އިސްރާއީލުގެ ޔަހޫދީ ސިފައިން އިއްޔެއިން ފެށިގެން މިވަގުތާއި ހަމަޔަށް ޣައްޒާގެ އެކި ސަރަހައްދުތަކަށް ދެމުން ގެންދާ ރަހުމުކުޑަ ވައިގެ ހަމަލާތަކާއި ބަޑީގެ ހަމަލާތަކުގައި ފަލަސްޠީނުގެ 19 މީހަކު ޝަހީދުކޮށް، 60 އަށްވުރެ ގިނަ މީހުން ޒަހަމްކޮށްލައިފިއެވެ. ޣައްޒާގެ ސިއްހީ ވުޒާރާއިން ހާމަކޮށްފައިވާ ގޮތުގައި، ޔަހޫދީންގެ ހަމަލާތައް އެންމެ ބޮޑަށް އަމާޒުވެފައިވަނީ ޣައްޒާ ސިޓީގެ އައްނަޞްރު އަދި ޒައިތޫން އަވަށުގެ އިތުރުން މެދުތެރޭ ޣައްޒާގައި ހުންނަ ނުސީރާތު ރެފިއުޖީ ކޭމްޕަށެވެ. ޝަހީދުވި މީހުންގެ ތެރޭގައި ގިނަ އަދަދެއްގެ އަންހެނުންނާއި ކުޑަކުދިން ހިމެނޭއިރު، ޒަހަމްވި މީހުންގެ ތެރެއިން ގިނަ ބައެއްގެ ހާލު ވަރަށް ސީރިއަސްއެވެ.

ސިއްހީ އިދާރާތަކުން ބުނާގޮތުގައި، މިއަދު ހޮސްޕިޓަލްތަކަށް ގެންދެވުނު ހަށިގަނޑުތަކުގެ ތެރޭގައި ފާއިތުވި 24 ގަޑިއިރުގެ ތެރޭގައި ދެވުނު އާ ހަމަލާތަކުގައި ޝަހީދުވި މީހުންގެ އިތުރުން، ކުރީގެ ހަމަލާތަކުގައި ލިބުނު އަނިޔާތަކަށް ފަރުވާ ދެމުންދަނިކޮށް ޝަހީދުވި މީހުންނާއި، ޔަހޫދީން ސުންނާފަތިކޮށްލާފައިވާ އިމާރާތްތަކުގެ ކުނިތަކުގެ ދަށުން އަލަށް ފެނުނު މީހުންގެ ހަށިގަނޑުތައްވެސް ހިމެނެއެވެ. ޣައްޒާގެ ހޮސްޕިޓަލްތަކުން ބޭހާއި މެޑިކަލް ސާމާނު ހުސްވަމުންދާތީ، ޒަހަމްވި 60 މީހުންނަށް ފުރާނަ ސަލާމަތްކުރެވޭފަދަ އެކަށީގެންވާ ފަރުވާއެއް ދިނުމަށް ވަނީ ވަރަށް ބޮޑަށް ހުރަސްއެޅިފައެވެ.

2023 އޮކްޓޯބަރު 7 އިން ފެށިގެން އިސްރާއީލުން ހިންގަމުންދާ ލޭއޮހޮރުވުން ބޮޑު ގަތުލުއާންމުގައި މިހާތަނަށް ޣައްޒާއިން 1 ލައްކަ އަށް ވުރެ ގިނަ މީހުން ވަނީ ޝަހީދުވެފައި ކަމަށް ހަމާސް އިން ބުނެއެވެ. އަދި މިހާތަނަށް ޔަހޫދީންގެ ހަމަލާތަކުގައި އެކިވަރުގެ އަނިޔާތައް ލިބި، ޒަހަމްވި މީހުންގެ ޖުމްލަ އަދަދު 2 ލައްކަ ފަހަނައަޅާފައިވާ ކަމަށް ވެސް މަސްދަރުތަކުން ބުނެއެވެ.

ބައިނަލްއަގުވާމީ މުޖުތަމައުން ހަމަލާތައް ހުއްޓާލުމަށް ގޮވާލަމުންދިޔަ ނަމަވެސް، ޔަހޫދީ ސިފައިން ދަނީ ކޮންމެ ދުވަހަކުވެސް އާންމުން ދިރިއުޅޭ ސަރަހައްދުތަކަށް ބޮންއަޅައި ގަތުލުއާންމު ކުރިއަށް ގެންދަމުންނެވެ.