ލަންކާގެ ގާނޫނީ ވަކީލު ބުއްދިކާ މައްލަވަރައްޗީ އާއި އޭނާގެ އަނބިމީހާ މަރައިލި މައްސަލައިގައި ދިވެހިރާއްޖެއިން ޑީޕޯޓްކޮށް ލަންކާ ފުލުހުންނާއި ހަވާލުކުރީ އުމުރުން 23 އަހަރުގެ ލަންކާގެ އެތުކަނދުުރާ އަށް ނިސްބަތްވާ މީހެއް ކަން ޚުލާސާ އަށް އެނގިއްޖެއެވެ.

އެނގިފައިވާ ގޮތުގައި އޭނާ އަކީ މިދިޔަ ފެބުރުއަރީ މަހުގެ 13 ވަނަ ދުވަހު، ލަންކާގެ ތަލަންގަމާ ސަރަހައްދުގެ ސުޕަމާކެޓެއްގެ ޕާކިންގައި އޮތް ކާރަކަށް ބަޑިން ޙަމަލާދީ ވަކީލުގެ ދެމަފިރިން މަރައިލި ގާތިލުން ގޮވައިގެން ދަތުރުކުރި ވެހިކަލް ދުއްވަން އިން ޑްރައިވަރެވެ.

މި މީހާއަކީ މީގެ ކުރިން (2021-2022) ރާއްޖޭގައި މަސައްކަތް ކޮށްފައިވާ މީހަކަށް ވާއިރު، މިފަހަރު ރާއްޖެއަށް އެތެރެވާން އުޅެނިކޮށް އިމިގްރޭޝަނުން ވަނީ އޭނާ ހިފަހައްޓާފައެވެ. ރާއްޖޭގެ އެއާޕޯޓުގެ ޑިޓެންޝަންގައި ބެހެއްޓުމަށްފަހު އިއްޔެ އޭނާ ވަނީ ލަންކާއަށް ޑީޕޯޓްކޮށްލާފައެވެ. އޭނާ ލަންކާގެ ބަންޑާރަނައިކަ އެއާޕޯޓަށް ދިޔުމާއެކު، ލަންކާގެ ސީއައިޑީ އިން ވަނީ އޭނާ ހައްޔަރުކޮށްފައެވެ.

ލަންކާ ފުލުހުން ބުނާ ގޮތުގައި މި މަރުގެ އަޑީގައި ހުރީ ލަންކާގެ ނުރައްކާތެރި ގޭންގު ލީޑަރެއް ކަމަށްވާ "ކަރަންދެނިޔާ ސުއްދަ" އެވެ. މަރާލެވުނު ވަކީލަކީ މި ގޭންގާ ގުޅުންހުރި ބައެއް މައްސަލަތަކުގައި ކޯޓުގައި ވަކާލާތު ކުރި މީހެކެވެ. ލަންކާގެ ކަމާބެހޭ އިދާރާތަކުން މިހާރު ދަނީ މި މައްސަލަ އިތުރަށް ތަހުގީގު ކުރަމުންނެވެ.