ގޯލްޑެން ފުޓްސަލް ޗެލެންޖުގެ އެންމެ ކާމިޔާބު ރަށް ކަމަށްވާ ތިމަރަފުށި 6-8 ގެ ނަތީޖާއިން ބަލިކުރުމަށްފަހު ދެއްވަދޫ ސެމީ ފައިނަލަށް ދަތުރުކޮށްފި އެވެ.
މި މެޗުގެ ފުރަތަމަ ކޮޅުގައި ގޯލެއް ޖަހައި ލީޑު ނެގީ ތިމަރަފުށިންނެވެ. މި ގޯލު ކާމިޔާބުކުރީ އަބްދުﷲ ޖިއާން (ޖަންކީ) އެވެ. ފުރަތަމަ ހާފުގައި ދެއްވަދޫ އަށް ދެ ގޯލު ޖަހައި ނަތީޖާ އަނބުރާލީ މުހައްމަދު އިމްރާން (އިންމި) އެވެ.
ދެވަނަ ހާފުގައި ހަތް މިނެޓަށް ފަހު ފުރަތަމަ ގޯލެއް ފެނުނީ ތިމަރަފުށީގެ ފަރާތުންނެވެ. މި ގޯލު ކާމިޔާބުކުރީ ސިނާހު އެވެ. ތިމަރަފުށީގެ ތިން ވަނަ ގޯލު ލިބުނު ޕެނަލްޓީއެއްގައި ކާމިޔާބުކުރީ އަފްލާޒެވެ. ދެއްވަދޫގެ ތިން ވަނަ ގޯލު ކާމިޔާބުކުރީ މެޗު ނިމެން ތިން މިނެޓަށް ވެފައިވަނިކޮށް އަލީ ހައިޝަމް (ޗުމްޕު) އެވެ.
Advertisement
މެޗު އެއްވަރުވެ ޕެނަލްޓީގައި ދެއްވަދޫ މޮޅުވީ 6-8 ގެ ނަތީޖާއިންނެވެ. ޕެނަލްޓީ ވައްދާނުލެވުނީ ތިމަރަފުށި ސިނާހު އެވެ. އެ ޕެނަލްޓީ ދެއްވަދޫ ޓީމުގެ ކީޕަރު ޝަޒްލީލު ވަނީ މަތަކޮށްފަ އެވެ.
ރާއްޖޭގެ ގިނަ ބަޔަކު ލޯ ހުއްޓުނު މި މެޗުގައި ރާއްޖޭގައި ވިދާލެވޭ ފަދަ ގިނަ ކުޅުންތެރިން ކުޅުނެވެ. އޭގެ ތެރޭގައި ތިމަރަފުށްޓަށް ކުޅޭ އަހްމަދު އަފްލާޒާއި އިބްރާހިމް އަސްވަދު (ގަބޭ) ގެ އިތުރުން މިފަހަރުގެ މުބާރާތުގައި ތަފާތު މޮޅު ކުޅުމެއް ދެއްކި ޖަންކީ ހިމެނެ އެވެ.
ދެއްވަދޫ ޓީމަށް ބަލާއިރު ގައުމީ ފުޓްސަލް ޓީމުގައި ހިމެނޭ ހަތަރު ކުޅުންތެރިން ހިމެނެ އެވެ. އެއީ ގައުމީ ކެޕްޓަން އިންމި އާއި ހުޒައިފަތު ރަޝީދު (ހުޒޭ) އާއި އަލީ ހައިޝަމް (ޗުމްޕު)ގެ އިތުރުން އަހްމަދު ރާހިލް ރަޝީދު (ރާއްކޮ) އެވެ. އަދި މީގެ އިތުރުން ފުޓްސަލްގައި މޮޅު ކުޅުމެއް ދައްކަމުން އަންނަ އަހުނަފް ރަޝީދު (އަހުއްކޮ) ވެސް ދެއްވަދޫ ޓީމުގައި ހިމެނެ އެވެ.
މުބާރާތުގެ ސެމީ ފައިނަލުގައި ދެއްވަދޫ ވާދަކުރާނީ ވިލިމާލެއާ ދެކޮޅަށެވެ. ސެމީ ފައިނަލުން ވިލިމާލެ ޖާގަ ހޯދާފައިވަނީ ކުޑަހުވަދޫ 1-5 އިން ބަލިކޮށްގެންނެވެ.
ކުއާޓާ ފައިނަލުގައި މިރޭ ކުޅުނު އެހެން މެޗުތަކަށް ބަލާއިރު ދުވާފަރާއި އޭދަފުށި ބައްދަލުކުރި މެޗު ޕެނަލްޓީ ޖަހައިގެން 4-6 ގެ ނަތީޖާއިން ކާމިޔާބުކުރީ އޭދަފުށްޓެވެ.
ދެވަނަ މެޗުގައި މަތިވެރި މައްޗަށް 1-4 ގެ ނަތީޖާއިން ކާމިޔާބުކޮށް ސެމީގެ ދެވަނަ ޖާގަ ހޯދީ ނައިވާދޫ އެވެ. ސެމީގެ ފުރަތަމަ މެޗުގައި ބައްދަލުކުރާނީ އޭދަފުށްޓާއި ނައިވާދޫ އެވެ.
