މިއަހަރުގެ މިނިވަން ދުވަހުގެ މުނާސަބަތުގައި ބާއްވާ ރަސްމީ ޖަލްސާގައި، ދިވެހި ދައުލަތަށް ދިގު މުއްދަތަކަށް އިޚްލާޞްތެރިކަމާއެކު ޚިދުމަތް ކުރައްވާފައިވާ 66 ބޭފުޅަކަށް "ދިވެހި ދައުލަތަށް ޚިދުމަތްކުރުމުގެ އިނާމު" އެރުވުމަށް ޤައުމީ އިނާމާބެހޭ ކޮމިޓީން ނިންމަވައިފިއެވެ.

ރައީސުލްޖުމްހޫރިއްޔާގެ އޮފީހުން ހާމަކުރައްވާފައިވާ ގޮތުގައި، މި އިނާމު މިއަހަރު އެރުވުމަށް ހަމަޖެހިފައިވަނީ ދިވެހި ދައުލަތަށް 41 އަހަރަށްވުރެ ދިގު މުއްދަތަކަށް ޚިދުމަތް ކުރައްވައިފައިވާ ބޭފުޅުންގެ ތެރެއިން، މިހާތަނަށް ދައުލަތުގެ އެއްވެސް ޝަރަފުގެ އިނާމެއް ލިބިވަޑައިގެންފައި ނުވާ ބޭފުޅުންނަށެވެ. މި ބޭފުޅުންނަކީ މަޤާމުގެ މަސްއޫލިއްޔަތު އަދާކުރުމުގައި ޤާބިލްކަމާއި، ނަޒާހަތްތެރިކަމާއި، އަދި އިޚްލާޞްތެރިކަމާއެކު ދައުލަތް ބިނާކުރުމަށް ބޮޑެތި ޚިދުމަތްތަކެއް ކޮށްދެއްވާފައިވާ މުވައްޒަފުންނެވެ.

ޤައުމީ އިނާމާބެހޭ ކޮމިޓީން މި ބޭފުޅުން ހޮއްވަވާފައިވަނީ، ރައީސުލްޖުމްހޫރިއްޔާގެ އޮފީހުން ދައުލަތުގެ އެކި މުއައްސަސާތަކުން ހޯއްދެވި ރެކޯޑުތައް ދިރާސާކުރެއްވުމަށްފަހުގައެވެ. އަދި އިނާމަށް ޝަރުޠުހަމަވާކަން ކަށަވަރުކުރުމުގެ ގޮތުން ކޮމިޓީގެ ފަރާތުން އެ ބޭފުޅުންނާ ބައްދަލުކުރައްވައި، މަޢުލޫމާތު ސާފުކުރައްވާފައިވާ ކަމަށްވެސް އެ އޮފީހުން ވިދާޅުވިއެވެ.

މިނިވަން ދުވަހުގެ މުނާސަބަތުގައި ސޯޝަލް ސެންޓަރުގައި ބޭއްވުމަށް ހަމަޖެހިފައިވާ ރަސްމީ ޖަލްސާގައި، މި ބޭފުޅުންނަށް އިނާމު ހަވާލުކޮށްދެއްވާނީ ރައީސުލްޖުމްހޫރިއްޔާއެވެ. ދައުލަތަށް ޚިދުމަތް ކުރުމުގެ އިނާމުގެ ގޮތުގައި ރައީސުލްޖުމްހޫރިއްޔާ ދެއްވާނީ ޝަރަފުގެ ބެޖަކާއި، އައްޑަނައަކާއި، އަދި ހަނދާނީ ލިޔުމެކެވެ. ދިވެހި ދައުލަތަށް ޚިދުމަތްކުރުމުގެ އިނާމަކީ، ދައުލަތުގެ މުއައްސަސާތަކުގެ ކުރިއެރުމަށާއި ޤައުމީ ތަރައްޤީއަށް ދިގު މުއްދަތަކަށް މަސައްކަތް ކޮށްދެއްވާފައިވާ ބޭފުޅުންގެ އަގު ވަޒަންކުރުމުގެ ގޮތުން ޤައުމީ ފެންވަރުގައިދޭ އެންމެ މަތީ އެއް ޝަރަފެވެ.