ލިވަޕޫލްގެ ކުރީގެ ތަރި މުހައްމަދު ސަލާހު ތުރުކީގެ ބެޝިކްޓާޝް އާއެކު އެއްބަސްވުމަކަށް އައިސްފައިވާ ކަމަށް ބޭރުގެ މީޑިއާތަކުން ރިޕޯޓުކުރި ނަމަވެސް، އެ ކުލަބުން އެ ވާހަކަތައް ރަސްމީކޮށް ދޮގުކޮށްފި ކަމަށް ހަބަރުތައް ބުނެފިއެވެ.
މިހާރު ފްރީ އޭޖެންޓެއްގެ ގޮތުގައި ހުރި މިސްރުގެ ކެޕްޓަން ސަލާހު، ތުރުކީގެ ސުޕަ ލީގަށް ބަދަލުވާން އުޅޭ ކަމުގެ އަޑުތައް ގަދަވެފައިވަނީ ފްރާންސްގެ މަޝްހޫރު ކުޅިވަރު ނޫހެއް ކަމަށްވާ "ފުޓް މާކާޓޯ" އިން އެ ޚަބަރު ރިޕޯޓު ކުރުމާ ގުޅިގެންނެވެ. އެ ނޫހުން ރިޕޯޓުކޮށްފައިވާ ގޮތުގައި، ސަލާހު ވަނީ ބެޝިކްޓާޝްއާއެކު އެއް އަހަރު ދުވަހުގެ އެގްރީމެންޓަކަށް (އިތުރު އެއް އަހަރަށް އާކުރެވޭ ގޮތަށް) އަނގަބަހުން އެއްބަސްވެފައެވެ. އަދި އޭނާއަށް މުސާރައިގެ ގޮތުގައި އަހަރަކު 10 މިލިއަން ޔޫރޯ އާއި ބޯނަހުގެ ގޮތުގައި 2 މިލިއަން ޔޫރޯ ހުށަހަޅާފައިވާ ކަމަށްވެސް އެ ރިޕޯޓުގައިވެއެވެ.
ނަމަވެސް، ބެޝިކްޓާޝްއިން ނެރުނު ރަސްމީ ބަޔާނެއްގައި ބުނެފައިވަނީ ސަލާހާއެކު އެއްބަސްވުމަކަށް އާދެވިފައިވާ ކަމަށް ދެކެވޭ ވާހަކަތަކަކީ ހަގީގަތެއް ނޫން ކަމަށެވެ.
Advertisement
ޓްރާންސްފާ މާހިރު ފަބްރީޒިއޯ ރޮމާނޯ ހާމަކުރި ގޮތުގައި، ބެޝިކްޓާޝްއިން ސަލާހު ހޯދުމަށް ރަސްމީކޮށް ޝައުގުވެރިކަން ފާޅުކޮށް، ހުށަހެޅުމެއް ދީފައިވެއެވެ. ނަމަވެސް، ދެ ފަރާތުގެ މެދުގައި ފައިނަލް އެއްބަސްވުމަކާއި ހަމައަށް އަދި ދެވިފައެއް ނުވެއެވެ.
ލިވަޕޫލާއެކު ހަދާފައިވާ ކޮންޓްރެކްޓް ހަމަވުމަށްފަހު ސަލާހު ހޯދުމަށް ސައުދީ އަރަބިއްޔާގެ ބޮޑެތި ކުލަބުތަކުންނާއި، އެމެރިކާގެ އެމް.އެލް.އެސް ގެ ޓީމުތަކުންވެސް ދަނީ ބޮޑެތި ހުށަހެޅުންތައް ހުށަހަޅަމުންނެވެ.
