އުރުދުންގައި ގާއިމްކޮށްފައިވާ އެމެރިކާގެ އަސްކަރީ އެއާ ބޭސް، "އަލް-އަޒްރަގް" އަށް އަމާޒުކޮށް ރޭގެ ވަގުތެއްގައި ވަރުގަދަ ޑްރޯން ހަމަލާތަކެއް ދީފި ކަމަށް އީރާނުގެ އަސްކަރިއްޔާއިން މިއަދު ރަސްމީކޮށް ބުނެފިއެވެ.

އީރާނުގެ ދައުލަތުގެ މީޑިއާ އިން ރިޕޯޓުކޮށްފައިވާ ގޮތުގައި، "އޮޕަރޭޝަން ސާއިގާ" ގެ ނުވަވަނަ ފިޔަވަހީގެ ދަށުން ދިން މި ހަމަލާ އަކީ އިއްޔެ އީރާނުގެ ބާމްޕޫރުގައި ހުންނަ އަސްކަރީ ބެރެކްސްއަށް އެމެރިކާއިން ދިން ހަމަލާގައި އީރާނުގެ 7 ސިފައިން ޝަހީދުވުމާއި ގުޅިގެން، އޭގެ ބަދަލުހިފުމުގެ ގޮތުން ދިން ހަމަލާއެކެވެ.

އީރާނުގެ އަސްކަރީ ބަޔާނުގައިވާ ގޮތުން، މި ހަމަލާގައި އަޒްރަގް ބޭހުގައި ހުރި އެމެރިކާގެ މުވާސަލާތީ ނިޒާމްތަކަށާއި، ރާޑަރުތަކަށާއި، ތެޔޮ ރައްކާކުރާ ހަބުތަކުގެ އިތުރުން އެމެރިކާގެ ފައިޓަރު ޖެޓުތައް ބާއްވާފައި ހުރި ހޭންގަރުތަކަށް ބޮޑެތި ގެއްލުންތަކެއް ވަނީ ދީފައެވެ.

މި މަހުގައި އެކަނި ވެސް އެމެރިކާއަށް ވަނީ މެދުއިރުމަތީގެ ސަރަހައްދުގައި ފޫނުބެއްދޭވަރުގެ ބޮޑެތި ގެއްލުންތަކާއި ކުރިމަތިލާން ޖެހިފައެވެ. އޭގެތެރޭގައި ބަހްރެއިން، ކުވައިތު އަދި ގަތަރުގެ ބޭސްތަކަށް ލިބުނު ގެއްލުންތައް ފާހަގަ ކުރެވެއެވެ. މި ގައުމުތަކުގައި ހުރި އެމެރިކާގެ އަސްކަރީ މަރުކަޒުތަކަށް އީރާނުން ދިން މިސައިލާއި ޑްރޯން ހަމަލާތަކުގައި ލޮޖިސްޓިކްސް ހަބްތަކާއި، ކޮމާންޑް ސެންޓަރުތަކާއި، އަދި ރާޑަރު ސިސްޓަމްތަކަށް ވަނީ ބޮޑެތި ގެއްލުންތަކެއް ވެފައެވެ.

އަދި އެމެރިކާގެ ޒަމާނީ ޑްރޯންތަކެއް ހަލާކުވެފައިވާއިރު، ހުރްމޫޒް ކަނޑުއޮޅި ސަރަހައްދުން އެމެރިކާގެ އެމްކިއު-1 ޑްރޯނެއް ވައްޓާލާފައިވާ ކަމަށް އީރާނުން ބުނެއެވެ. އަދި ފައިޓަރު ޖެޓުތައް ބަހައްޓާ ބޮޑެތި ހޭންގަރުތަކެއް ވަނީ ގޮއްވާލާފައެވެ.