ރާއްޖޭގެ އިގްތިސާދުގެ ހަގީގީ ވަރުގަދަކަން ގުޅިފައިވަނީ ރާއްޖޭގެ އެކި ކަންކޮޅުތަކުގައި ކުރިއެރުމާއި ފުރުސަތުތައް ފަހިކޮށްދޭ އެތައް ހާސް ކުދި އަދި މެދުފަންތީގެ ވިޔަފާރިތަކާ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.

ބައިނަލްއަގްވާމީ ކުދި އަދި މެދުފަންތީގެ ވިޔަފާރިތަކުގެ ދުވަހާ ގުޅިގެން ސޯޝަލް މީޑިއާގައި ކުރެއްވި ޕޯސްޓެއްގައި ރައީސް ވިދާޅުވީ، ރާއްޖޭގެ އިގްތިސާދު އިތުރަށް ވަރުގަދަކޮށް، ދެމެހެއްޓެނިވި ގޮތެއްގައި ބިނާކުރުމަށް މިފަދަ ވިޔަފާރިތަކުން އަދާކުރާ ދައުރު ސަރުކާރުން ބަލައިގަންނަ ކަމަށެވެ.

ރައީސް އިތުރަށް ވިދާޅުވީ، "މޯލްޑިވްސް 2.0" ގެ ދަށުން ވިޔަފާރިތަކަށް ބޭނުންވާ މާލީ އެހީތެރިކަމާއި، ޑިޖިޓަލް ވަސީލަތްތަކާއި، އުމްރާނީ ތަރައްގީގެ އިތުރުން ދުނިޔޭގެ ބާޒާރުތަކަށް ދިވެހި އުފެއްދުންތައް ނެރުމަށް މަގުފަހިކޮށްދެމުންދާ ކަމަށެވެ. މިގޮތުން ސަގާފީ މަސައްކަތްތެރިންނަށް ހާއްސަ މަރުކަޒުތަކާއި، 'ކްރިއޭޓަރ ހަބް' އަދި އެސް.އެމް.އީ ޑިޖިޓަލް ފައިނޭންސިންގް ތައާރަފްކުރުމަކީ ކުރިއެރުމަށް ހުޅުވައިދެވޭ އާ މަގުތަކެއްކަން އެމަނިކުފާނު ފާހަގަކުރެއްވިއެވެ.

ބައިނަލްއަގްވާމީ ބާޒާރުތަކަށް ދިވެހި ވިޔަފާރިތައް ވާސިލުކޮށްދިނުމަށްޓަކައި އަލީބާބާ އަދި ޕޭޕަލް ފަދަ ވަސީލަތްތައް މެދުވެރިކޮށް ފުރުސަތުތައް ހޯދައިދިނުމަކީ ސަރުކާރުގެ މުހިންމު އަމާޒެކެވެ. ރައީސް ވިދާޅުވި ގޮތުގައި ސަރުކާރުގެ ސިޔާސަތަކީ ހުރިހާ ފަރާތްތަކަށްވެސް ހަމަހަމަކަމާއެކު ފުރުސަތުތައް ލިބިދިނުމެވެ.

މީގެއިތުރުން، 2026 އަދި 2027 ވަނަ އަހަރަކީ ކުދި އަދި މެދުފަންތީގެ ވިޔަފާރިތައް ކުރިއެރުވުމަށް ހާއްސަ ކުރެވިފައިވާ ދެ އަހަރުކަން ރައީސް އިއުލާނު ކުރެއްވިއެވެ. ސަރުކާރުގެ އަމާޒަކީ ކޮންމެ ވިޔަފާރިވެރިއަކަށްމެ އެ ފަރާތެއްގެ ވިޔަފާރި ކުރިއަރުވައި ފުޅާކުރުމަށް ބޭނުންވާ ފުރިހަމަ އެހީތެރިކަމާއި އެއްބާރުލުން ލިބޭނެ އިގްތިސާދެއް ބިނާކުރުން ކަމަށްވެސް ރައީސް ވިދާޅުވިއެވެ.