ކ. މާފުށީ ބަނދަރު އަޕްގްރޭޑް ކުރުމުގެ ބިޔަ މަޝްރޫޢުގެ 83 އިންސައްތަ މަސައްކަތް މިހާރު ނިމިފައިވާ ކަމަށާއި، މިހާރު ސައިޓުގައި ކުރިއަށްދަނީ ބޮޑުހިލައިގެ ރިވެޓްމަންޓް ޖެހުމުގެ މަސައްކަތް ކަމަށް މަޢުލޫމާތު ލިބިއްޖެއެވެ.

މި މަޝްރޫއަކީ 82.5 މިލިއަން ރުފިޔާގެ މަޝްރޫއެކެވެ. މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) އާ މި މަސައްކަތް ހަވާލުކޮށްފައިވަނީ 23 ޖެނުއަރީ 2023 ގައެވެ. އަދި އީ.އައި.އޭ އެޕްރޫވަލް 21 މެއި 2023 ގައި ލިބުމާ ގުޅިގެން، މަޝްރޫއުގެ އަމަލީ މަސައްކަތް ފަށައިގަތުމަށް ސައިޓް މޮބިލައިޒްކޮށްފައިވަނީ 9 އެޕްރީލް 2023 ގައެވެ.

މި މަޝްރޫއުގެ ދަށުން ބަނދަރު ފުންކުރުމާއި، ނެރު ފުންކުރުމާއި، ކުރީގެ ބަނދަރު މަރާމާތުކޮށް ފުންކުރުމުގެ އިތުރުން ޕޭވްމަންޓް ހެދުމާއި، ބޭރުތޮށި ލުމާއި، ރިވެޓްމަންޓް ޖެހުމާއި، އެއްގަމުތޮށި ލުމުގެ މަސައްކަތް ހިމެނެއެވެ. މީގެއިތުރުން ބަނދަރު ބައްތި ހަރުކުރުމާއި، ސްކޯރ އެޕްރަން އެޅުމާއި، މޫރިންގ ބޮއި ހަރުކުރުމާއި، ރޭމްޕާއި ސިޑި އެޅުމުގެ އިތުރުން ގުޅުވައިދޭ ބްރިޖަކާއި ކޮންކްރީޓް ޖެޓީއެއް ހެދުން ވެސް މި މަޝްރޫޢުގައި ހިމެނެއެވެ.

މިހާތަނަށް ކުރެވިފައިވާ މައިގަނޑު މަސައްކަތްތަކުގެ ތެރޭގައި:

1. ގިރާ ސަރަޙައްދު ހިމާޔަތްކުރުމަށް 448 މީޓަރުގެ ބޮޑުހިލައިގެ ތޮށިލުން.
2. ޖިއޯބޭގް ބޭނުންކޮށްގެން 700 މީޓަރުގެ ގޮނޑުދޮށް ހިމާޔަތްކުރުން.
3. 655 މީޓަރުގެ ޕްރީކާސްޓް އެލް-ބްލޮކް އެއްގަމުތޮށި ލުން.
4. 96,961 ކިއުބިކް މީޓަރުގެ ސަރަޙައްދެއް ފުންކުރުން.
5. 1,765 އަކަމީޓަރުގެ ސަރަޙައްދެއްގައި ޕޭވްމަންޓް އެޅުން.
6. 19 މީޓަރުގެ ބްރިޖެއް އެޅުން.

ހަލުވިކަމާއެކު ކުރިއަށްދާ މި މަޝްރޫއު ނިމުމުން، މާފުށީގެ ބަނދަރުގެ އުމްރާނީ ވަސީލަތްތައް އިތުރަށް ފުރިހަމަވެ، ކަނޑުދަތުރުފަތުރުގެ ލުއިފަސޭހަކަން އިތުރުވެގެންދާނެއެވެ. އަދި މިއީ ފަތުރުވެރިކަމުގެ މުހިންމު މަންޒިލެއްގެ ގޮތުގައި ފާހަގަކުރެވޭ މާފުށީގެ އިގްތިސާދީ ހަރަކާތްތަކަށް ބޮޑު ކުރިއެރުމެއް ލިބިގެންދާނެ ކަމެކެވެ.