ވެރިކަން ކުރާ ޕީޕަލްސް ނޭޝަނަލް ކޮންގްރެސް (ޕީއެންސީ) ގެ އެތެރޭގެ އިންތިހާބުގެ ވޯޓުލުން މާދަމާ ހެނދުނު ފެށުމަށް އެ ޕާޓީން ތައްޔާރުވެއްޖެއެވެ.

ޕީއެންސީން ހާމަކޮށްފައިވާ ގޮތުގައި، މި އިންތިހާބުގެ ވޯޓުލުން ކުރިއަށްދާނީ މާދަމާ ހެނދުނު 09:00 އިން ފެށިގެން ހަވީރު 04:00 އާ ހަމައަށެވެ. އަދި ހަވީރު 04:00 ގައި ވޯޓު ފޮށިތަކުގެ ކިޔޫލައިން ބަންދުވާނެ ކަމަށާއި، ނަމަވެސް އެ ވަގުތުގެ ކުރިން ކިޔޫއަށް އަރާފައިވާ ފަރާތްތަކަށް ވޯޓުލުމުގެ ފުރުސަތު ލިބޭނެ ކަމަށް އެ ޕާޓީން މައުލޫމާތުދެއެވެ.

މި އިންތިހާބުގައި ޕާޓީގެ އެކި މަގާމުތަކަށް 2،500 އަށްވުރެ ގިނަ ކެންޑިޑޭޓުން ވާދަކުރެއެވެ. އޭގެ ތެރޭގައި ހިމެނެނީ ދާއިރާ ރައީސުންނާއި، ދާއިރާގެ ނައިބު ރައީސުންނާއި، އަންހެނުންގެ ހަރަކާތުގެ ރައީސުންނާއި، ޒުވާނުންގެ ހަރަކާތުގެ ރައީސުންގެ އިތުރުން ސްޓިއަރިން ކޮމިޓީގެ ރައީސުންނެވެ.

ޕީއެންސީގެ ގަވާއިދު ބުނާގޮތުން، އެ ޕާޓީގެ ޓިކެޓުގައި ރައްޔިތުންގެ މަޖިލީހަށް އިންތިހާބުވެފައިވާ މެންބަރުންނަކީ އެ ދާއިރާތަކުގެ ރައީސުންނެވެ. އެހެންކަމުން، ދާއިރާ ރައީސުން ހޮވުމަށް ވޯޓުލުން ކުރިއަށްދާނީ މަޖިލިސް މެންބަރުން ނެތް ދާއިރާތަކުގައި އެކަންޏެވެ.

ވޯޓުލުމުގެ އުސޫލުތަކަށް ބަލާއިރު، މި އިންތިހާބުގައި ވޯޓުލެވޭނީ ޕާޓީގެ ފަރާތުން ޝާއިއުކޮށްފައިވާ ވޯޓު ދިނުމުގެ ހައްގު ލިބިފައިވާ މީހުންގެ ލިސްޓުގައި ހިމެނޭ ފަރާތްތަކަށެވެ. ކޮންމެ މީހަކަށްވެސް ވޯޓުލެވޭނީ އެ މީހަކު ރަޖިސްޓްރީވެފައިވާ ރަށެއްގައި ނުވަތަ މާލެ ސިޓީގައި ވޯޓުލުމަށް ކަނޑައަޅާފައިވާ ފޮށްޓަކަށެވެ.

ވޯޓުލުމަށް ބޭނުންކުރެވޭނެ ތަކެތީގެ ތެރޭގައި އައިޑީ ކާޑު، ޕާސްޕޯޓު، ފޮޓޯ ޖެހި ޑްރައިވިންގ ލައިސަންސް ނުވަތަ އީ-ފާސް ހިމެނެއެވެ. އައިޑީ ކާޑުގެ މުއްދަތު ހަމަވެފައި އިންނަމަވެސް ވޯޓުލުމަށް އެ ކާޑު ބަލައިގަންނާނެއެވެ.

މި އިންތިހާބުގެ މައިގަނޑު ބޭނުމަކީ ރަށްރަށުގައި ޕާޓީގެ ހަރަކާތްތައް އިތުރަށް ވަރުގަދަކޮށް، ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ސަރުކާރުގެ ސިޔާސަތުތައް ތަންފީޒުކުރުމަށް ބޭނުންވާ އެހީތެރިކަން ފޯރުކޮށްދިނުމެވެ.

މި އިންތިހާބަށްފަހު، އަންނަ ސެޕްޓެމްބަރު މަހުގެ 15 އިން 18 އަށް ޕީއެންސީގެ ކޮންގްރެސް (މަތީ މަޖިލީސް) ބޭއްވުމަށް ވަނީ ތާވަލުކުރެވިފައެވެ.