ފީފާ ވޯލްޑްކަޕް 2026 ގެ ގަދަ 16 ގައި މިރޭ ބެލްޖިއަމްއާ ދެކޮޅަށް އެމެރިކާ ނުކުންނައިރު، އެމެރިކާގެ ރައީސް ޑޮނަލްޑް ޓްރަމްޕް ސީދާ ނުފޫޒު ފޯރުއްވައިގެން އެޓީމުގެ ތަރި ފޮލަރިން ބަލޯގަންގެ އެއް މެޗުގެ ސަސްޕެންޝަން ފީފާއިން އުވާލައި އޭނާ އަށް މިރޭ ކުޅެވޭނެ ގޮތް ހަދައިފިއެވެ.
ގަދަ 32 ގެ މެޗުގައި ބޮސްނިއާގެ ކުޅުންތެރިއަކަށް ކުރި ފައުލަކާ ގުޅިގެން ބަލޯގަންއަށް ދެއްކި ސީދާ ރަތްކާޑުގެ ސަބަބުން އޭނާ މިރޭގެ މެޗަށް ސަސްޕެންޑްވެފައި ހުރި ނަމަވެސް، ފީފާގެ މި ކުއްލި ނިންމުމާއެކު އޭނާއަށް މިރޭ ކުޅުމުގެ ފުރުސަތު ވަނީ ފަހިވެފައެވެ. މިއީ ވޯލްޑްކަޕް ތާރީހުގައިވެސް ސިޔާސީ ވެރިއެއްގެ ބާރުގެ ދަށުން ރަތްކާޑެއްގެ އަދަބު މިގޮތަށް ބަދަލުކުރި ފުރަތަމަ ފަހަރެވެ.
މި ނިންމުން ނިންމާފައިވަނީ ރައީސް ޑޮނަލްޑް ޓްރަމްޕް ސީދާ ފީފާގެ ރައީސް ޖިއާނީ އިންފަންޓީނޯއަށް ފޯނުން ގުޅުއްވައި، އެ ކާޑަކީ ބޭއިންސާފެއް ކަމަށް ވިދާޅުވެ މައްސަލަ ޖެއްސެވުމާއި ގުޅިގެންނެވެ. އެމެރިކާގެ މަޝްހޫރު ނޫސްތައް ކަމަށްވާ ނިއުޔޯކް ޓައިމްސް އަދި އެސޯސިއޭޓެޑް ޕްރެސް (އޭޕީ) އިން ބުނާގޮތުގައި، ޓްރަމްޕް ވަނީ އޯވަލް އޮފީހުގައި ނޫސްވެރިންނާ ވާހަކަދައްކަވަމުން އޭނާ އަމިއްލައަށް ފީފާގައި އެ ރިވިއުއަށް އެދިވަޑައިގަތް ކަމަށް އެއްބަސްވެވަޑައިގެންފައެވެ. އަދި އޭނާގެ އަމިއްލަ ސޯޝަލް މީޑިއާ ޕްލެޓްފޯމް ގައިވެސް ފީފާއިން އެ ނިންމުން ބަދަލުކޮށްދިނީތީ ޝުކުރު އަދާކުރައްވައި ޕޯސްޓެއް ކުރައްވާފައެވެ.
Advertisement
ފީފާއިން މި ނިންމުން ނިންމުމުގައި ބޭނުންކޮށްފައިވަނީ ފީފާ ޑިސިޕްލިނަރީ ކޯޑުގެ 27 ވަނަ މާއްދާއެވެ. އެ މާއްދާގެ ދަށުން ބަލޯގަންގެ އެއް މެޗުގެ ސަސްޕެންޝަން ވަނީ އެއް އަހަރު ދުވަހުގެ ޕްރޮބޭޝަން މުއްދަތަކަށް ފަސްކޮށްދީފައެވެ. މިއީ ވޯލްޑްކަޕެއްގެ ތާރީހުގައިވެސް މި މާއްދާގެ ބޭނުން ހިފައިގެން ކުޅުންތެރިއެއްގެ ރަތްކާޑުގެ އަދަބު މިގޮތަށް ލުއިކޮށްދިން ފުރަތަމަ ފަހަރެވެ..
