އިސްރާއީލުގެ އިސްތިއުމާރީ ބާރުތަކުން ހުޅަނގު އައްސޭރީގެ އިރުމަތީގެ ގެތައް ތަޅަން ފަށައިފިއެވެ. މިއަދު ހެނދުނުހެނދުނާ ސަޢީރު އަވަށުގައި ހުރި ފަލަސްޠީނު މީހެއްގެ ދެ ބުރީގެ ގެއެއް މިހާރު ވަނީ ތަޅައި ސުންނާފަތިކޮށްލާފައެވެ.

އިސްރާއީލުން މި ގެ ތަޅާލަމުން ބުނެފައި ވަނީ އިސްރާއީލުގެ ސަރުކާރުގެ ސަރުކާރުގެ ހުއްދަ ނެތި އެތަނުގައި ފަލަސްތީނުގެ މުސްލިމުންނަށް އެއްވެސް އިމާރާތެއް ބިނާ ނުކުރެވޭނެ ކަމަށެވެ.

އެ އަވަށުގެ ލޯކަލް މަޞްދަރުތަކުން ރިޕޯޓްކޮށްފައިވާ ގޮތުގައި، ބުލްޑޯޒަރުތަކާއެކު އިޒުރޭލު އަސްކަރީ ވެހިކަލްތައް ބޭނުންކޮށްގެން ތަޅާލި މި އިމާރާތަކީ ގާތްގަނޑަކަށް 300 އަކަމީޓަރުގެ ބޮޑު މިލްކިއްޔާތެކެވެ. އެ ގޭގައި ދިރިއުޅެމުންދިޔަ ފަލަސްޠީނުގެ ޢާއިލާ މިހާރު ވަނީ މަގުމަތިވެފައެވެ.

ހިބްރޫން ސަރަޙައްދުގައި ފަލަސްޠީނު ރައްޔިތުންގެ ގެދޮރު ތަޅާލުން ވަނީ ފަހަކަށް އައިސް ވަރަށް ބޮޑަށް އިތުރުވެފައެވެ. އިއްޔެވެސް ބައިތު އައްވާ ސަރަޙައްދުން އިތުރު ގެއެއް ތަޅާލާފައިވާއިރު، މިއަދުވެސް ހިބްރުންގެ އެކި ސަރަޙައްދުތަކުގައި އިސްރާއީލުގެ ވަޒަންވެރިން ގެންދަނީ ފަލަސްޠީނުގެ އާންމުންނަށް ޙަމަލާދީ، ފެންވަޅުތައް ވެސް އަތުލަމުންނެވެ.

ބައިނަލްއަޤްވާމީ އިންސާނީ ޙައްޤުތަކާ ބެހޭ ޖަމްޢިއްޔާތަކުންނާއި ފަލަސްޠީނުގެ ރަސްމީ އިދާރާތަކުން ބުނާ ގޮތުގައި، އިސްރާއީލުން ހުއްދަ ނެތްކަމަށް ބުނެ ގެދޮރު ތަޅާލަނީ ފަލަސްޠީނުގެ ބިންތަކުން އެމީހުން ބޭރުކޮށް، ޔަހޫދީ ވަޒަންވެރިންނަށް ޖާގަ ހެދުމުގެ ސިޔާސަތެއްގެ ދަށުންނެވެ. ހަތަރުވަނަ ޖެނީވާ ކޮންވެންޝަނާ ޚިލާފަށް ހިންގާ މިފަދަ ޢަމަލުތަކުގެ ސަބަބުން ހުޅަނގު އައްސޭރީގެ މަސްރަޙު ވަނީ ނުހަނު ބޮޑަށް ނުތަނަވަސްވެފައެވެ.