ސިހުރުވެރިޔަކު ކޮންމެ ސިހުރެއް ހެދި ނަމަވެސް، މާތް ﷲ ތިބާއަށް ލިޔުއްވާފައިވާ ކަމެއް މެނުވީ ނުޖެހޭނެކަން ޔަޤީންކަމާއެކު ހިތުގެ އަޑީން ޤަބޫލުކުރަންޖެހޭ ކަމަށް މިއަދުގެ ހުކުރު ޚުޠުބާގައި ނަސޭހަތްތެރިވެއްޖެއެވެ.

މިއަދު ރާއްޖޭގެ މިސްކިތްތަކުގައި އިއްވި ޚުޠުބާ ޚާއްޞަކޮށްފައިވަނީ ސިހުރުހާހޫރައިގެ ނުބައިކަމުގެ މައްޗަށެވެ.

ޚުޠުބާގައި ބަޔާންކޮށްފައިވާ ގޮތުގައި، ސިހުރަކީ އޭގައި ޙަޤީޤަތެއްވާ ކަމެއްކަން ކީރިތި ޤުރްއާނާއި ސުންނަތުން ސާބިތުވެއެވެ. ސިހުރުވެރިންނަކީ ގޮށްތަކަށް ފުމެ، މަންތަރުތަކާއި އަކަތައް ބޭނުންކޮށްގެން މީހުންގެ ހަށިގަނޑަށާއި، ވިސްނުމާއި ހިތަށް ނުބައި އަސަރު ފޯރުވާ ބައެއްކަން ޚުޠުބާގައި ފާހަގަކުރިއެވެ.

ސިހުރު ހެދުމަކީ އެންމެ ބޮޑެތި ފާފަތަކުގެ ތެރެއިންވާ ޝިރުކުގެ ޢަމަލެއްކަން ބަޔާންކުރައްވަމުން ޚުޠުބާގައި ބުނީ، ސިހުރުވެރިޔަކަށް ވެވެނީ ޝައިޠާނާއަށް ކިޔަމަންވުމަށް ޢަހުދުކަށަވަރު ހިފައި، އިސްލާމްދީނުގެ މަތިވެރި އުޞޫލުތަކާ ޚިލާފުވެގެން ކަމަށެވެ. މީގެ ތެރޭގައި ޤުރްއާނަށް އިހާނެތިކޮށް ހިތުމާއި، ނަޖިސް ތަންތަނުގައި އުޅުމާއި، ޖިންނި ޝައިޠާނުންގެ އެހީއަށް އެދުން ހިމެނެއެވެ.

"ސިހުރުވެރިޔާގެ ކާފިރުކަމާއި ނުބައިކަން ބޮޑުވެ، މާތް ﷲއާއި އެކަލާނގެ ރަސޫލާއަށާއި މުއުމިން އަޅުންނަށް ހުރި ޢަދާވާތްތެރިކަން ބޮޑުވިވަރަކަށް، އޭނާގެ ސިހުރު ބާރުގަދަވެފައި މާ އަވަހަށް އަސަރުކުރެއެވެ،"

ހުކުރު ޚުޠުބާ

މީގެ އިތުރުން، ސިހުރު އުނގެނުމާއި އުނގަންނައިދިނުމަކީވެސް މީހާ ކުފުރުވާވަރުގެ ބޮޑު ފާފައެއްކަމާއި، ސިހުރުވެރިޔާއަށް ދުނިޔެއާއި އާޚިރަތުގައިވެސް ކާމިޔާބެއް ނެތްކަން ޚުޠުބާގައި ހަނދާންކޮށްދިނެވެ. އަދި ބައްޔެއްވެގެން ނުވަތަ އަޖުމަބަލައިލުމުގެ ނިޔަތުގައި ނަމަވެސް ސިހުރުވެރިންނާއި ކާހިނުންގެ ގާތަށް ދިއުމަކީ ނަހީކުރައްވާފައިވާ ކަމެއްކަމަށާއި، އެފަދަ މީހުންގެ ބަސް ޤަބޫލުކުރާ މީހާ މުޙައްމަދުގެފާނުގެ މައްޗަށް ބާވައިލެއްވުނު ދީނަށް ކާފަރުވެއްޖެކަން ރަސޫލާގެ ޙަދީޘުން ސާބިތުވާކަން ފާހަގަކުރިއެވެ.

ޚުޠުބާގައި އިތުރަށް ބަޔާންކުރެއްވި ގޮތުގައި، ދިިރިއުޅުމުގައި ދިމާވާ ކަންކަމަކީ ސިހުރުގެ ސަބަބުންވާ ކަންކަން ކަމަށް ބަލައި ބާޠިލު ވަހުމްތަކުގެ މަގަށް ދިއުމުގެ ބަދަލުގައި، މުސްލިމުން ޖެހޭނީ މާތް ﷲއަށް ވަކީލުކުރާށެވެ. ފަރުޟު ފަސް ނަމާދު އަދާކުރުމާއި، ހެނދުނާއި ހަވީރުގެ ޛިކުރުތައް ކިޔުމާއި، ގޭގައި ސޫރަތުލް ބަޤަރާ ކިޔެވުމަކީ ސިހުރުގެ ނުރައްކަލުން ރައްކާތެރިވުމަށް އޮތް އެންމެ ބޮޑު އައްޑަނައެވެ.

ފަރުވާ ހޯދުމުގައި ސިހުރުވެރިންގެ ކިބައިން ސަލާމަތްވެ، ކީރިތި ޤުރްއާނާއި ސުންނަތުން ސާބިތުވާ ޝަރުޢީ ރުޤުޔާގެ މަގު އިޚްތިޔާރުކުރުމަށް މިއަދުގެ ޚުޠުބާގައި މުޅި އިސްލާމީ އުންމަތަށް އިލްތިމާސްކުރެއްވިއެވެ.