އަމިއްލަ ނަފުސަށް އިތުބާރުކުރާ، އަގީދާ ވަރުގަދަ، ރޫހާނީ އަދި ޖިސްމާނީ ގޮތުން ދުޅަހެޔޮ، އަދި ދިވެހި ގައުމިއްޔަތަށް ލޯބިކުރާ ޒިންމާދާރު ޒުވާން ޖީލެއް ބިނާކުރުމަށް ސަރުކާރުން ފަށާފައިވާ "ދިވެހި ވަތަނީ ހިދުމަތުގެ ފަންނީ ތަމްރީނު" ޕްރޮގްރާމްގެ ދެވަނަ ކޯސް މިއަދު ރަސްމީކޮށް ފަށައިފިއެވެ.

ރައީސުލްޖުމްހޫރިއްޔާ އަދި ސިފައިންގެ އެންމެ މަތީ ވެރިޔާ ޑރ. މުހައްމަދު މުއިއްޒުގެ އިސްނަންގަވައިގެން ކުރިއަށްގެންދާ މި ޕްރޮގްރާމްގެ ދެވަނަ ބުރު އިފްތިތާހްކުރުމަށް ބޭއްވި ރަސްމިއްޔާތު އޮތީ މިއަދު ބ. ކިހާދޫގައި ހުންނަ އެމްއެންޑީއެފް ސަރވިސް ކޯރގެ، ސްކޫލު އޮފް އިންޖިނިއަރިންގ އެންޑް ލޮޖިސްޓިކްސްގައެވެ. މި ރަސްމިއްޔާތު ޝަރަފުވެރިކޮށްދެއްވީ ޗީފް އޮފް ޑިފެންސް ފޯސް، މޭޖަރ ޖެނެރަލް އިބްރާހީމް ޙިލްމީއެވެ.

ނޭޝަނަލް ސަރވިސް ސްކިލްސް ޓްރޭނިންގ ޕްރޮގްރާމުގެ މައިގަނޑު މަގްސަދަކީ، ނަފުސާނީ ގޮތުންނާއި ޖިސްމާނީ ގޮތުން ދުޅަހެޔޮ، އަހުލާގީ ގޮތުން ހަރުދަނާ، ފަންނީ ގޮތުން ހުނަރުވެރި، އަދި އިހުލާސްތެރި އަބުރުވެރި ޒުވާނުންތަކެއް މުޖުތަމަޢަށް ނެރުމެވެ.

16 ހަފުތާގެ މުއްދަތަށް ކުރިއަށްގެންދާ މި ޕްރޮގްރާމްގެ ދެވަނަ ސީރީޒްގައި ރާއްޖޭގެ 17 އަތޮޅަކުން ޖުމްލަ 75 ބައިވެރިން ބައިވެރިވެއެވެ. މީގެ ތެރޭގައި ހިމެނެނީ 62 ފިރިހެން ބައިވެރިންނާއި 13 އަންހެން ބައިވެރިންނެވެ. މި ކޯހުގެ ބައިވެރިން ތަމްރީނުތަކަށް ކިހާދޫއަށް ރިޕޯޓްކޮށްފައިވަނީ މި މަހުގެ 3 ވަނަ ދުވަހުއެވެ.

މިއަދުގެ ރަސްމިއްޔާތުގައި ކޯހުގެ މުދައްރިބުންނަށް ވައުދު ލައިދިނުމާއި ދަރިވަރުންގެ އަޒުމް އައުކުރުން އޮތެވެ. މުދައްރިބުންނަށް ވައުދު ލައިދެއްވީ ކެޕްޓަން މުހައްމަދު ޝަރީފެވެ. އަދި ދަރިވަރުންގެ އަޒުމް އައުކޮށްދެއްވީ މޭޖަރ ހުސައިން ޝާހިދެވެ.

ހަތަރު މަސްދުވަހުގެ މި ތަމްރީނު ޕްރޮގްރާމްގައި އޮޓޯ މޯބައިލް އިންޖިނިއަރިންގ، މެރިން އިންޖިނިއަރިންގ، އިލެކްޓްރީޝަން، ރެފްރިޖެރޭޝަން، ވެލްޑިންގ، މެޓަލް ފެބްރިކޭޝަން އަދި އޮފީސް މެނޭޖުމަންޓް ފަދަ މުހިންމު ދާއިރާތަކުން އަމަލީ ހުނަރުތައް އުނގަންނައިދޭނެއެވެ. މި ކޯސް ފުރިހަމަކުރާ ދަރިވަރުންނަށް މޯލްޑިވްސް ކޮލިފިކޭޝަން އޮތޯރިޓީން ޤަބޫލުކުރާ ލެވެލް 3 ގެ ސެޓިފިކެޓެއް ލިބޭނެއެވެ.

މި ޕްރޮގްރާމްގައި ކިޔަވައިދެއްވަނީ އެކި ފަންނީ ދާއިރާތަކުން ގިނަ ދުވަހު އަމަލީ ތަޖުރިބާ ހޯއްދަވާފައިވާ ސިފައިންގެ ތަޖުރިބާކާރު އިންސްޓްރަކްޓަރުންނެވެ. މިއަދުގެ ރަސްމިއްޔާތުގައި އެމްއެންޑީއެފްގެ އިސް އޮފިސަރުންނާއި، ކޯހުގެ މުދައްރިބުންނާއި ދަރިވަރުން ބައިވެރިވިއެވެ.