ވެރިކަން ކުރާ ޕީޕަލްސް ނޭޝަނަލް ކޮންގްރެސް (ޕީއެންސީ) ގެ އެތެރޭގެ ބޮޑު އިންތިހާބުގެ ވޯޓުލުން މިއަދު ވަރަށް އަމާންކަމާއި އޮމާންކަމާއެކު ނިންމާލައި، ރާއްޖޭގެ ސިޔާސީ މަޝްރަހުގައި ހަރަކާތްތެރިވާ އެހެން ޕާޓީތަކަށް ފުރިހަމަ ނަމޫނާއެއް ދައްކައިފިއެވެ.
މި އިންތިހާބުގެ ވޯޓުލުން މިއަދު ހެނދުނު 09:00 ގައި ފަށާފައިވާއިރު، ވޯޓު ފޮށިތައް ބަންދުކޮށްފައިވަނީ ހަވީރު 05:00 ޖެހިއިރުއެވެ. ޕީއެންސީން މައުލޫމާތު ދޭ ގޮތުގައި، ވޯޓު ފޮށިތައް ބަންދުކުރި ނަމަވެސް، ކިޔޫގައި ތިބި ފަރާތްތަކަށް ވޯޓުލުމުގެ ފުރުސަތު ވަނީ ދީފައެވެ. މިހާރު ގިނަ ދާއިރާތަކާއި ރަށްތަކުގެ ވޯޓު ފޮށިތައް ގުނާ ނިމިފައިވާ ކަމަށްވެސް އެ ޕާޓީން ބުނެއެވެ.
މިއީ ރާއްޖޭގެ ސިޔާސީ ތާރީހާގައި ސިޔާސީ ޕާޓީއެއްގެ އެތެރޭގެ އިންތިހާބެއްގައި އެންމެ ގިނަ ކެންޑިޑޭޓުން ވާދަކުރި އިންތިހާބެވެ. އެގޮތުން 2,500 އަށްވުރެ ގިނަ ކެންޑިޑޭޓުން އެކި މަގާމުތަކަށް ވާދަކުރިއިރު، އޭގެ ތެރޭގައި ދާއިރާ ރައީސުން، ނައިބު ރައީސުން، އަންހެނުންގެ ހަރަކާތުގެ ރައީސުން، ޒުވާނުންގެ ހަރަކާތުގެ ރައީސުން އަދި ސްޓިއަރިން ކޮމިޓީގެ ރައީސުން ހިމެނެއެވެ.
Advertisement
މި އިންތިހާބާ ގުޅޭގޮތުން ވާހަކަދައްކަވަމުން ޕީއެންސީގެ ޗެއާޕާސަން އަދި ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ ވިދާޅުވީ، މިއީ އެހެން ޕާޓީތަކުން ނަމޫނާ ލިބިގަންނަންޖެހޭ ފަދަ ޑިމޮކްރެޓިކް ހަރަކާތެއް ކަމަށެވެ. އަދި މި އިންތިހާބުގެ ސަބަބުން ޕާޓީގެ ހިންގުން އިތުރަށް ހަރުދަނާވެ، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސިޔާސަތުތައް ތަންފީޒުކުރުމަށް ބޮޑު ބާރަކަށް ވާނެ ކަމަށްވެސް އޭނާ ފާހަގަކުރެއްވިއެވެ.
ޕީއެންސީގެ ގަވާއިދު ބުނާގޮތުން، އެ ޕާޓީގެ ޓިކެޓުގައި މަޖިލީހަށް ހޮވިފައިވާ މެންބަރުންނަކީ އެ ދާއިރާއެއްގެ ރައީސުންނެވެ. އެހެންކަމުން ދާއިރާ ރައީސުން ހޮވުމުގެ ވޯޓުލުން މިއަދު ކުރިއަށްދިޔައީ މަޖިލިސް މެންބަރުން ނެތް ދާއިރާތަކުގައި އެކަންޏެވެ.
މި އިންތިހާބަށްފަހު، އަންނަ ސެޕްޓެމްބަރު މަހުގެ 15 އިން 18 އަށް ޕީއެންސީގެ ބޮޑު ކޮންގްރެސް ބޭއްވުމަށް ވަނީ ތާވަލުކުރެވިފައެވެ.
