ދިވެހިރާއްޖެއަށް 1.5 ކިލޯއަށްވުރެ ގިނަ މަސްތުވާތަކެތި އެތެރެކުރުމުގެ މައްސަލައެއްގައި އިސްކޮށް ހަރަކާތްތެރިވި ކަމަށް ތުހުމަތުކުރެވޭ އާމިނަތު ރޫނާ، ޝަރީއަތް ނިމެންދެން ބަންދުކުރުމަށް ކްރިމިނަލް ކޯޓުން އަމުރުކޮށްފި އެވެ.
މި މައްސަލައަކީ މިދިޔަ އޭޕްރިލް މަހުގެ 17 ވަނަ ދުވަހުގެރޭ ވެލާނާ އިންޓަނޭޝަނަލް އެއާޕޯޓުންނާއި ހުޅުމާލެއިން ފުލުހުން ހިންގި ހާއްސަ އޮޕަރޭޝަނެއްގައި ފަޅާ އަރުވާލި މައްސަލައެކެވެ. މި އޮޕަރޭޝަންގައި ރޫނާގެ އިތުރުން ގ. މުތީގެއާގެ، އަލްޔާ ޝަރްސާ ނަސީރު (25އ) ވެސް ވަނީ ހައްޔަރުކޮށްފަ އެވެ.
ރޫނާ ހައްޔަރުކުރުމަށްފަހު ބަންދުގެ މުއްދަތާމެދު ގޮތެއް ނިންމުމަށް އެންމެ ފުރަތަމަ ކޯޓަށް ހާޒިރުކުރުމުން، ކޯޓުން ވަނީ އޭނާ 15 ދުވަހަށް ބަންދުކުރުމަށް އަމުރުކޮށްފަ އެވެ. ނަމަވެސް، އިއްޔެ އަނެއްކާވެސް އޭނާ ކޯޓަށް ހާޒިރުކުރުމުން ކްރިމިނަލް ކޯޓުން ވަނީ ޝަރީއަތް ނިމެންދެން އޭނާ ބަންދުގައި ބެހެއްޓުމަށް އަމުރު ކޮށްފަ އެވެ.
Advertisement
ފުލުހުންގެ ތަހުގީގާ ހަވާލާދީ ކޯޓު އަމުރުގައި ބަޔާންކޮށްފައިވާ ގޮތުގައި، މި މަސްތުވާތަކެތި ރާއްޖެ އެތެރެކުރުމުގެ މުޅި މުއާމަލާތުގައި އެންމެ އިސްކޮށް ހަރަކާތްތެރިވެފައިވަނީ ރޫނާ އެވެ. އޭނާގެ އިރުޝާދުގެ ދަށުން ރާއްޖެއިން ބޭރަށް ދަތުރުކުރި މީހަކު ގެނައި ލަގެޖެއްގެ ތެރެއިން 1.5 ކިލޯގެ މަސްތުވާތަކެތި ފެނިފައިވާ ކަމަށް ފުލުހުން ތުހުމަތުކުރި އެވެ. މީގެ އިތުރުން، ރޫނާ ދިރިއުޅޭ ގެއިން ފެނުނު ލަގެޖެއްގައި ހުރި ތަކެއްޗާއި، ފުލުހުން ހިންގި 'ކޮންޓްރޯލް ޑެލިވަރީ' އޮޕަރޭޝަންގައި ބޭނުންކުރި ފޮށީގައި ހުރި ތަކެތި އެއްގޮތްކަން ފުލުހުން ވަނީ ފާހަގަކޮށްފަ އެވެ.
މި މައްސަލައިގައި ދެން ހައްޔަރުކުރި އަލްޔާގެ ޓްރެވަލް ހިސްޓްރީއަށް ބަލާއިރު، އޭނާއަކީ ކައިރިކައިރީގައި ރާއްޖެއިން ބޭރަށް ދަތުރުކުރާ މީހެއްކަން އެނގެން އޮތް ކަމަށް ކޯޓުން ބުނެފައިވެ އެވެ. އަދި އޭނާގެ ފޯނުންވެސް މި މައްސަލައާ ގުޅުންހުރި މުހިންމު ހެކިތަކެއް ފެނިފައިވާ ކަމަށް ފުލުހުން ބުންޏެވެ. ނަމަވެސް، އަލްޔާއަކީ ޑިޕްރެޝަނަށް ފަރުވާ ހޯދަމުންދާ މީހަކަށްވާތީ، އޭނާއަށް ބޭނުންވާ ސިއްހީ އެހީތެރިކަން ފޯރުކޮށްދިނުމަށް ކޯޓުން ވަނީ ފުލުހުންގެ މައްޗަށް އަމުރުކޮށްފަ އެވެ.
މި ދެ މީހުންގެ މައްޗަށްވެސް ފުލުހުން ކުރަނީ ރާއްޖެއަށް މަސްތުވާތަކެތި އެތެރެކުރުމާއި، އެ ތަކެތި ބޭނުންކޮށް، ގެންގުޅެ، އަދި ވިޔަފާރިކޮށް ޓްރެފިކް ކުރިކަމުގެ ސީރިއަސް ތުހުމަތުތަކެކެވެ. ފުލުހުން ފުރަތަމަ ލަފާކުރި ގޮތުގައި މި ތަކެތީގެ ބަރުދަނުގައި 1.820 ކިލޯގްރާމް ހުއްޓެވެ. ނަމަވެސް، ފަހުން ކުރި ތަހުގީގުން އެއީ 1.5 ކިލޯކަން ވަނީ ކަށަވަރުކޮށްފަ އެވެ.
ކޯޓުގައި ރޫނާގެ ފަރާތުން ދިފާއުގައި އެދިފައިވަނީ، ފުލުހުން އޭނާ ހައްޔަރުކުރި ވަގުތު ހަރަކާތްތެރިވި ފުލުހުންގެ ބޮޑީ ކެމެރާ ރެކޯޑިންތައް ހޯދައިދިނުމަށެވެ. ފުލުހުން މިހާރު ދަނީ މި މައްސަލައިގެ އިތުރު ތަހުގީގުތައް ކުރިއަށް ގެންދަމުންނެވެ.
