ވޯލްޑް ކަޕްގެ ގަދަ 16 ގައި މިސްރާއި އާޖެންޓީނާ ބައްދަލުކުރި މެޗުގައި ހިނގާދިޔަ ބޮޑެތި އޮޅުވާލުންތަކާއި ކޮރަޕްޝަންގެ މައްސަލަތައް ފޮރުވުމަށް ފީފާއިން މަސައްކަތް ކުރަމުންދާ ކަމުގެ ތުހުމަތުތަކާއެކު، އާޖެންޓީނާ ދެން ކުޅޭ މެޗަށް ޕޯޗުގަލްގެ ރެފްރީއަކު ހަމަޖައްސައިފިއެވެ.

މިސްރާ ދެކޮޅަށް ކުޅުނު މެޗުގައި މިސްރުގެ ޓީމުން މޮޅު ކުޅުމެއް ދައްކާފައިވަނިކޮށް، ރެފްރީ ލެޓެކްސިއޭގެ ފަރާތުން ފެނިގެންދިޔައީ އާޖެންޓީނާއަށް ބުރަވެފައިވާ ނިންމުންތަކެކެވެ. މިގޮތުން މިސްރަށް ލިބެންޖެހޭ ސާފު ދެ ޕެނަލްޓީއެއް ރެފްރީ ދީފައިނުވާއިރު، ވީއޭއާރު އިންވެސް އެކަމަށް އެދެވޭ އިޝާރާތެއް ކޮށްފައެއް ނުވެއެވެ. މީގެ އިތުރުން، މިސްރުން ކާމިޔާބުކުރި މުހިންމު ލަނޑެއްވެސް ރެފްރީ ވަނީ ބާތިލްކޮށްފައެވެ.

މި މައްސަލައިގައި އެންމެ ބޮޑު ކަންބޮޑުވުމެއް އުފެދިފައިވަނީ، މިސްރުގެ ކުޅުންތެރިން ފަލަސްތީނުގެ ރައްޔިތުންނަށް ހަމްދަރުދީ ފާޅުކޮށް، އެ ގައުމުގެ ހައްގުގައި އަޑުއުފުލާތީ ފީފާއިން އެ ގައުމަށް ދަތިކުރުމުގެ ގޮތުން ގަސްދުގައި ނިންމި ނިންމުންތަކެއް ކަމަށް ބުނެ ކުރެވޭ ތުހުމަތުތަކާ ގުޅިގެންނެވެ. މިސްރުގެ ސަޕޯޓަރުންނާއި މީޑިއާތަކުން ތުހުމަތުކުރާ ގޮތުގައި، ދަނޑުމަތީގައި އާޖެންޓީނާ މޮޅުވީ ކުޅިވަރުގެ ރޫހާ އެއްގޮތަށް ދެއްކި ކުޅުމަކުން ނޫން ކަމަށާއި، އެއީ ފީފާގެ ނުފޫޒާއި ރެފްރީގެ ނިންމުންތަކުން ހޯދައިދިން މޮޅެކެވެ.

މި ފާޑުކިޔުންތަކާއި މައްސަލަތަކުގެ މަތި އެޅުމުގެ ގޮތުން، ވޯލްޑް ކަޕްގައި އާޖެންޓީނާ ދެން ސްވިޒަލޭންޑާ ދެކޮޅަށް ކުޅޭ މެޗުގެ ރެފްރީއަކަށް ފީފާއިން މިހާރު ވަނީ ޕޯޗުގަލްގެ ޖޮއާއޯ ޕިންހެއިރޯ ހަމަޖައްސާފައެވެ. މި މެޗުގެ އެސިސްޓަންޓް ރެފްރީންގެ ގޮތުގައިވެސް ހަމަޖައްސާފައިވަނީ ޕޯޗުގަލްގެ ދެ ރެފްރީން ކަމަށްވާ ބްރޫނޯ ޖީސަސް އަދި ލޫސިއާނޯ މައިއާއެވެ.

މީގެ އިތުރުން، ހަތަރުވަނަ އޮފިޝަލަކަށް ކެނެޑާގެ ޑްރޫ ފިޝާ ހަމަޖައްސާފައިވާއިރު، ރިޒާވް އެސިސްޓަންޓް ރެފްރީއަކީ މައިކަލް ބާވެޖަންއެވެ. މި ނިންމުމާއެކުވެސް ގިނަ ބަޔަކު ދަނީ ފީފާގެ އިންސާފުވެރިކަމާމެދު ސުވާލު އުފައްދަމުންނެވެ.