ދިވެހި ސިފައިންގެ ހިދުމަތާ އަލަށް ގުޅުނު 72 ވަނަ އަދި 73 ވަނަ އަސާސީ ތަމްރީން ކޯހުގެ ދަރިވަރުން ތަމްރީނު ފުރިހަމަކޮށް، ހުވާކުރުމުގެ ރަސްމިއްޔާތު މިއަދު ބާއްވައިފި އެވެ.

ކ. ގިރިފުށީ ޓްރެއިނިންގް ސެންޓަރުގެ ހެވިކަމުގެ މައިދާނުގައި ބޭއްވި މި ރަސްމިއްޔާތު އިއްޒަތްތެރިކޮށްދެއްވީ ރައީސުލްޖުމްހޫރިއްޔާ އަދި ސިފައިންގެ އެންމެ މަތީ ވެރިޔާ ޑރ. މުޙައްމަދު މުޢިއްޒު އެވެ. މި ރަސްމިއްޔާތުގައި ޑިފެންސް މިނިސްޓަރު ހަސަން ރަޝީދުގެ އިތުރުން ޗީފް އޮފް ޑިފެންސް ފޯސް މޭޖާ ޖެނެރަލް އިބްރާހިމް ހިލްމީގެ އިތުރުން ސިފައިންގެ އިސްވެރިން ބައިވެރިވެވަޑައިގެންނެވި އެވެ.

މި ދެ ބެޗުން ޖުމްލަ 255 ދަރިވަރުން ވަނީ ހުވާކޮށްފަ އެވެ. އެއީ 72 ވަނަ އަސާސީ ތަމްރީން ކޯހުގެ 138 ދަރިވަރުންނާއި، 73 ވަނަ އަސާސީ ތަމްރީން ކޯހުގެ 117 ދަރިވަރުންނެވެ. ރަސްމިއްޔާތުގައި ދަރިވަރުންނަށް ހުވާލައިދެއްވީ ހައިކޯޓުގެ ފަނޑިޔާރު އަލްއުސްތާޛް ހުސައިން މަޒީދެވެ. އަދި ތަމްރީން ނިންމި ދަރިވަރުންނާ ބަޑި ހަވާލުކޮށްދެއްވީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އެވެ.

އެމްއެންޑީއެފް ކޮލެޖް އޮފް ޑިފެންސް އެންޑް ސެކިއުރިޓީ ސްޓަޑީސްއިން ކުރިއަށްގެންދިޔަ މި ދެ ކޯހަކީވެސް މާރިޗު 7، 2024 އިން ފެށިގެން ހަތަރު މަސްދުވަހުގެ މުއްދަތަށް ކުރިއަށްގެންދިޔަ ކޯސްތަކެކެވެ. މީގެ ތެރެއިން 72 ވަނަ ބެޗުގެ ތަމްރީނުތައް އައްޑޫ ސިޓީގައި ހުންނަ އެމްއެންޑީއެފް ސަދަން އޭރިއާ ކޮމާންޑް ޓްރެއިނިންގް ސެންޓަރުގައި ކުރިއަށްގެންދިޔައިރު، 73 ވަނަ ބެޗުގެ ތަމްރީނުތައް ކުރިއަށްގެންގޮސްފައިވަނީ ކ. ގިރިފުށީގަ އެވެ.

ސިފައިންގެ އަސާސީ ތަމްރީނު ކޯހަކީ އަލަށް ސިފައިންގެ ހިދުމަތާ ގުޅޭ މީހުންނަށް، ސިފައިންގެ އެކި ދާއިރާތަކުގައި މަސައްކަތްކުރެވޭ ފެންވަރަށް ބޭނުންވާ އިލްމާއި ހުނަރު އުނގަންނައިދިނުމަށް ހިންގޭ މުހިންމު ކޯހެކެވެ. މި ކޯހުގެ މައިގަނޑު މަގްސަދަކީ ގައުމިއްޔަތަށް ލޯބިކުރާ، އަޚްލާޤު ރަނގަޅު، އަމުރަށް ކިޔަމަންތެރިވާ އަދި ހަށިހެޔޮ ސިފަވަންތަ ސިފައިންގެ ބަޔަކު ބިނާކުރުމެވެ.

މިއަދުގެ ރަސްމިއްޔާތާއެކު، މި 255 ސިފައިން މިހާރު ވަނީ ރަސްމީކޮށް ދިވެހި ޤައުމީ ދިފާއީ ބާރުގެ ހިދުމަތާ ގުޅިފަ އެވެ.