އާޓިފިޝަލް އިންޓެލިޖެންސްގެ ދާއިރާގައި ފާހަގަކޮށްލެވޭ ކުންފުނި އޯޕަންއޭއައި ގެ އޮފީހުގައި ސިއްރުން އަޑުއަހާ ވަސީލަތެއް ހަރުކުރި މައްސަލައެއްގައި ސައުދީ އަރަބިއްޔާގެ ރައްޔިތަކު އެމެރިކާގެ ކަމާބެހޭ ފަރާތްތަކުން ހައްޔަރުކޮށްފިއެވެ.
އެމެރިކާގެ ޑިޕާޓްމަންޓް އޮފް ޖަސްޓިސް (ޔޫއެސް ޑީއޯޖޭ) އިން ހާމަކޮށްފައިވާ ގޮތުގައި، މި މައްސަލައިގައި ހައްޔަރުކޮށްފައިވަނީ އުމުރުން 29 އަހަރުގެ އަބްދުއްރަހްމާން އަލްހަސަން ނަމަކަށް ކިޔާ ސައުދީ ރައްޔިތެކެވެ. އޭނާ ހައްޔަރުކޮށްފައިވަނީ ކެލިފޯނިއާގެ ސެން ފްރެންސިސްކޯގައި ހުންނަ އޯޕަންއޭއައިގެ މައި އޮފީހަށް ވަދެ، ހުއްދައެއް ނެތި ސިއްރުން އަޑު ރެކޯޑުކުރާ ޑިވައިސްއެއް ހަރުކުރި ކަމުގެ ތުހުމަތުގައެވެ.
ތަހުގީގީ އިދާރާތަކުން ބުނާ ގޮތުގައި އަލްހަސަން ވަނީ އެ ކުންފުނީގެ ސެކިއުރިޓީ ފޫއަޅުވާލުމަށްފަހު، އެތެރޭގެ މުހިންމު ބައްދަލުވުންތައް ބާއްވާ ކޮޓަރިއެއްގައި މި ޑިވައިސް ސިއްރުން ހަރުކޮށްފައެވެ. ނަމަވެސް، ކުންފުނީގެ ސެކިއުރިޓީ ޓީމަށް މިކަން ފާހަގަކުރެވި، ފެޑެރަލް ބިއުރޯ އޮފް އިންވެސްޓިގޭޝަން (އެފްބީއައި) އަށް ރިޕޯޓްކުރުމާ ގުޅިގެން ހިންގި ހާއްސަ އޮޕަރޭޝަނެއްގައި އޭނާ ވަނީ ހައްޔަރުކޮށްފައެވެ.
Advertisement
މި މައްސަލައިގައި އަލްހަސަންގެ މައްޗަށް ވަނީ އެހެން ފަރާތްތަކުގެ މުވާސަލާތީ ވާހަކަތައް ސިއްރުން އަޑުއެހުމާއި، ހުއްދަނެތި މީހުންގެ ޒާތީ އަދި ވިޔަފާރީގެ މައުލޫމާތު ވަގަށް ނަގަން އުޅުމުގެ ދައުވާ އުފުލާފައެވެ. އޭނާ މިކަން ކުރި އަސްލު މަގުސަދަކީ ކޮބައިކަން އަދި މިކަމުގެ ފަހަތުގައި އެހެން އެއްވެސް ޖަމާއަތެއް ނުވަތަ ފަރާތެއް ވޭތޯ ބެލުމަށް އެފްބީއައި އިން ދަނީ އިތުރަށް ތަހުގީގު ކުރަމުންނެވެ.
އާޓިފިޝަލް އިންޓެލިޖެންސްގެ އެންމެ ކުރިއަރާފައިވާ ޓެކްނޮލޮޖީ އުފައްދާ ކުންފުނިތަކުގެ ވިޔަފާރީގެ ސިއްރުތައް ރައްކާތެރިކުރުމަކީ މިހާރު އެމެރިކާގެ ގައުމީ ސަލާމަތާ ގުޅިފައިވާ ކަމެއްގެ ގޮތުގައި އެގައުމުގެ ސަރުކާރުން ވަނީ ކަނޑައަޅާފައެވެ. ކުށް ސާބިތުވެއްޖެނަމަ އަލްހަސަންގެ މައްޗަށް ބޮޑު ޖަލު ހުކުމެއް އަންނާނެ ކަމަށް ބެލެވެއެވެ.
