަހަރުގެ އަންހެން ކުއްޖަކު މަރުވި ކަމުގެ ރިޕޯޓްތައް ލިބިފައިވެއެވެ. މީގެ އިތުރުން، އެގްޒާމް ޕޭޕަރު ލީކުވުމުގެ ހާސްކަމާއި ފިއްތުންތަކުގެ ސަބަބުން 12 އަށްވުރެ ގިނަ ދަރިވަރުން އަމިއްލައަށް މަރުވެފައިވެއެވެ.

ސޯޝަލް މީޑިއާގައި ދައުރުވަމުންދާ ވީޑިއޯތަކުން ފެންނަ ގޮތުގައި، ރިޓަޔާކޮށްފައިވާ ސިފައިންގެ ބައެއް އިސް ބޭފުޅުންނާއި، މިހާރުވެސް ޚިދުމަތުގައި ތިބި ބައެއް ފުލުހުންގެ އާއިލާތަކުން ވަނީ މުޒާހަރާގެ ސަފުތަކާއި ގުޅި، ދަރިވަރުންނަށް ބޭނުންވާ ފެނާއި، ކާބޯތަކެތި އަދި ފުރަތަމަ އެހީގެ ސާމާނު ފޯރުކޮށްދިނުމުގައި އަމަލީގޮތުން ބައިވެރިވާން ފަށާފައެވެ. މިއީ މި މުޒާހަރާ އިތުރަށް ވަރުގަދަވެ، ސަރުކާރަށް ކުރިމަތިވެފައިވާ ފިއްތުންތައް ބޮޑުވަމުންދާކަމުގެ ހެއްކެކެވެ.