ދިވެހިރާއްޖޭގެ ކަނޑުގެ ސަރަހައްދުން ބައެއް ގެއްލިގެންދިޔައީ ނިމިދިޔަ ސަރުކާރުން ބޭރުގެ ވަކީލުންނަށް ރައްޔިތުންގެ ފައިސާއިން މިލިއަނުން ހަރަދުކޮށްގެން ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.

ދ. މީދޫ އިން ނިމިދިޔަ ކައުންސިލް އިންތިހާބުގައި ހޯއްދެވި ކާމިޔާބީ ފާހަގަކުރަން އެރަށުގައި ބޭއްވި ޖަލްސާގައި ވާހަކަފުޅު ދައްކަވަމުން ރައީސް ވިދާޅުވީ، މިދިޔަ ސަރުކާރުގައި ފެނިގެންދިޔައީ ރާއްޖޭގެ ކަނޑުގެ ސަރަހައްދުން ބޮޑު ބައެއް، ގާނޫނާ ހިލާފަށް އަދި ރައްޔިތުންނަށް އެއްވެސް އެނގުމެއް ނެތި ދޫކޮށްލި މަންޒަރު ކަމަށެވެ. އަދި މިކަން ކޮށްފައިވަނީ ގާނޫނު އަސާސީއާ ހިލާފަށް، ރައްޔިތުންގެ މަޖިލީހުގެ އެއްވެސް ލަފައެއް ނުވަތަ ދައުރެއް ނެތި ފޮނުވި ސިޓީއެއްގެ ސަބަބުން ކަމަށް އެމަނިކުފާނު ފާހަގަކުރެއްވިއެވެ.

"މިއީ އަޅުގަނޑުމެންގެ ކުރިމަތީގައި ކަންކަން ހިނގަމުންދާއިރު، އަޅުގަނޑުމެންގެ ސިކުނޑިން ވިސްނަންޖެހޭ ކަންކަން،"

ރައީސުލްޖުމްހޫރިއްޔާ ޑރ. މުހައްމަދު މުއިއްޒު

ރައީސް އިތުރަށް ވިދާޅުވީ، ކުރީ ސަރުކާރުގެ ފަނާކުރަނިވި ސިޔާސަތުގެ ދަށުން ކަންކަން އެމަގުން ދިޔަ ނަމަވެސް، ބިނާކުރަނިވި ޕީއެންސީގެ ފިކުރުން އެ ފޮނުވި ސިޓީ މިހާރު އަނބުރާ ގެނެސްފައިވާ ކަމަށެވެ. އަދި ވިއްކާލި ކަނޑުގެ ސަރަހައްދަކީ ގާނޫނީ ގޮތުން އަނެއްކާވެސް ރާއްޖޭގެ ބައެއްގެ ގޮތުގައި މި ސަރުކާރުން ބަލާ ކަމަށާއި، ބައިނަލްއަގުވާމީ މިންގަނޑުތަކާ އެއްގޮތަށް އެ ސަރަހައްދު ރަސްމީކޮށް ހޯދުމުގެ ގާނޫނީ މަސައްކަތްތައް ކުރިއަށްދާ ކަމަށް އެމަނިކުފާނު ވިދާޅުވިއެވެ.

މިއީ ހަރަދު ބޮޑު މަސައްކަތެއް ނަމަވެސް، ގައުމުގެ ހައްގުގައި މިކަން ކުރަންޖެހޭ ކަމަށް ރައީސް ވިދާޅުވިއެވެ. އެމަނިކުފާނު ފާހަގަކުރެއްވި ގޮތުގައި، މިދިޔަ ސަރުކާރުން ރައްޔިތުންގެ ފައިސާ މިލިއަނުން ހަރަދުކުރީ އެ ސަރަހައްދު ދޫކޮށްލުމަށެވެ.

ގައުމުގެ ސިޔާދަތާއި ރައްކާތެރިކަން ކަށަވަރުކުރުމަށް ސަރުކާރުން ކެނޑުނޭޅި މަސައްކަތް ކުރަމުންދާކަން ފާހަގަކުރައްވައި ރައީސް ވިދާޅުވީ، އެމަނިކުފާނުގެ ކުރިމަތީގައި އެންމެ އިސްވާނީ ދިވެހިން ކަމަށެވެ. ނަމަވެސް މީގެ ކުރިން ކަންތައް ހުރީ ވަކި ގައުމަކުން ބޭނުންވާ ގޮތަށް ކަންކަން ނިންމާ އުސޫލުން ކަމަށް އެމަނިކުފާނު ވިދާޅުވިއެވެ.

"ބޭނުންވީމަ ގައުމުތަކާ ސިޔާސީ ގުޅުންތައް ވެސް ކަނޑާލަނީ، އިންޓަނޭޝަނަލް ޖަމާއަތްތަކުން ވަކިވެސް ވަނީ، މިގޮތަށް މީގެ ކުރީގެ ދެތިން ސަރުކާރެއްގައި ކަންތައްތައް ހިނގާފައި ހުރީ،"

ރައީސުލްޖުމްހޫރިއްޔާ ޑރ. މުހައްމަދު މުއިއްޒު

ހާރިޖީ ގުޅުންތަކާ ގުޅޭގޮތުން ވާހަކަފުޅު ދައްކަވަމުން ރައީސް ވިދާޅުވީ، އިސްރާއީލް ފިޔަވައި ކިތަންމެ ކުޑަ ނުވަތަ ބޮޑު ގައުމަކާވެސް ރާއްޖެއިން ގުޅުން ބާއްވާނެ ކަމަށެވެ. ނަމަވެސް މީގެ ކުރިން އިސްރާއީލާ ގާތް ގުޅުމެއް ބާއްވަން އުޅުނު ކަމަށާއި، ލޮލުގެ ފަރުވާއަށް އެ ގައުމުގެ ޑޮކްޓަރުން ގެނައުމަށާއި، އިސްރާއީލުގެ އެއާލައިންތަކަށް ރާއްޖެއިން ޖާގަ ދޭން މަސައްކަތް ކުރި ކަމަށް ރައީސް ވިދާޅުވިއެވެ. އެކަން ހުއްޓުވީ ރައްޔިތުން ނިކުމެ ކަމަށްވެސް އެމަނިކުފާނު ފާހަގަކުރެއްވިއެވެ.

ރައީސް ވިދާޅުވީ ޕީއެންސީގެ ފިކުރަކީ އިސްލާމްދީން މަތިވެރިކޮށް، ގައުމު އިސްކޮށް ކުރިއަށް ނެރޭ ނުގުޑާ ފަދަ ވަރުގަދަ ގައުމީ ފިކުރެއް ކަމަށެވެ. އަދި ވޭތުވެދިޔަ ދެ އަހަރާއި ބައިގެ ތެރޭގައި އެ ޕާޓީން ކުރި މަސައްކަތާއި ގެންގުޅުނު ސިޔާސަތަކީވެސް އެއީ ކަމަށް ރައީސް ވިދާޅުވިއެވެ.