އީރާނުގެ އިސްލާމިކް ރިވޮލިއުޝަނަރީ ގާޑް ކޯޕްސް (އައިއާރްޖީސީ) އިން އުރުދުންގައި ހުންނަ، އެމެރިކާ ސިފައިން ބޭނުންކުރާ މުއައްފަޤު އައްސަލްތީ އެއާ ބޭހަށް އަމާޒުކޮށް ބެލިސްޓިކް މިސައިލާއި ޑްރޯންގެ ވަރުގަދަ ހަމަލާތަކެއް ދީފިއެވެ.

މި ހަމަލާތަކުގައި އެމެރިކާގެ ބައެއް ސިފައިންނަށް ބޮޑެތި އަނިޔާވެ ޒަހަމް ވެފައި ވެއެވެ. ނަމަވެސް މި ހަމަލާގައި އެއްވެސް މީހަކު މަރުވިކަމެއް ނުވަތަ ލިބުނު އަނިޔާތަކުގެ ތަފްސީލެއް ރަސްމީ އިދާރާތަކުން އަދި ކަށަވަރުކޮށްދީފައެއް ނުވެއެވެ.

މި ހަމަލާ އާއި ގުޅޭގޮތުން އީރާނުގެ މީޑިއާތަކުން ބުނަނީ އެގައުމުގެ 'ޚައިބަރު-ޝަކަން' މަރުކާގެ ބެލިސްޓިކް މިސައިލްތައް އެމެރިކާގެ ވައިގެ ދިފާއީ ނިޒާމުތައް ފޫއަޅުވާލުމަށްފަހު ބޭހަށް އަރާފައިވާ ކަމަށެވެ. އަދި މި ހަމަލާގައި އެމެރިކާގެ ހަނގުރާމަމަތީ ބޯޓުތައް ބަހައްޓާ ކޮމާންޑް ސެންޓަރަށާއި ބަންކަރު ތަކަށް ބޮޑެތި ގެއްލުންތަކެއް ލިބިފައިވާ ކަމަށް އައިއާރްޖީސީން ބުނެއެވެ.

އެމެރިކާގެ އަސްކަރީ މަރުކަޒުތަކަށް އަމާޒުކޮށް އީރާނުން ދެމުންދާ ހަމަލާތައް ވަރުގަދަކޮށްފައި ވާއިރު، އެމެރިކާ އިން ދަނީ އީރާނަށް ހަމަލާ ދިނުމަށް އިތުރު ވައިގެ އުޅނދުތައް ގެންނަން ރާވަމުން ކަމަށް ވެސް ހަބަރުތައް ބުނެއެވެ.