ރާއްޖެ ޓްރާންސްޕޯޓް ލިންކް (އާރުޓީއެލް) ފެރީގެ ހިދުމަތް ޒޯން 4 ގައި ހިމެނޭ ފ. އަތޮޅާއި ދ. އަތޮޅުގައި ރަސްމީކޮށް ފަށައިފި އެވެ.

މި ހިދުމަތް ފައްޓަވައިދެއްވީ ފ. ނިލަންދޫ އަދި ދ. މީދޫގައި އިއްޔެ ބޭއްވި ހާއްސަ ރަސްމިއްޔާތުތަކެއްގައި ޓްރާންސްޕޯޓް މިނިސްޓަރު މުހައްމަދު އަމީން އެވެ.

މި ރަސްމިއްޔާތުތަކުގައި އިންޑިޔާގެ ހައިކޮމިޝަނަރު ބަލަސުބްރަމަނިޔާމް ގަންދަރަން އާއި، ނިލަންދޫ ދާއިރާގެ މެންބަރު ފާތިމަތު ސައުދާ އާއި، ކުޑަހުވަދޫ ދާއިރާގެ މެންބަރު ހުސެއިން ހަމީދު އަދި އެމްޓީސީސީގެ މެނޭޖިން ޑިރެކްޓަރު އަހުމަދު ސައުދީގެ އިތުރުން އެ ކުންފުނީގެ އިސްވެރިން ބައިވެރިވެވަޑައިގެންނެވިއެވެ.

އެމްޓީސީސީން ހާމަކުރި ގޮތުގައި މި ދެ އަތޮޅުގައި ފެރީގެ ހިދުމަތް ފެށުމަކީ ރައްޔިތުންނަށް އިގުތިސޯދީ އަދި އިޖުތިމާއީ ގޮތުން ބޮޑެތި ފައިދާތަކެއް ކުރާނެ ކަމެކެވެ. މި ހިދުމަތުގެ ސަބަބުން ރައްޔިތުން "ރަށު ބަންދުން" ވީއްލި، ދަތުރުފަތުރުގެ ލުއިފަސޭހަކަން ލިބިގެންދާނެ އެވެ. މި ދެ އަތޮޅުގައި ޖުމްލަ ހަ ރޫޓަކުން ހިދުމަތް ދޭއިރު، އޭގެ ތެރޭގައި ފ. އަތޮޅާއި ދ. އަތޮޅު ގުޅާލާ ދެ ރޫޓެއް ހިމެނެ އެވެ.

މި ދަތުރުތަކުގައި ބޭނުންކުރަނީ 48 މީހުންގެ ޖާގައިގެ، އޭސީ ކުރެވިފައިވާ ޒަމާނީ ފެރީތަކެކެވެ. މި އުޅަނދުތަކުގައި ހާއްސަ އެހީއަށް ބޭނުންވާ ފަރާތްތަކަށް ހަތަރު ސީޓު ހާއްސަކޮށްފައިވާއިރު، ވީލްޗެއާ އަދި ސްޓެޗާ ބޭނުންކުރާ ފަރާތްތަކަށްވެސް ހާއްސަ ޖާގަ ހުންނާނެ އެވެ. ފެރީތަކުގައި މަސައްކަތް ކުރާ ކައްޕިންނާއި ފަޅުވެރިންނަކީ މިކަމަށް ބޭނުންވާ ފުރިހަމަ ތަމްރީނު ލިބިފައިވާ މުވައްޒަފުންނެވެ.

އެމްޓީސީސީން ބުނީ މާދަމާއިން ފެށިގެން މިމަހުގެ 24 ވަނަ ދުވަހުގެ ނިޔަލަށް ކުރިއަށްދާނީ "އަހުލުވެރި ކަމުގެ ދަތުރު" ތަކެއް ކަމަށެވެ. މި މުއްދަތުގައި އާންމުންނަށް މުޅިން ހިލޭ ދަތުރުކުރެވޭނެ އެވެ. މި ދުވަސްތަކުގައި ދަތުރުތައް ހަމަޖެއްސުމަށް ރަށު ކައުންސިލްތަކާ ގުޅުމަށް އެ ކުންފުނިން އިރުޝާދުދެއެވެ. ފެރީގެ ހިދުމަތަށް އަގު ނަގަން ފަށާނީ މިމަހުގެ 25 ވަނަ ދުވަހުން ފެށިގެންނެވެ.

އެހެން ނަމަވެސް، އެންސްޕާގައި ރަޖިސްޓްރީވެފައިވާ ހާއްސަ އެހީއަށް ބޭނުންވާ ފަރާތްތަކަށް އަބަދުވެސް ހިލޭ ދަތުރުކުރެވޭނެ އެވެ. ފެރީގެ ޝެޑިއުލްތައް އާރުޓީއެލް ވެބްސައިޓުންނާއި މޮބައިލް އެޕް މެދުވެރިކޮށް ބަލާލެވޭނެ އެވެ. އިތުރު މައުލޫމާތު ހޯދުމަށް އެމްޓީސީސީގެ ހޮޓްލައިން 1650 އަށް ގުޅުމަށް އެ ކުންފުނިން އެދެ އެވެ.