ހުޅުމާލޭގެ ފަޅުތެރެއަށް ގިނަ އަދަދެއްގެ ކުނި ޖަމާވަމުންދާ މައްސަލައަށް ދާއިމީ ހައްލެއް ހޯދުމަށްޓަކައި، ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ) އިސްނަގައިގެން ކަމާބެހޭ މުއައްސަސާތަކާއެކު މުހިންމު މަޝްވަރާ ބައްދަލުވުމެއް ބާއްވައިފިއެވެ.
މި ބައްދަލުވުމުގައި އެޗްޑީސީގެ އިތުރުން ވޭސްޓް މެނޭޖްމަންޓް ކޯޕަރޭޝަން (ވެމްކޯ)، ޔުޓިލިޓީ ރެގިއުލޭޓަރީ އޮތޯރިޓީ (ޔޫއާރުއޭ)، އެންވަޔަރަންމަންޓް ޕްރޮޓެކްޝަން އެޖެންސީ (އީޕީއޭ) އަދި މިނިސްޓްރީ އޮފް ކްލައިމެޓް ޗޭންޖް، އެންވަޔަރަންމަންޓް އެންޑް އެނަރޖީގެ އިސް ބޭފުޅުން ބައިވެރިވެވަޑައިގެންނެވިއެވެ.
މި ބައްދަލުވުމުގެ މައިގަނޑު މަގްސަދަކީ ހުޅުމާލެ ފަޅުތެރެއަށް ކުނި އެޅޭ މައްސަލަ ހުއްޓުވުމަށާއި، މިހާރު ޖަމާވެފައިވާ ކުނިތައް ނައްތާލުމުގައި އިދާރާތައް ގުޅިގެން މަސައްކަތް ކުރާނެ އުސޫލުތަކެއް ކަނޑައެޅުމެވެ. ހާއްސަކޮށް ފަޅުތެރެއަށް ކުނި އެޅެން ދިމާވާ ސަބަބުތައް ދެނެގަނެ، އެކަން ތަކުރާރު ނުވާނެ ފަދަ ދާއިމީ ނިޒާމެއް ގާއިމުކުރުމާ ގުޅޭގޮތުން ފުޅާ ދާއިރާއެއްގައި ވަނީ މަޝްވަރާކޮށްފައެވެ.
Advertisement
ފަހަކަށް އައިސް ހުޅުމާލޭ ފަޅުތެރެއަށް ގިނަ އަދަދެއްގެ ޕްލާސްޓިކާއި އެހެނިހެން ކުނި ޖަމާވަމުންދާތީ، އެ ސަރަހައްދު ބޭނުންކުރާ އާންމުން ދަނީ ކަންބޮޑުވުން ފާޅުކުރަމުންނެވެ. މިކަމުގެ ސަބަބުން ކަނޑުގެ ދިރުންތަކަށް ނުރައްކާވެ، ސަރަހައްދުގެ ރީތިކަން ގެއްލި، ނުބައިވަސް ދުވުމުގެ މައްސަލަ ވެސް ވަނީ ކުރިމަތިވެފައެވެ.
އެޗްޑީސީން ބުނީ، ކަމާބެހޭ ހުރިހާ މުއައްސަސާތަކެއް ގުޅިގެން މި މައްސަލައަށް އަވަސް އަދި ހަރުދަނާ ހައްލެއް ހޯދުމަށް މިހާރު މަސައްކަތްތަކެއް ފެށިފައިވާ ކަމަށެވެ. އަދި ތިމާވެށި ރައްކާތެރިކުރުމަކީ އެ ކޯޕަރޭޝަނުން ވަރަށް ބޮޑު އިސްކަމެއް ދޭ ކަމެއް ކަމަށްވެސް އެޗްޑީސީން ފާހަގަކުރެއެވެ.
