އަންނަ ދިރާސީ އާ އަހަރަށް ސަރުކާރުގެ ސްކޫލްތަކަށް ކުދިން ވެއްދުމުގެ ފުރުސަތު މިނިސްޓްރީ އޮފް އެޑިއުކޭޝަނުން ރަސްމީކޮށް ހުޅުވާލައިފި އެވެ. މި ފުރުސަތު ހުޅުވާލާފައިވަނީ އިއްޔެ އިން ފެށިގެން އަންނަ އޮގަސްޓް މަހުގެ 31 ވަނަ ދުވަހުގެ ނިޔަލަށެވެ.

އެޑިއުކޭޝަން މިނިސްޓްރީން ބުނީ ސުންގަޑީގެ ކުރިން ހުރިހާ ބެލެނިވެރިންވެސް ފޯމުތައް ހުށަހަޅަން ސަމާލުކަން ދޭންޖެހޭނެ ކަމަށެވެ.

ގްރޭޓަރ މާލެ ސަރަހައްދުގެ (މާލެ، ހުޅުމާލެ، ވިލިމާލެ) ސްކޫލްތަކަށް ކުދިން ވެއްދުމަށް އެދި ހުށަހަޅަންޖެހެނީ އެޑިއުކޭޝަން މިނިސްޓްރީގެ އޮންލައިން ޕޯޓަލް މެދުވެރިކޮށެވެ. ނަމަވެސް އަތޮޅުތެރޭގެ ރަށްރަށުގެ ސްކޫލްތަކަށް ވަންނަން އެދޭ ފޯމު ދޫކުރުމާއި ފޯމު ބަލައިގަތުމުގެ ކަންތައްތައް ކުރިއަށްދާނީ ސީދާ އެ ރަށެއްގެ ސްކޫލްތަކުންނެވެ.

މިނިސްޓްރީން ހާމަކުރި ގޮތުގައި ފޯމު ހުށަހަޅާއިރު ކުއްޖާގެ އައިޑީ ކާޑުގެ ކޮޕީއާއި، ބެލެނިވެރިޔާގެ އައިޑީ ކާޑު ކޮޕީގެ އިތުރުން ވެކްސިން ކާޑުގެ ކޮޕީ ހުށަހަޅަންޖެހެއެވެ. އަދި އެލްކޭޖީ އަށް އަލަށް ވަންނަ ކުދިންނަށް ޚާއްސަ "ޑިވެލޮޕްމަންޓަލް މައިލްސްޓޯން ޓްރެކިންގ ފޯމް" ވެސް ފޯމާއެކު ހުށަހަޅަންޖެހޭނެ ކަމަށް އެޑިއުކޭޝަނުން މައުލޫމާތުދެއެވެ.

ފޯމު ފުރުއްވާއިރު ބެލެނިވެރިޔާގެ ފޯނު ނަންބަރާއި އީމެއިލް އެޑްރެސް ފަދަ މައުލޫމާތުތައް ސައްހަކޮށް ލިޔުމަށް މިނިސްޓްރީން އިލްތިމާސްކުރެއެވެ. ސަބަބަކީ ކުރިއަށް އޮތް ތަނުގައި ސްކޫލް ހަމަޖެހުނުކަމުގެ ލިޔުމާއި، ކުއްޖާއާ ގުޅޭ ހުރިހާ މުހިންމު މައުލޫމާތެއް ހިއްސާކުރެވޭނީ ފޯމުގައި ހިމަނާ ފޯނު ނަންބާއި އީމެއިލް މެދުވެރިކޮށް ކަމަށްވާތީއެވެ.