މާލޭ ވިޔަފާރި ބަނދަރަށް ދިމާވެފައިވާ ތޮއްޖެހުމުގެ މައްސަލައަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން ދާއިމީ ހައްލެއް ހޯއްދަވައިދެއްވާނެ ކަމަށާއި، އެ މަސައްކަތް މިހާރު ބާރުމިނުގައި ކުރިއަށްދާ ކަމަށް އިކޮނޮމިކް މިނިސްޓަރު މުޙައްމަދު ސައީދު ވިދާޅުވެއްޖެއެވެ.

މިނިސްޓަރު ސައީދު ވިދާޅުވީ، ރާއްޖޭގެ އިގްތިސާދީ ކުރިއެރުމަށް ހުރަސްއެޅޭ ފަދަ ބޮޑެތި މައްސަލަތައް ފާއިތުވި ސަރުކާރުތަކަށް ފެނުނު ނަމަވެސް، އެކަންކަމަށް އެދެވޭ ހައްލެއް ލިބިފައިނުވާ ކަމަށެވެ. އެގޮތުން އެންމެ ބޮޑު އެއް ގޮންޖެހުމަކަށް ވެފައިވަނީ މާލޭ ވިޔަފާރި ބަނދަރު ތޮއްޖެހި، މުދާ ބޭލުމަށް ދިމާވަމުންދާ ދަތިތައްކަން މިނިސްޓަރު ފާހަގަކުރެއްވިއެވެ.

"ފާއިތުވެދިޔަ ތާނގައި ސަރުކާރުތައް އައިސް ގޮސް، ޒަމާން ބަދަލުވެގެން ދިޔައިރުވެސް، ބަނދަރުގެ މައްސަލަ އޮތީ އޮތް ހިސާބުގައި ތާށިވެފައި. އޭގެ ސަބަބުން ވިޔަފާރިވެރިންނަށާއި ރައްޔިތުންނަށް އޭގެ ދަތިތައް އިންތިހާއަށް ފޯރަމުންދިޔަ. ނަމަވެސް، ރައީސް މުއިއްޒުގެ ސަރުކާރުން މި މައްސަލައަށް އަމަލީ ސިފައެއް ގެނެސް، ދާއިމީ ހައްލެއް ހޯދުމުގެ މަސައްކަތް މިހާރު ވަނީ ފައްޓަވާފައި".

އިކޮނޮމިކް މިނިސްޓަރު ސައީދު (އެކްސްގައި ކުރެއްވި ޕޯސްޓެއްގައި ވިދާޅުވި)

މިނިސްޓަރު އިތުރަށް ވިދާޅުވީ، ރައީސުލްޖުމްހޫރިއްޔާ އިއްވެވި ރިޔާސީ ބަޔާނުގައި ވިދާޅުވެފައިވާ ފަދައިން، މާލޭ ވިޔަފާރި ބަނދަރު ތިލަފުއްޓަށް ބަދަލުކުރުމުގެ ބޮޑު މަޝްރޫއު ބާރުމިނުގައި ކުރިއަށްދާ ކަމަށެވެ. މި މަޝްރޫއުގެ އަމާޒަކީ ނޮވެންބަރު 2027 އަށް ހުރިހާ މަސައްކަތްތަކެއް ނިންމައި، ބަނދަރު ބަދަލުކުރުން ކަމަށްވެސް މިނިސްޓަރު ވިދާޅުވިއެވެ.

މީގެ އިތުރުން، ބަނދަރު ބަދަލުވަންދެން މުދާ ބޭލުމުގައާއި ބަނދަރުގެ އޮޕަރޭޝަންތަކުގައި ހުރި ދަތިތަކަށް ހައްލު ހޯދުމަށްޓަކައި ސަރުކާރުން މިހާރުވެސް ވަގުތީ ގިނަ އިންތިޒާމްތަކެއް ހަމަޖައްސަމުންދާ ކަމަށާއި، އޭގެ ސަބަބުން ކުރިއާ އަޅާބަލާއިރު ހެޔޮ ބަދަލުތަކެއް ފެންނަން ފަށާފައިވާ ކަމަށް މިނިސްޓަރު ސައީދު ވިދާޅުވިއެވެ.

މި މަޝްރޫޢަކީ ރާއްޖޭގެ އިގްތިސާދީ ދުވެލި ހަލުވިކޮށް، މުދާ ލިބުމުގައި ހުރި ހުރަސްތައް ނައްތާލުމަށް ރައީސް ޑރ. މުޢިއްޒު ދެއްވާ ހާއްސަ އިސްކަމެއްގެ ދަށުން ކުރިއަށްދާ މުހިންމު މަސައްކަތެކެވެ.