ދެކުނު އެފްރިކާގެ އެކި ސިޓީތަކުގައި ބިދޭސީންނާ ދެކޮޅަށް ފަށާފައިވާ ވަރުގަދަ މުޒާހަރާތަކާ ގުޅިގެން، އެ ގައުމުގެ ވިޔަފާރިތައް ބަންދުކޮށް، މަސްރަހު ކޮންޓްރޯލް ކުރުމަށް ފުލުހުންނާއި ސިފައިން މަގުތަކަށް ނެރެފިއެވެ.

މި މުޒާހަރާތައް ކުރިއަށްގެންދާ ގްރޫޕްތަކުން ވަނީ، ސައްހަ ލިޔެކިޔުން ނެތް ބިދޭސީން އަންގާރަ ދުވަހުގެ ކުރިން ގައުމުން ބޭރުވުމަށް "މުހުލަތެއް" ދީފައެވެ. އަދި އެ މުއްދަތުގައި ގައުމުން ބޭރުނުވާ ބިދޭސީން ހައްޔަރުކޮށް ޑީޕޯޓްކުރާނެ ކަމަށް ބުނެ އެ ފަރާތްތަކުން ދަނީ ދޮގު މައުލޫމާތު ފަތުރަމުންނެވެ. ދެކުނު އެފްރިކާގެ ސަރުކާރުން މި ވާހަކަތައް ދޮގުކުރި ނަމަވެސް، ބިރުވެރިކަން ބޮޑުވެ، އެތައް ހާސް ބިދޭސީންނެއް ދަނީ ގައުމު ދޫކޮށް ދިއުމަށް މަސައްކަތް ކުރަމުންނެވެ.

މި ހަމަނުޖެހުންތަކާ ގުޅިގެން ރައީސް ސައިރިލް ރާމަފޯސާ ވިދާޅުވީ، މުޒާހަރާ ކުރުމުގެ ހައްގަކީ އެހެން މީހުންނަށް ބިރުދެއްކުމާއި، މުދަލަށް ގެއްލުންދިނުން ނުވަތަ އަނިޔާވެރި އަމަލުތައް ހިންގަން އޮތް ހުއްދައެއް ނޫން ކަމަށެވެ. އަދި ގާނޫނު އަތްމައްޗަށް ނެގުމަކީ ބަލައިގަނެވޭނެ ކަމެއް ނޫން ކަމަށްވެސް އެމަނިކުފާނު ވިދާޅުވިއެވެ.

ޖޯހަނަސްބާގުން ރިޕޯޓްކުރާ ގޮތުގައި، މި މުޒާހަރާތަކުގައި އެކި ފަންތީގެ މީހުން ބައިވެރިވަމުންދާއިރު، އެމީހުންގެ މައިގަނޑު ޝަކުވާއަކީ ގައުމުގައި ތިބި ސައްހަ ލިޔެކިޔުން ނެތް ބިދޭސީންގެ މައްސަލައިގައި ސަރުކާރުން އެދެވޭ ފިޔަވަޅެއް ނޭޅުމެވެ. ވަޒީފާ ނެތް މީހުންގެ އަދަދު އިތުރުވުމާއި، އިގްތިސާދީ ދަތިތަކުގެ ޒިންމާ މުޒާހަރާގެ ބައިވެރިން އަޅުވަނީ ބިދޭސީންގެ އިސްތަށިފުލުގައެވެ.

މުޒާހަރާތައް ސުލްހަވެރިކަމާއެކު ކުރިއަށް ގެންދާނެ ކަމަށް ބުނި ނަމަވެސް، ބައެއް ސަރަހައްދުތަކުގައި ހަމަނުޖެހުން ހިންގައި، އިމާރާތްތަކުގެ ބިއްލޫރި ތަޅައި، މުދަލަށް ދަނީ ގެއްލުން ދެމުންނެވެ. މިގޮތުން ބައެއް ސަރަހައްދުތަކުގައި ރޯކޮށް، މަގުތައް ބަންދުކުރުމަށްވެސް ވަނީ މަސައްކަތް ކޮށްފައެވެ.

ވޭތުވެދިޔަ ހަފުތާތަކުގައި ހިންގި ބިދޭސީންނާ ދެކޮޅު ހަމަނުޖެހުންތަކުގައި މިހާތަނަށް މޮޒަމްބީކް، އިތިއޯޕިއާ އަދި މަލާވީގެ ބައެއް ރައްޔިތުން މަރުވެފައިވާ ކަމަށް ރިޕޯޓްތައް ބުނެއެވެ. މިކަމުގެ ސަބަބުން ގިނަ އަދަދެއްގެ ބިދޭސީން ދަނީ އެމީހުންގެ ގައުމުތަކުގެ ކޮންސިއުލޭޓްތަކުގައާއި ރައްކާތެރި ހިޔާވަހިކަންދޭ ތަންތަނުގައި ބޯހިޔާވަހިކަން ހޯދަމުންނެވެ. ބައެއް ގައުމުތަކުން މިހާރު ވަނީ އެ ގައުމުތަކުގެ ރައްޔިތުން އަނބުރާ ގެންދިއުމަށް ބަސްތަކާއި މަތިންދާބޯޓުތައް ފޮނުވަން ފަށާފައެވެ.

އަންނަ ނޮވެމްބަރު މަހު ބާއްވާ އިންތިޚާބާ ދިމާކޮށް ބައެއް ސިޔާސީ ފަރާތްތަކުން ބިދޭސީންނާ ދެކޮޅު ޝުއޫރުތައް ފަތުރަމުންދާއިރު، މިއީ ދެކުނު އެފްރިކާގައި ބިދޭސީންނަށް އަމާޒުކޮށް މިފަދަ ހަމަލާތަކެއް ދެވޭ ފުރަތަމަ ފަހަރެއް ނޫނެވެ. މީގެ ކުރިން 2008، 2015، އަދި 2019 ވަނަ އަހަރުވެސް މިފަދަ ނުރައްކާތެރި ހަމަލާތަކެއްގައި އެތައް ބަޔަކު ވަނީ މަރުވެފައެވެ.