މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) އިން ކުރިއަށްގެންދާ "ހުނަވަރު އެޕްރެންޓިސްޝިޕް ޕްރޮގްރާމް 2026" ގައި ބައިވެރިވުމުގެ ފުރުސަތު މިއަދު ރަސްމީކޮށް ހުޅުވާލައިފިއެވެ.

މި ޕްރޮގްރާމުގެ މައިގަނޑު މަގްސަދަކީ ދިވެހި ޒުވާނުން ބާރުވެރިކުރުވައި، މަސައްކަތުގެ މައިދާނަށް ބޭނުންވާ ފަންނީ ހުނަރުތައް ތަރައްގީކޮށްދިނުމެވެ.

3 މަސްދުވަހުގެ މުއްދަތަށް ހިންގާ މި ޕްރޮގްރާމަކީ ސުޕަވައިޒަރުންގެ އެހީތެރިކަމާއެކު އަމަލީގޮތުން މަސައްކަތް ދަސްކޮށްދިނުމަށް އެކުލަވާލެވިފައިވާ ޕްރޮގްރާމެކެވެ. މިއަހަރު 12 ދާއިރާއަކުން 86 ޖާގަ ހުޅުވާލާފައިވާއިރު، ބައިވެރިންނަށް އެލަވަންސެއްގެ ގޮތުގައި މަހަކު 8,000 ރުފިޔާ ލިބޭނެއެވެ.

މި ޕްރޮގްރާމްގެ ތެރެއިން ބަސް އަދި ޓެކްސީ ޑްރައިވަރުންނާއި، މެކޭނިކުންނާއި، އިލެކްޓްރީޝަން އަދި ޕްރޮޖެކްޓް އޮފިސަރުން ފަދަ ތަފާތު ދާއިރާތަކުން ތަމްރީނުވުމުގެ ފުރުސަތު ލިބިގެންދާނެއެވެ. އަމަލީ ތަޖުރިބާގެ އިތުރުން މެންޓަރޝިޕް ފޯރުކޮށްދިނުމާއި، ކަސްޓަމަރ ސަރވިސް، ފަޔަރ ސޭފްޓީ އަދި ހޭލުންތެރިކުރުވުމުގެ ހާއްސަ ތަމްރީނުތައްވެސް ބައިވެރިންނަށް ލިބިގެންދާނެއެވެ. އަދި ޕްރޮގްރާމް ކާމިޔާބުކަމާއެކު ފުރިހަމަކުރާ ފަރާތްތަކުގެ މަސައްކަތުގެ ފެންވަރަށް ބެލުމަށްފަހު، އެމްޓީސީސީން ދާއިމީ ވަޒީފާގެ ފުރުސަތު ލިބުމުގެ މަގުވެސް ވަނީ ފަހިވެފައެވެ.

މި ޕްރޮގްރާމަށް ކުރިމަތިލުމުގެ ފުރުސަތު މިއަދުން ފެށިގެން، 2 ސެޕްޓެމްބަރު 2026 ވާ ބުދަ ދުވަހުގެ މެންދުރު 12:00 ގެ ނިޔަލަށް ވަނީ ހުޅުވައިލައިފައެވެ. ޝައުގުވެރިވާ ފަރާތްތަކުން އެމްޓީސީސީގެ ވެބްސައިޓްގެ ކެރިއާ ޕޭޖް މެދުވެރިކޮށް އެޕްލިކޭޝަން ހުށަހެޅޭނެ ކަމަށާއި އިތުރު މައުލޫމާތު ހޯއްދެވުމަށް އެމްޓީސީސީގެ އީމެއިލް info@mtcc.com.mv އަށް މެއިލް ކުރެއްވުމަށް ނުވަތަ ހޮޓްލައިން 1650 އަށް ގުޅުއްވުމަށް އެ ކުންފުނިން އެދެއެވެ.