ހުވަދު އަތޮޅުގައި ދެމުންދާ ރާއްޖެ ޓްރާންސްޕޯޓް ލިންކް (އާރްޓީއެލް) ފެރީގެ ދަތުރުތައް ކުއްލި ގޮތަކަށް ކެންސަލްވުމާއި ގުޅިގެން، ގއ. ދެއްވަދޫ އިން މާލެއަށް ދަތުރުކުރުމަށް ޓިކެޓް ނަގައިގެން ތިބި ފަސިންޖަރުންނަށް ބޮޑެތި ދަތިތަކަކާ ކުރިމަތިލާން ޖެހިއްޖެއެވެ.

ފަސިންޖަރުން ބުނި ގޮތުގައި މިއަދު ބޭއްވުމަށް ހަމަޖެހިފައި އޮތް ފެރީ ދަތުރު ކެންސަލްވިކަން އެމްޓީސީސީން އަންގާފައިވަނީ ރޭގެ ވަގުތެއްގައެވެ.

މި ކުއްލި ބަދަލުގެ ސަބަބުން، މާލެ ދިއުމަށްޓަކައި ކޫއްޑޫ ނުވަތަ ކާޑެއްދޫއިން ޑޮމެސްޓިކް ފްލައިޓްތަކަށް ޓިކެޓް ނަގައި، ފެރީ އާއި ގުޅުވައިގެން ދަތުރު ރާވައިގެން ތިބި ފަރާތްތަކުގެ ކަނެކްޝަންތައް މެދުކެނޑި، ބޮޑެތި ތަކްލީފުތަކެއް ވަނީ އުފުލަން ޖެހިފައެވެ.

ހުވަދު އަތޮޅަކީ އާރްޓީއެލް ނިޒާމުގެ ޒޯން 5 ގެ ދަށުން 13 ޖުލައި 2023 އިން ފެށިގެން ރަސްމީކޮށް ހިދުމަތް ދެމުން އަންނަ ސަރަހައްދެކެވެ. މި އަތޮޅުގައި ބާރުދުވެލީގެ ހައެއްކަ ފެރީ ބޭނުންކޮށްގެން ތަފާތު 9 ރޫޓެއްގައި ހަފްތާގެ ހަތް ދުވަހު އަންނަނީ ދަތުރުތައް ބާއްވަމުންނެވެ.

އާންމުކޮށް މޫސުން ގޯސްވުމުގެ ސަބަބުން ނުވަތަ ޓެކްނިކަލް މައްސަލަތަކާ ހުރެ ދަތުރުތައް މެދުކެނޑޭއިރު، ދަތުރުވެރިންނަށް ޓިކެޓްގެ ތާރީހު ބަދަލުކުރުމުގެ ފުރުސަތު އާރްޓީއެލް ޓްރެވަލް އެޕް މެދުވެރިކޮށް ލިބެއެވެ.

މިފަދަ ކުއްލި ހާލަތްތަކުގައި އިތުރު މައުލޫމާތު ސާފުކުރުމަށް އެމްޓީސީސީގެ ހޮޓްލައިން ނަންބަރު 1650 އަށް ގުޅުމަށް އެ ކުންފުނިން އިލްތިމާސްކުރެއެވެ.