ދައުލަތުގެ ދަރަނި އަދާކުރުމަށްޓަކައި ޚާއްޞަކޮށްގެން އުފައްދާފައިވާ ސޮވެރިން ޑިވެލޮޕްމަންޓް ފަންޑް (އެސްޑީއެފް) އަށް މި އަހަރުގެ މިހާތަނަށް އެއް ބިލިއަން ރުފިޔާ ޖަމާކޮށްފިއެވެ.

ފިނޭންސް މިނިސްޓްރީން އާންމުކޮށްފައިވާ އެންމެ ފަހުގެ ތަފާސްހިސާބުތަކުން ދައްކާ ގޮތުގައި، މިދިޔަ ޖޫން މަހުގެ ހަތަރު ވަނަ ދުވަހާ ހަމައަށް އެސްޑީއެފަށް ވަނީ ޖުމްލަ އެއް ބިލިއަން ރުފިޔާ ޖަމާކުރެވިފައެވެ. މިދިޔަ އަހަރުގެ އެ މުއްދަތުގައި މި ފަންޑަށް ޖަމާކުރެވިފައިވަނީ 934 މިލިއަން ރުފިޔާއެވެ.

މި އަހަރުގެ ބަޖެޓުގައި އެސްޑީއެފަށް ޖުމްލަ 2.4 ބިލިއަން ރުފިޔާ ޖަމާކުރުމަށް ސަރުކާރުން ވަނީ އަމާޒު ހިފާފައެވެ. އެހެންކަމުން، އަހަރުގެ މިހާ ހިސާބަށް އައިއިރު ބަޖެޓުގައި ކަނޑައެޅި އަމާޒުގެ 40 އިންސައްތަ ވަނީ ހާސިލުކުރެވިފައެވެ.

ސޮވެރިން ފަންޑަކީ ދައުލަތުގެ ދަރަނި އަދާކުރުމަށް ދުރާލައި ތައްޔާރުވުމުގެ ގޮތުން 2017 ވަނަ އަހަރު އުފެއްދި ފަންޑެކެވެ. މި ފަންޑަށް މައިގަނޑު ގޮތެއްގައި ފައިސާ ޖަމާކުރަނީ އެއާޕޯޓް ޑިވެލޮޕްމަންޓް ފީގެ ގޮތުގައި ލިބޭ އާމްދަނީ އާއި ވެލާނާ އިންޓަނޭޝަނަލް އެއާޕޯޓުން ދޭ ހިދުމަތްތަކުގެ އަގަށް ގެނައި ބަދަލުތަކުން އިތުރުވާ ފައިސާއިންނެވެ.

ރައީސް މުއިއްޒުގެ ސަރުކާރުން ދަނީ ދައުލަތުގެ ދަރަނި މެނޭޖްކުރުމަށް މި ފަންޑުގެ ބޭނުން ހިފަމުންނެވެ. އެގޮތުން، މި އަހަރުގެ ތެރޭގައި ދައުލަތުގެ ދަރަނީގެ ބޮޑު ބައެއް މި ފަންޑު މެދުވެރިކޮށް ދައްކާފައިވާއިރު، މީގެ ތެރޭގައި ސުކޫކު ދެއްކުން ވެސް ހިމެނެއެވެ. ބަޖެޓުގައިވާ ގޮތުން މި އަހަރުގެ ދަރަނި އަދާކުރުމަށް މި ފަންޑުން 4.1 ބިލިއަން ރުފިޔާ ބޭނުންކުރުމަށް ވަނީ ހަމަޖެހިފައެވެ.

ދައުލަތުގެ މިއަހަރުގެ ބަޖެޓަށް ބަލާއިރު، ދަރަނި ދެއްކުމަށާއި އިންޓްރެސްޓް ހަރަދަށް ޖުމްލަ 18.4 ބިލިއަން ރުފިޔާ ހޭދަވާނެ ކަމަށް ލަފާކުރެވެއެވެ. މިއީ މުޅި ބަޖެޓުގެ ގާތްގަނޑަކަށް 29 އިންސައްތައެވެ. މިދިޔަ އަހަރު ނިމުނުއިރު އެސްޑީއެފް ފަންޑުގެ ޖުމްލަ ސައިޒަކީ 10.9 ބިލިއަން ރުފިޔާއެވެ. މީގެ ތެރެއިން ބޮޑު ބައެއް ސަރުކާރުގެ ޓީބިލްތަކުގައި އިންވެސްޓްކޮށްފައިވާއިރު، ބޭނުންކުރެވޭ ގޮތަށް އޭރު ހުރީ 2.4 ބިލިއަން ރުފިޔާއެވެ.