ފުރިހަމަ މުސްލިމުންނަކީ ތިމާގެ އަމިއްލަ ފައިދާއާއި މަޞްލަޙަތަށް ވުރެ، އަނެކުންގެ މަޞްލަޙަތަށް އިސްކަންދޭ މީހުން ކަމަށް މިއަދުގެ ހުކުރު ޚުޠުބާގައި ބަޔާންކޮށްފިއެވެ. ރާއްޖޭގެ އެކި ކަންކޮޅުތަކުގައި މިއަދު އިއްވި ޚުޠުބާ ބިނާކޮށްފައިވަނީ މަސްއޫލިއްޔަތު އަދާކުރުމާއި، މުޖުތަމަޢުގެ މަޞްލަޙަތު އިސްކުރުމުގެ މައްޗަށެވެ.

މިއަދުގެ ޚުޠުބާގައި ބަޔާންކުރި ގޮތުގައި، މުޖުތަމަޢުގެ އެއްބައިވަންތަކަމާއި ވަޙުދަތު ރައްކާތެރިކޮށް ދެމެހެއްޓުމީ ކޮންމެ މުސްލިމެއްގެ ދީނީ އަދި ޤައުމީ ވާޖިބެކެވެ. އަދި ކޮންމެ މީހަކީ ވެސް އެ މީހެއްގެ ބެލެހެއްޓުމުގެ ދަށުގައިވާ ކަންކަމާ މެދު ޒިންމާވާންޖެހޭނެ ބެލެހެއްޓުންތެރިއެއްކަން ރަސޫލާގެ ޙަދީޘްފުޅުތަކުން ހަނދާންކޮށްދީފައިވެއެވެ.

ޚުޠުބާގައި ބަޔާންކުރި ގޮތުގައި، ދުނިޔޭގައި ކުރާ ކޮންމެ ޢަމަލަކަށް މާތް اللهގެ ޙަޟުރަތުގައި ޖަވާބުދާރީވާން ޖެހޭނެއެވެ. ވަކީން ޚާއްޞަކޮށް، އެކި ފެންވަރުގެ މަސްއޫލިއްޔަތުތަކާއި ވަޒީފާތަކާ ޙަވާލުވެތިބި މީހުން، އެބައިމީހުންގެ ޢަހުދުތަކާއި ހުވާތަކަށް ޙުރުމަތްތެރިކޮށްހިތި މިންވަރާ މެދު ޤިޔާމަތް ދުވަހުން ސުވާލުވެވޭނެކަން ޚުޠުބާގައި ހަނދާންކޮށްދިނެވެ. އެ ދުވަހަކީ މުދަލެއް ނުވަތަ ދަރީންނެއްގެ މަންފާއެއް ކުރާނޭ ދުވަހެއް ނޫން ކަމާއި، ހަމައެކަނި މަންފާކުރާނީ ތިމާ ކުރި ހެޔޮ ޢަމަލަކުންކަން ފާހަގަކުރިއެވެ.

މުޖުތަމަޢުގެ ކުރިއެރުމާއި ތަރައްޤީ ބިނާވެގެންވަނީ ޢަދުލުއިންޞާފުގެ މައްޗަށް ކަމަށް ޚުޠުބާގައި ބުންޏެވެ. ޢަދުލުއިންޞާފުގެ ކުރިމަތީގައި އެންމެންނަކީ ހަމަހަމަ ބައެއްކަން ބަޔާންކޮށްދިނުމުގެ ގޮތުން، ރަސޫލު الله ﷺ ގެ ދަރިކަނބަލުން ފާޠިމަތުގެފާނު ވައްކަމެއް ކުރެއްވި ކަމުގައި ވިޔަސް، އެކަމަނާގެ މައްޗަށް ޝަރުޢީ ޙައްދު ޤާއިމުކުރައްވާނެ ކަމަށް ޙަދީޘްކުރެއްވި ބަސްފުޅު ޚުޠުބާގައި ގެނެސްދީފައިވެއެވެ.

މީގެ އިތުރުން، އަދާކުރާ ވަޒީފާއާއި މަސްއޫލިއްޔަތަކީ އަމާނާތެއް ކަމަށާއި، އަމިއްލަ ނަފުސަށް ލޯބިކުރާ ކަންތައް ތިމާގެ އަޚާއަށް ލިބުމަށް ލޯބިކޮށްފުމަށްދާންދެން މީހެއްގެ އީމާންކަން ފުރިހަމަ ނުވާނެ ކަމަށް ޚުޠުބާގައި ބުންޏެވެ. ޚުޠުބާ ނިންމާލަމުން ވަނީ، ޤައުމުގެ ވަޙުދަތު ދެމެހެއްޓުމަށްޓަކައި ދެކޮޅުވެރިކަމާއި އަރައިރުންތަކުން ދުރުހެލިވެ، އަމާނާތްތަކަށް ޚިޔާނާތްތެރިނުވުމަށް އެންމެހައި މުސްލިމުންނަށް ގޮވާލާފައެވެ.