ވަޒީފާގެ މަސްއޫލިއްޔަތުތައް ފުރިހަމައަށް އަދާނުކުރުމާއި، ވަޒީފާގެ ވަގުތަށް ފަރުވާކުޑަކުރުމަކީ އަމާނާތަށް ވެވޭ ވަރަށް ބޮޑު ހިޔާނާތެއް ކަމަށް މިއަދުގެ ހުކުރު ހުތުބާގައި ބަޔާންކޮށްފިއެވެ.

މިއަދު ރާއްޖޭގެ އެކިކޮޅުތަކުގައި އިއްވި ހުތުބާ ހާއްސަކޮށްފައިވަނީ "އަމާނާތްތަކަށް ރައްކާތެރިވުން" މި މައުޟޫއުގެ މައްޗަށެވެ.

ހުތުބާގައި ބަޔާންކުރި ގޮތުގައި، އަމާނާތަކީ ހަމައެކަނި މީހަކު ރައްކާކުރަން ހަވާލުކުރާ މުދަލެއް ނޫނެވެ. އޭގެ މާނަ މާ ފުޅާވެގެންވާ ކަމަށާއި، އޭގެ ތެރޭގައި މާތް اللهގެ ހައްގުތަކާއި މީސްތަކުންގެ ހައްގުތައް ހިމެނޭ ކަމަށް ވިދާޅުވިއެވެ. މީގެ ތެރޭގައި ނަމާދު ގާއިމުކުރުމާއި، ޒަކާތް ދިނުމާއި، ތެދުބަސް ބުނުމާއި، ދަރަނި އަދާކުރުމުގެ އިތުރުން މާތް الله އިންސާނާއަށް ދެއްވާފައިވާ ލޮލާއި، ކަންފަތާއި، ދުލާއި ގުނަވަންތަކަކީވެސް އަމާނާތްތަކެއް ކަމަށް ހަނދާންކޮށްދިނެވެ.

ހުތުބާގައި ވަނީ ވަޒީފާއާއި މަސްއޫލިއްޔަތުތަކަށް އިހުމާލުވުމުގެ ނުރައްކާތެރިކަމަށް އަލިއަޅުވާލާފައެވެ. ދައުލަތާއި ރައްޔިތުންގެ މުދަލާއި ފައިސާއަކީ ބޮޑުވެގެންވާ އަމާނާތެއް ކަމަށާއި، ވަޒީފާގެ ވަގުތަށް ފަރުވާކުޑަކުރުމަކީ އެ އަމާނާތަށް ހިޔާނާތްތެރިވުން ކަމަށް ހުތުބާގައި ބަޔާންކުރިއެވެ. އަދި މީހެއްގެ އަމިއްލަ މުދަލަށް ހިޔާނާތްތެރިވުމަށްވުރެ، މުޅި މުޖުތަމައުގެ ހައްގު އެކުލެވޭ ރައްޔިތުންގެ މުދަލަށް ހިޔާނާތްތެރިވުމުގެ ފާފަ މާ ބޮޑުކަންވެސް ފާހަގަކުރެއްވިއެވެ.

މާތް ނަބިއްޔާ ﷺ ގެ ހަދީޘްފުޅުތަކާ ހަވާލާދީ ހުތުބާގައި ބަޔާންކުރީ، އަމާނާތަށް ހިޔާނާތްތެރިވުމަކީ މުނާފިގުންގެ ސިފައެއް ކަމަށެވެ. އަދި އަމާނާތްތަކަށް ރައްކާތެރިވުމަކީ ފިރުދައުސޭ ކިޔުނު މަތިވެރި ސުވަރުގޭގެ ވާރުތަވެރިންގެ ސިފައެއް ކަމަށް މާތް الله ވަހީކުރައްވާފައިވާކަން ހުތުބާގައި ހަނދާންކޮށްދިނެވެ.

އަމާނާތުގެ ބުރަދަނާ ގުޅޭގޮތުން ވާހަކަދައްކަމުން ހުތުބާގައި ބަޔާންކުރީ، އުޑުތަކާއި ބިމާއި ފަރުބަދަތަކަށް މި އަމާނާތް ހުށަހެޅުމުން، އޭގެ މަސްއޫލިއްޔަތު ބޮޑުކަމުން އެ ތަކެތި އެކަމާ ބިރުވެތިވެ އިންކާރު ކުރި ކަމަށެވެ. ނަމަވެސް ބަލިކަށި އިންސާނާ އެ ބުރަ އަމާނާތާ ހަވާލުވީ ކަމަށާއި، އެހެންކަމުން ގިޔާމަތް ދުވަހުން މި ހުރިހާ އަމާނާތަކާ މެދު ސުވާލުކުރެވޭނެ ކަމަށް ހުތުބާގައި ހަނދާންކޮށްދިނެވެ.

ހުތުބާ ނިންމާލަމުން، ތިމާގެ ނަފުސަށާއި، އަނބިދަރިންނަށާއި، އަދާކުރާ ވަޒީފާއަށާއި، ރައްޔިތުންގެ މުދަލަށް ފުރިހަމައަށް އަމާނާތްތެރިވުމަށް ވަނީ ގޮވާލާފައެވެ. އަދި ގުދުރަތީ ވެށްޓާއި ދިރޭތަކެއްޗަކީވެސް އަންނާން އޮތް ޖީލުތަކަށްޓަކައި ރައްކާތެރިކުރަންޖެހޭ އަމާނާތެއްކަން ހަނދާންކޮށްދީ، ހުރިހާ ކަމެއްގައިވެސް މާތް الله އަށް ބިރުވެތިވުމަށް ނަސޭހަތްތެރިވިއެވެ.