އާޝޫރާ ދުވަހަކީ ހެޔޮކަމާއި ޢިބުރަތުން ފުރިގެންވާ ދުވަހެއްކަން ހުކުރު ހުތުބާގައު ބަޔާންކޮށްދީފައިވެއެވެ.

ހުތުބާގައި ފާހަގަކުރެއްވި ގޮތުގައި، އާޝޫރާ ދުވަހަކީ އަނިޔާވެރި ފިރުއައުނުގެ ކިބައިން މޫސާގެފާނާއި އެކަލޭގެފާނަށް ތަބާވީ މީހުން (ބަނީ އިސްރާއީލުން) މާތް الله ސަލާމަތްކޮށްދެއްވި ދުވަހެވެ. އަދި ފިރުއައުނާއި އޭނާގެ ލަޝްކަރު ކަނޑަށް އަރަގުކުރެއްވީވެސް އެ ދުވަހުއެވެ. މި މަތިވެރި ނިއުމަތަށް ޝުކުރުވެރިވުމުގެ ގޮތުން މޫސާގެފާނު އެ ދުވަހު ރޯދަހިއްޕެވި ކަމަށާއި، ކީރިތި ރަސޫލާ ﷺ މަދީނާއަށް ހިޖުރަކުރެއްވުމަށްފަހު، އެކަލޭގެފާނުވެސް އެ ދުވަހު ރޯދަހިއްޕަވައި މުސްލިމުންނަށް އެކަމަށް އަމުރުކުރެއްވިކަން ހުތުބާގައި ހަނދާންކޮށްދެއްވިއެވެ.

އާޝޫރާ ދުވަހުގެ ރޯދައިގެ ސަވާބާ ބެހޭގޮތުން ރަސޫލާ ﷺ ހަދީޘްކުރައްވާފައިވާ ބަސްފުޅެއްގެ މާނައިގައިވެއެވެ. "ޢާޝޫރާ ދުވަހު ރޯދަހިފުމަކީ ވޭތުވެދިޔަ އަހަރުގެ ކުދި ފާފަތައް މާތް الله ފުއްސަވައިދެއްވާނެ ކަމެއްކަމުގައި ތިމަންކަލޭގެފާނު އުންމީދުކުރައްވަމެވެ." އަދި ޔަހޫދީންނާ ހިލާފުވުމުގެ ގޮތުން، 10 ވަނަ ދުވަހުގެ އިތުރުން އޭގެ ކުރީ ދުވަހު (9 ވަނަ ދުވަހު) ނުވަތަ ފަހު ދުވަހު (11 ވަނަ ދުވަހު) ރޯދަހިފުމަކީ ސުންނަތްވެގެންވާ ގޮތްކަން ހުތުބާގައި ތަފްސީލުކޮށްދެއްވިއެވެ.

މީގެ އިތުރުން، މިއަދުގެ ހުތުބާގައި ވަނީ ދީނުގެ ނަމުގައި ހިންގޭ ބައެއް ބިދުޢަތަކާއި ނުރަނގަޅު އާދަކާދަތަކަށް ސަމާލުވުމަށް ގޮވާލައްވާފައެވެ. ހާއްސަކޮށް ޢާޝޫރާ ދުވަހާ ދިމާކޮށް ހިތާމަފާޅުކުރުމުގެ ގޮތުން ހިންގާ ދީނާ ހިލާފު ކަންކަމަކީ އިސްލާމީ ޝަރީއަތުގައި އޮތް ކަންކަން ނޫން ކަމަށާއި، އެފަދަ ކަންކަމުން ދުރުހެލިވުމަށް ނަސޭހަތްތެރިވިއެވެ.

ހުތުބާ ނިންމަވާލައްވަމުން، މުސްލިމް އުންމަތަށް ގޮވާލެއްވީ މާތް اللهއަށް ބިރުވެތިވެ، ތަޤުވާވެރިވުމަށެވެ. އަދި އާޝޫރާ ދުވަހުގެ މަތިވެރި ފުރުސަތުގެ ބޭނުން ހިފައި، ރޯދަހިފުމާއި ހެޔޮ އަމަލުތައް ކުރުމުގައި ދެމިތިބުމަށް ބާރުއެޅުއްވިއެވެ. މި ދުވަސްވަރަކީ މުހައްރަމު މަސް ނުވަތަ އިސްލާމީ އާ އަހަރުގެ ފެށުން ކަމަށްވާއިރު، މިއީ ހުރުމަތްތެރިވެގެންވާ މައްސަރެއްކަންވެސް ހުތުބާގައި ވަނީ ފާހަގަކުރައްވާފައެވެ.