ފްރާންސްގެ ހެޑް ކޯޗު ޑިޑިއޭ ޑެޝޯމްޕްސް، މަންމަ ނިޔާވުމާ ގުޅިގެން މިރޭ ނޯވޭއާ ދެކޮޅަށް ކުޅޭ ވޯލްޑް ކަޕް މެޗުގައި ޓީމަށް އިރުޝާދު ދިނުމަށް ބެންޗުގައި ނުހުންނާނެ ކަމަށް ފްރާންސްގެ ފުޓްބޯޅަ ފެޑެރޭޝަނުން (އެފްއެފްއެފް) ކަށަވަރުކޮށްދީފިއެވެ. 2026 ގެ ވޯލްޑް ކަޕްގެ ގްރޫޕް އައި ގެ ފަހު މެޗުގައި މިރޭ ފްރާންސް ނުކުންނާނީ ނޯވޭއާ ދެކޮޅަށެވެ.
ފްރާންސް ފުޓްބޯޅަ ފެޑެރޭޝަނުން ހާމަކުރި ގޮތުގައި، އުމުރުން 57 އަހަރުގެ ކޯޗު ޑެޝޯމްޕްސްއަށް އޭނާގެ މަންމަ ނިޔާވި ޚަބަރު ލިބުނީ މިދިޔަ އަންގާރަ ދުވަހުގެ ހެނދުނުގެ ވަގުތެއްގައެވެ. އެއާއެކު، މަންމަގެ ޖަނާޒާގައި ބައިވެރިވުމަށްޓަކައި އޭނާ ވަނީ އެމެރިކާގައި ހުރި ފްރާންސް ޓީމުގެ ކޭމްޕް ދޫކޮށް ގައުމަށް އެނބުރި ގޮސްފައެވެ.
ފެޑެރޭޝަންގެ ރައީސް ފިލިޕް ޑިއާލޯގެ ހުއްދައާއެކު، ޑެޝޯމްޕްސް އެނބުރި ގައުމަށް ދިޔުމުން، މިރޭގެ މެޗުގައި ޓީމަށް އިރުޝާދު ދިނުމުގެ ޒިންމާ ހަވާލުކޮށްފައިވަނީ އޭނާގެ އެސިސްޓަންޓް ކޯޗު ގާއި ސްޓެފަން އާއެވެ. ސްޓެފަން އަކީ ޑެޝޯމްޕްސްއާ އެކު ގިނަ ދުވަސްތަކެއް ވަންދެން މަސައްކަތް ކޮށްފައިވާ ތަޖުރިބާކާރު ކޯޗެކެވެ.
Advertisement
ފްރާންސް ވަނީ މުބާރާތުގައި އެންމެ ފަހުން ކުޅުނު ދެ މެޗުން ސެނެގާލް (3-1) އަދި އިރާގު (3-0) ބަލިކޮށް، މުބާރާތުގެ ގަދަ 32 ގެ ބުރުން ޖާގަ ކަށަވަރުކޮށްފައެވެ. ނަމަވެސް، މިރޭ ނޯވޭއާ ދެކޮޅަށް ކުޅޭ މެޗަކީ ގްރޫޕްގެ އެއްވަނަ ކަށަވަރު ކުރުމަށް ދެ ޓީމަށްވެސް މުހިންމު މެޗެކެވެ. ލަނޑުގެ ތަފާތުން ކުރީގައި އޮތުމުން، މިރޭގެ މެޗުން އެއްވަރުކޮށްލައިގެންވެސް ފްރާންސަށް ގްރޫޕްގެ އެއްވަނަ ލިބޭނެއެވެ.
ޑެޝޯމްޕްސްއަކީ 2012 އިން ފެށިގެން ފްރާންސްގެ ހެޑް ކޯޗުކަން ކުރަމުން އަންނަ، އަދި 2018 ގެ ވޯލްޑް ކަޕް އެ ގައުމަށް ހޯދައިދިން ކާމިޔާބު ކޯޗެކެވެ. އޭނާ ވަނީ މި ފަހަރުގެ ވޯލްޑް ކަޕަށްފަހު މަގާމުން ވަކިވާނެކަން ކުރިން އިއުލާންކޮށްފައެވެ. ރިޕޯޓްތައް ބުނާގޮތުން، މިރޭގެ މެޗަށްފަހު ހޮނިހިރު ދުވަހު އޭނާ އަލުން އެނބުރި ޓީމާ ގުޅޭނެއެވެ.
