ސްވިޒަލޭންޑުގެ އާބާދީ ވަކި މިންވަރެއްގައި ހިފެހެއްޓުމަށްޓަކައި، އެ ޤައުމުގެ އާބާދީ 10 މިލިއަނަށްވުރެ އިތުރުވިޔަ ނުދިނުމަށް ގޮވާލާ ހުށަހެޅުމަކަށް ރައްޔިތުންގެ މެދުގައި ފެންނަ ނުފެންނަ ވޯޓެއް ނެގުމަށް ބޭނުންވާ ސޮއި ހަމަކޮށްފިއެވެ.

މި އިސްނެގުމަކީ ސްވިޒަލޭންޑުގެ އެންމެ ބޮޑު ސިޔާސީ ޕާޓީ ކަމަށްވާ "ސްވިސް ޕީޕަލްސް ޕާޓީ" (އެސް.ވީ.ޕީ) އިން ހުށަހަޅާފައިވާ ހުށަހެޅުމެކެވެ. އެ ޕާޓީން ވަނީ މިކަމަށްޓަކައި ބޭނުންވާ 114,000 އަށްވުރެ ގިނަ ސޮއި ބުދަ ދުވަހު އެ ގައުމުގެ ފެޑަރަލް ޗާންސެލަރީއަށް ހުށަހަޅާފައެވެ. ސްވިޒަލޭންޑުގެ ސީދާ ޑިމޮކްރަސީގެ ނިޒާމު އޮންނަ ގޮތުން، 100,000 ސޮއި ހަމަކޮށްފިނަމަ އެ ކަމަކާ ގުޅޭގޮތުން ގައުމީ ފެންވަރުގައި ވޯޓެއް ނަގަންޖެހެއެވެ.

މި ހުށަހެޅުން ހުށަހެޅި މައިގަނޑު ސަބަބަކީ ސްވިޒަލޭންޑަށް ހިޖުރަކުރާ މީހުންގެ އަދަދު ކޮންޓްރޯލްކޮށް، ގައުމުގެ ވަސީލަތްތަކާއި ތިމާވެށި ރައްކާތެރިކުރުމެވެ. އެސް.ވީ.ޕީ އިން ބުނާ ގޮތުގައި، އާބާދީ ހަލުވިކަމާއެކު އިތުރުވުމުގެ ސަބަބުން ގެދޮރުގެ އަގު ބޮޑުވުމާއި، ކަރަންޓުގެ ޚިދުމަތަށް ބާރުބޮޑުވުމާއި، އަދި ޤައުމުގެ އުމްރާނީ ވަޞީލަތްތަކަށް ނުކަތާވަރު ވަނީ ވެފައެވެ. އެހެންކަމުން ޤައުމުގެ ސަގާފަތާއި މިނިވަންކަން ދެމެހެއްޓުމަށްޓަކައި އާބާދީ ކޮންޓްރޯލްކުރުން މުހިންމު ކަމަށް އެ ޕާޓީން ދެކެއެވެ.

މި ހުށަހެޅުމުގައިވާ ގޮތުން، 2050 ވަނަ އަހަރުގެ ކުރިން ސްވިޒަލޭންޑުގެ އާބާދީ 9.5 މިލިއަނަށް އަރައިފިނަމަ، ސަރުކާރުން ވަގުތުން ފިޔަވަޅުތަކެއް އަޅަންޖެހޭނެއެވެ. މީގެ ތެރޭގައި ބޭރު މީހުންނަށް މަސައްކަތް ކުރުމަށް ދޫކުރާ ހުއްދަތައް މަދުކުރުމާއި، އާއިލާތައް އެއްކޮށް ދިރިއުޅުމަށް ދޭ ހުއްދަތަކަށް ހުރަސްއެޅުން ހިމެނެއެވެ. ސްވިޒަލޭންޑުގެ މިހާރުގެ އާބާދީއަކީ ގާތްގަނޑަކަށް 8.9 މިލިއަނެވެ.

މި ވޯޓު ނަގާނެ ވަކި ތާރީޚެއް އަދި ރަސްމީކޮށް އިޢުލާނެއް ނުކުރެއެވެ. އެހެންނަމަވެސް، ކުރިއަށް އޮތް ދެ އަހަރެއްހާ ދުވަހުގެ ތެރޭގައި މިކަމާ ގުޅޭގޮތުން ރައްޔިތުން ގޮތެއް ނިންމާނެ ކަމަށް ބެލެވެއެވެ. އިދިކޮޅު ފަރާތްތަކުން ދެކޭގޮތުގައި މިފަދަ ނިންމުމެއްގެ ސަބަބުން ސްވިޒަލޭންޑުގެ އިޤްތިޞާދަށް ބޭނުންވާ މަސައްކަތްތެރިން ލިބުމަށް ދަތިވެ، ވިލާތުގެ އިއްތިހާދާއެކު އޮންނަ ގުޅުމަށް ނޭދެވޭ އަސަރުކޮށްފާނެއެވެ.