ރާއްޖޭގެ އެކި ރަށްރަށުގައި ފެނާއި ނަރުދަމާގެ ނިޒާމު ގާއިމުކުރުމަށް ސަރުކާރުން ކުރިއަށްގެންދާ މަސައްކަތްތަކުގެ ތެރެއިން، ފާއިތުވި ދެ އަހަރާއި ބައިގެ މުއްދަތުގެ ތެރޭގައި ޖުމްލަ 43 މަޝްރޫއެއްގެ މަސައްކަތް އެއްކޮށް ނިންމާލާފައިވާ ކަމަށް މިނިސްޓްރީ އޮފް ކޮންސްޓްރަކްޝަން އެންޑް އިންފްރާސްޓްރަކްޗާއިން ހާމަކޮށްފި އެވެ.

މިކަމާ ގުޅޭގޮތުން މިނިސްޓަރު ޑރ. އަބްދުﷲ މުއްތަލިބު ރައްޔިތުންގެ މަޖިލީހުގައި ވާހަކަފުޅު ދައްކަވަމުން ވިދާޅުވީ، ސަރުކާރުގެ އަމާޒަކީ ކުރީގެ ސަރުކާރުން ފަށާފައިވާ މަޝްރޫއުތަކާއި މި ސަރުކާރުގެ އާ މަޝްރޫއުތައް ވެސް އެކުގައި ކުރިއަށް ގެންގޮސް ނިންމާލުން ކަމަށެވެ.

މިނިސްޓަރު ފާހަގަކުރެއްވި ގޮތުގައި، މި ސަރުކާރުން ވެރިކަމާ ހަވާލުވިއިރު ކުރީ ސަރުކާރުން ސޮއިކޮށްފައިވާ ގާތްގަނޑަކަށް 40 ބިލިއަން ރުފިޔާގެ މަޝްރޫއުތައް ހުއްޓެވެ. ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ނިންމެވުމަކީ، މި ސަރުކާރުގެ މެނިފެސްޓޯގައިވާ ވައުދުތަކާ އެކު، ކުރީ ސަރުކާރުން ފަށާފައިވާ ހުރިހާ މަޝްރޫއުތަކެއް ވެސް ނިންމައި ރައްޔިތުންނަށް އޭގެ މަންފާ ހޯދައިދިނުމެވެ.

އެ މިނިސްތަރީގެ ތަފާސްހިސާބުތަކުން ދައްކާގޮތުގައި 2018 އިން 2023 އަށް ފެށި 154 މަޝްރޫއުގެ ތެރެއިން އެ ދައުރު ނިމުނުއިރު ނިންމުނީ އެންމެ 52 މަޝްރޫ އެވެ. ނުނިމި ހުރި 102 މަޝްރޫއުގެ ތެރެއިން މިހާރު ނިންމާލެވުނު 43 މަޝްރޫއަކީ 2019 އާއި 2021 އާ ދެމެދު ހަވާލުކުރެވުނު މަސައްކަތްތަކެވެ. މީގެ ތެރޭގައި އިންޑިއާގެ އެގްޒިމް ބޭންކުގެ އެހީގައި ކުރިއަށްދިޔަ 21 މަޝްރޫއެއް ހިމެނެ އެވެ.

މަޝްރޫއުތައް ލަސްވާކަމަށް ކުރެވޭ ތުހުމަތުތަކަށް އިޝާރާތް ކުރައްވައި މިނިސްޓަރު ވިދާޅުވީ، "އަޅުގަނޑުމެން ސަރުކާރުން އެދޭހާ ބާރު ސްޕީޑުގައި މަސައްކަތްނުދާ ކަމަށް އަޅުގަނޑުމެން ވެސް ގަބޫލުކުރަން،" ކަމަށެވެ. ނަމަވެސް ދައުލަތުގެ ބަޖެޓުން އާ މަޝްރޫއުތަކާއި ބާލީ މަޝްރޫއުތައް އެކުގައި ކުރިއަށް ގެންދާއިރު ދިމާވާ ގޮންޖެހުންތަކާއެކުވެސް، މިހާރު މަސައްކަތްތައް ދަނީ ރަނގަޅު ޝެޑިއުލެއްގެ ދަށުން ކަމަށް މިނިސްޓަރު ވިދާޅުވި އެވެ.

ސަރުކާރުގެ އައު އަމާޒެއްގެ ގޮތުން މިއަހަރުގެ ޖޫން 30 އާ ހަމައަށް ފެނާއި ނަރުދަމާގެ އައު 50 މަޝްރޫއެއް ވަނީ އެކި ފަރާތްތަކާ ހަވާލުކޮށްފަ އެވެ. މީގެ އިތުރުން މިހާރުވެސް ރާއްޖޭގެ އެކި ކަންކޮޅުތަކުގައި 69 މަޝްރޫއެއްގެ އަމަލީ މަސައްކަތް އެމްޑަބްލިއުއެސްސީ އާއި އެހެނިހެން ކުންފުނިތަކާ ގުޅިގެން ދަނީ ކުރަމުންނެވެ.

މިނިސްޓަރު ވިދާޅުވި ގޮތުގައި ސަރުކާރުގެ އަމާޒަކީ 2028 ވަނަ އަހަރުގެ މެދުތެރެއަށް ދާއިރު، މިހާރު ހިނގަމުންދާ ހުރިހާ މަސައްކަތްތަކެއް ނިންމައި ރައްޔިތުންނަށް އޭގެ ފުރިހަމަ ހިދުމަތް ފޯރުކޮށްދިނުމެވެ.