އީރާނަށް ދެމުންދާ ހަމަލާތައް ވަރުގަދަ ކުރުމަށް ޓަކައި ވައިގެ ތެރޭގައި ބޯޓުފަހަރަށް ތެޔޮ އަޅައިދޭ (ރިފިއުލިންގް) ގިނަ އަދަދެއްގެ އަސްކަރީ މަތިންދާބޯޓު އިސްރާއީލަށް ފޮނުވުމަށް ވޮޝިންގްޓަނުން ތައްޔާރުވާން ފަށައިފިއެވެ.

ހަބަރުތައް ބުނާ ގޮތުގައި މިއީ ހުރްމުޒް ކަނޑުއޮޅި އަލުން ހުޅުވުމަށާއި، އެމެރިކާގެ ނިއުކްލިއާ ޑިމާންޑްތަކަށް އީރާނުން އެއްބަސްވުމަށް މަޖުބޫރުކުރުވުމުގެ ގޮތުން ޓްރަމްޕް މުރާޖަޢާ ކުރައްވަމުންދާ އައު އަސްކަރީ އިޚްތިޔާރުތަކެއްގެ ބައެކެވެ.

މިހާރުވެސް އެމެރިކާގެ އަސްކަރިއްޔާއިން ދަނީ އީރާނުގެ ޢަމާޒުތަކަށް ކޮންމެ ދުވަހަކު ހަމަލާދެމުންނެވެ. މިގޮތުން، އީރާނުގެ އިސްލާމިކް ރިވޮލިއުޝަނަރީ ގާޑް ކޯޕްސް އިން ހަތިޔާރާއި ސަޕްލައި ބަދަލުކުރުމަށް ބޭނުންކުރާ ބަންދަރު އައްބާސް ކައިރީގައިވާ ހަތް ބުރިޖަކަށް އެމެރިކާ ސިފައިން ވަނީ ހަމަލާދީފައެވެ.

ޓްރަމްޕްގެ ސަރުކާރުން ދެން ވިސްނަމުންދާ އިތުރު ފިޔަވަޅުތަކުގެ ތެރޭގައި، އީރާނުގެ އިންފްރާސްޓްރަކްޗާ ފެސިލިޓީތަކާއި، ނިއުކްލިއާ ސައިޓްތަކުގެ އިތުރުން، ނިއުކްލިއާ މަސައްކަތްތަކާ ގުޅުންހުރި ކަމަށް ބެލެވޭ ބިމުގެ އަޑީގައިވާ "ޕިކްއެކްސް މައުންޓަން" ސައިޓަށް ހަމަލާދިނުން ހިމެނެއެވެ.

އެމެރިކާއިން އިސްރާއީލަށް ފޮނުވަން ނިންމާފައިވާ ރިފިއުލިންގް ބޯޓުތައް ގާއިމުކުރުމަށް ހަމަޖެހިފައި ވަނީ ތެލް އަވީވް ކައިރީގައިވާ ބެން ގޫރިއަން އިންޓަނޭޝަނަލް އެއާޕޯޓުގައެވެ. މިހާރުވެސް އެ އެއާޕޯޓުގައި 30 ބޯޓު އަދި ދެކުނު އިސްރާއީލުގެ ރާމޮން އެއާޕޯޓުގައި 30 ބޯޓު އެމެރިކާއިން ގާއިމުކޮށްފައިވެއެވެ.